मैथली समाचार

सीके राउत गौरसँ गिरफ्तार

जनकपुरधाम १८ । स्वतन्त्र मधेशक माँग रखैत आन्दोलन करैत आबि रहल सीके राउत रौटहटसँ गिरफ्तार भेल छथि । राउतके रौतहट प्रहरी सदरमुकाम गौरसँ नियन्त्रणमे लेने छैक ।  जिल्ला अदालत रौटहटके तारिखमे उपस्थित होबएलेल गौर पहुँचल समय राउतके नियन्त्रणमे लेलगेल रौतहटके प्रहरी उपरीक्षक केदार ढकाल जानकारी देलन्हि । राउतके प्रहरी हुनक ४ वर्षीया बेटी आ गाडीके चालकके सेहो नियन्त्रणमे लेने छल । राउतविरुद्ध राज्य विप्लवविरुद्धक मुद्दा दायर कएलगेल अछि । ओ अपन समर्थकसहित अदालत पहुँचल छलथि ।
आशिन ३ गते संविधान दिवसके विरोध करैत राउत जनकपुरमे शक्ति प्रदर्शन कएने रहथि । संविधान दिवसके विरोधमे राउतकेँ कार्यक्रम नहि करए देबाक तैयारी कएने प्रहरी विभिन्न स्थानसँ हुनकर कार्यकर्तासभकेँ नियन्त्रणमे लेने छल । यद्यपी प्रहरी राउतकेँ नियन्त्रणमे लेबएमे सफल नहि भेल छल । राउत आसिन ३ गते जनकपुरक रामानन्द चौक पर अपन समर्थकसभकबीच सभा कएने रहथि । प्रहरीके आगुए राउत सभा कएलाकबाद सरकारसँ लऽ कऽ सुरक्षा निकायकेँ कडा आलोचना भेल छल ।

Read More »

सरकारकेँ राजपाक अल्टिमेटम

जनकपुरधाम १८ ।सरकारकेँ समर्थन करैत आबि रहल राष्ट्रिय जनता पार्टी (राजपा) नेपाल माँग पुरा करबालेल सरकारकेँ अल्टिमेटम देलक अछि । राजपा सोमदिन सभ जिल्ला सदरमुकाममे प्रमुख जिल्ला अधिकारीमार्फत अपन माँग पुरा करबालेल ज्ञापनपत्र बुझएबाक निर्णय कएने अध्यक्ष मण्डलक सदस्य राजकिशोर यादव जानकारी देलन्हि अछि ।प्रधानमन्त्री केपी ओलीसँ राजपाक अध्यक्ष मण्डलके संयोजक आ सदस्यसभ भेँट करबाक प्रयास कएलाकबादो समय नहि भेटल अछि । प्रधानमन्त्री ओलीसँ सोमदिन भेट कऽ ज्ञापनपत्र बुझाबक तैयारी राजपाक अछि मुदा समय निर्धारण नहि भेल यादव बतओलन्हि ।
राजपा प्रधानमन्त्रीकेँ बुझाबएबला ज्ञापनपत्रमे संविधान संशोधनक प्रस्ताव सदनमे लएबाक, मधेश आ थरुहट आन्दोलनक क्रममे राजपाक कार्यकर्ता उपर लगाओलगेल झुठ मुद्दा फिर्ता लेबाक आ बन्दीकेँ रिहाइ करबाक माग करए जा रहल अछि । तहिना, अपन प्रतिनिधिसभा सदस्य रेशम चौधरीक सपथग्रहण तथा आन्दोलनक घायलसभकेँ जीविकोपार्जनके व्यवस्था करबालेल राजपा माँग करैत आबि रहल अछि ।
एखन अचानक भेल मूल्यवृद्धि नियन्त्रण करबाक, देशमे हरेक दिन भऽ रहल हत्या, हिंसा आ बलात्कारक घटनाकेँ नियन्त्रण करबालेल राजपा माँग कएने अछि । प्रतिनिधिसभामे राजपाके १६ सांसद अछि । टीकापुर घटनाक मुख्य योजनाकारके रुपमे आरोपित रेशम चौधरीकेँ एखन धरि शपथग्रहण नहि कराओलगेल अछि । ओ पुर्पक्षके लेल कारागारमे छथि ।

Read More »

वार्डध्यक्ष साहक घर सहित जनकपुरक विभिन्न स्थानमे चलल डोजर

जनकपुरधाम १८ । जनकपुर उपमहानगरपालिका भितर सडक विस्तारक क्रममे नगरपालिकाके परिपत्र अनुसार स्वईच्छासँ घर नहि तोडन्हिारसभक घर उपर डोजर चलल अछि । एसियाली विकास बैंकके सहयोगमे जारी एकीकृत सहरी विकास परियोजना अन्तर्गत भऽ रहल सडक निर्माण एवं विस्तार क्रममे स्थानीयसभ अपनेसँ घर नहि तोडला बादा डोजर चलाओलगेल अछि । एहि क्रममे रविदिन भिन्सरमे जनकपुर उपमहानगरपालिका वार्ड नम्बर ९ क वार्डध्यक्ष परमेश्वर साहके घर उपर सेहो डोजर चलाओलगेल अछि ।
वार्डध्यक्ष घर नहि तोडला बाद तीन महिनासँ सडक निर्माणमे अवरोध भेल कहैत डोजर लगा कऽ घर तोडलगेल बताओलगेल अछि । वार्डध्यक्ष साह सहित अन्य स्थानसभमे व्यापक प्रहरीके उपस्थितिमे घरसभ डोजरसँ तोडलगेल अछि । जनकपुरक पीडारी चौक, मुरली सहितक स्थानमे दर्जानोके संख्यामे घरसभ तोडलगेल अछि ।
घर तोड्एके क्रममे वार्डाध्यक्ष प्रमेश्वर साह सहित हुनकर परिवारक सदस्यसभ घर आगा अवरोध कएला बाद प्रहरी धडपक आ दुरव्यवहार सेहो कएने छलथि । वार्डध्यक्ष सहित हुनकर पत्नी चाँदा साह, भैया लालबाबु साह आ भगिना वसन्त साहकेँ जिल्ला प्रहरी कार्यालय धनुषा तीन घण्टा हिरासतमे राखि कऽ छोडने अछि ।
अगामी ५ डिसेम्बर २०१८ धरि मात्र म्याद रहल जारी एडीबी परियोजनाके काज पीडारी चौकमे वार्डध्यक्षके अवरोध कएने कहैत किछु स्थानीयसभ बेरबेर अवरुद्ध करैत छल । किछु दिन आगा मेयर लालकिशोरकेँ स्थानीयसभ घेराबन्दी सेहो कएने छलथि । रविदिन भिन्सरमे सेहो ओतहके किछु स्थानीयसभ तेसर बेर वार्डध्यक्ष साहके घर तोड्ए पडत आ सडक निर्माणक काज करए पडत कहैत चक्कजाम कएने छलथि ।
चक्कजाम खोलाबए पहुँचल मेयर लालकिशोर आ उपमेयर रिता झाकेँ घर तुरन्त तोडाबए लेल स्थानीयसभ दबाब देला बाद प्रहरीके सहयोगमे एकाएक घर उपर डोजर चलाओलगेल स्थानीयसभ बतओलन्हि अछि ।
एम्हर, वार्डध्यक्ष प्रमेश्वर साह अपन घर सडकमे नहि पडल दावा करैत मेयर लालकिशोरले पूर्वाग्रही आ रिसीइवीके कारण घर तोडने आरोप लगओलन्हि । २०७० सालमे भेल साढे ५२ फिट सडक नापीमे अपन घर नहि पडल बतबैत वार्डध्यक्ष साह कहलन्हि ‘ एकाएक हमर घर उपर डोजर चलाओलगेल, रोकएके प्रयास कएला बाद पुरा परिवार उपर प्रहरी लगा कऽ ज्यादती कएलक, अन्याय कएलक । नियन्त्रणमे लऽ कऽ प्रहरी हिरासतमे राखलगेल ।’
शुरुएसँ मेयर लालकिशोरके गलत क्रियाकलापके विरोध कएला बाद एहन दुर्दशा भोगए पडल आ अपन घर सेहो ओहि कारण तोडलगेल वार्डध्यक्ष प्रमेश्वर साह आरोप लगओलन्हि ।
मेयर लालकिशोर भारतीय प्रधानमन्त्री नरेन्द्र मोदीके भ्रमणके नाममे बाह्रविघा मैदानके देबाल पेन्टिंग, जानकी मन्दिरके रंगरोगनके नाममे लाखो भ्रष्टाचार कएने, नगरपालिका कार्यालयमे अपन नातागोतामे पडएबलाकेँ नोकरी देने आ डेढ करोडके गाडी किनने सहितक विरोध कएला बाद मेयर साह अपन घर तोडएके धम्की देने वार्डध्यक्ष प्रमेश्वरके आरोप छन्हि । ओ अपना उपर भेल ज्यादतीके विषयमे छानविन समिति गठन कऽ कऽ निष्पक्ष छानविन करबालेल माँग कएलन्हि अछि ।

Read More »

‘प्रदेश प्रहरी ऐन संविधान विपरित अछि तऽ अदालत जाउ’

जनकपुरधाम १८ ।मुख्यमन्त्री लालबाबु राउत प्रदेश सरकार लाबि रहल रहल प्रहरी ऐन संविधान विपरित अछि तऽ सर्वोच्च अदालत जाए लेल चुनौती देलन्हि अछि । ओ शान्ति सुरक्षा तथा सुशासनके लेल संविधानतः प्रदेश सरकार अपने प्रहरी गठन करए जा रहल दावा कएलन्हि अछि ।
रविदिन प्रदेशसभामे सम्बोधन करैत ओ कहलन्हि, ‘सरकारके अर्थ तहन होइत अछि जहन सरकारसँग अपन प्रहरी, प्रशासन, कर्मचारी आ अर्थतन्त्र रहैत अछि । एखन प्रदेशमे बलात्कार, हत्याहिंसा होइत अछि, सरकारसँग अपन प्रहरी नहि अछि सरकार कोना चलत ? प्रदेशमे शान्ति सुरक्षा कोना स्थापना होएत ? मुख्यमन्त्री राउत कहलन्हि, ‘हमसभ संविधानतः बहुत सोंचि समझि कऽ प्रहरी ऐन लआने छी । जिनका संविधान विपरित लगैत अछि ओ सर्वोच्च अदाल सेहो जा सकैत छी । प्रदेश प्रहरी ऐन लाबएमे संघीय सरकार अवरोध कएने अछि ।’
ओ जिल्ला प्रशासन कार्यालय प्रदेश सरकारके कार्यक्षेत्र भितर हस्तक्षेप कऽ कऽ प्रदेश सरकारके अधिकार हनन कएने आरोप लगओलन्हि । संघीय सरकार संविधान बनल तीन वर्ष बित गेला बादो किया संघीय प्रहरी ऐन लाबए नहि सकल प्रश्न करैत मुख्यमन्त्री राउत संघीय सरकार २÷३ वर्ष भितर सेहो प्रहरी ऐन नहि लाबि सकत ठोकुवा कएलन्हि ।
ओ केन्द्र सरकार प्रदेश सञ्चालन करबामे कर्मचारी नहि पठा कऽ असहयोग कएने कहैत बाध्य भऽ करारमे कर्मचारी भर्ना करबाक अवस्था आएल बतओलन्हि । ओ कहलन्हि , ’संघीय सरकार कर्मचारी नहि पठओलासँ नीति तथा कार्यक्रम कार्यान्वयनमे समस्या अछि । कर्मचारी नहि अछि बजेट के खर्च करत ? विकास कोना होएत ?’ प्रदेश प्रहरी आ करारमे कर्मचारी भर्नाके लेल सहयोग करबालेल सांसदसँग मुख्यमन्त्री राउत आग्रह सेहो कएलन्हि । विपक्षी दल बजेटमे संशोधनके माँग करैत शुक्रदिन प्रदेशसभा बैठक अबरुद्ध कएला बाद रविदिन प्रदेशसभामे राउत सम्बोधन करैत बजेटमे रहल त्रुटि सुधार करबाक प्रतिबद्धता जनओलन्हि अछि ।
ओ वन, उद्योग पर्यटन तथा वातावरण मन्त्रालयके उदाहरण दैत जम्मा ९ सय ९३ कर्मचारी आवश्यक्ता रहला बादो सरकार १३ गोटे कर्मचारी मात्र पठओने बतओलन्हि । ओ समान्य प्रशासन मन्त्री लालबाबु पण्डितकेँ कर्मचारी पठाबएलेल बेरबेर आग्रह कएला बादो कर्मचारी नहि पठओने उपराग कएलन्हि । आबए चाहएबला कर्मचारीकेँ सेहो प्रदेश २ मे असहयोग भऽ रहल झुठ अफवाह फैला कऽ नहि चाहएबला कर्मचारीकेँ पठओने मुख्यमन्त्री राउतके उपराग छन्हि । प्राविधिक कर्मचारी ऐन पास भेला बाद प्रदेश सरकार आवश्यक्ता अनुसार कर्मचारी भर्ना करबाक उल्लेख कएलन्हि ।
मदर्सा बोर्डके आवश्यक्ता विषयमे बजैत मुख्यमन्त्री राउत प्रदेश २ मे १२ प्रतिशत मुस्लिम जनसंख्या रहल आ ओसभ सभसँ अधिक पिछडल रहलासँ हुनकासभक शिक्षा स्तरमे बृद्धिके लेल आधुनिक मदर्सा शिक्षा लाबि रहल स्पष्ट कएलन्हि । मुस्लिम तथा दलितके शिक्षा, स्वास्थयके स्तर नहि बढए धरि प्रदेशके विकास होबए नहि सकबाक उल्लेख करैत सरकार दलितसभक लेल सेहो दलित शशक्तिकरण ऐन लाबि रहल जानकारी देलन्हि ।
तहिना, त्रुटिपुर्ण तरिकासँ बजेट वितरण कएलगेल कहैत विपक्षीसभ आलोचना कएला बाद संसदमे जबाब दैत अर्थमन्त्री विजय यादव प्रदेशके ६४ ओ क्षेत्रमे समान रुपसँ बजेट पुनरावलोकन करबाक प्रतिबद्धता जनओलन्हि अछि ।
नेकपा प्रदेशसभा सदस्य जगत यादव मधेसीके खुनसँ बनल वर्तमान मधेसवादी दलके सरकार शहीदके अपमान कएने आरोप लगओलन्हि अछि । शहीदके सपना आ भावना विपरिच सरकार काज कऽ रहल आरोप लगबैत यादव दोसर सरकार गठन करबालेल माँग कएलन्हि अछि । शहीदके भावना अनुरुप कोनो काज करए नहि सकल एखनुक सरकार षडयन्त्रकारी आ निक्कमा रहल हुनकर कहब छलन्हि ।
यादव आर्थिक वर्ष २०७४÷७५ के बजेट मन्त्रीसभ मिल कऽ खएने कहैत छानविनके माँग कएलन्हि । रविदिनक बैसारमे गाम सभा तथा नगरसभाके कानून निर्माण प्रक्रिया सम्बन्धी विधेक आ सार्वजनिक प्रशासनक लेल करारमे कर्मचारी भर्ना सम्बन्धी विधेयक उपर छलफल भेल छल ।

Read More »

जनकपुरमे पाकिस्तानी चिनी, भारतीयसँ १५ रुपैयाँ सँस्ता

जनकपुरधाम १८ । नेपालके अपने उत्पादनसँ माँग अनुसार पुर्ति नहि भऽ सकला बाद जनकपुरमे एखन पाकिस्तानी चिनी आएल अछि । नेपालमे चिनी उद्योग उपभोक्ताके माँग अनुसार उत्पादन नहि कऽ सकला बाद एतुका पैघ व्यवसायीसभ पाकिस्तानी चिनी आयाततर्फ आकर्षित भेल अछि ।
जनकपुरक अधिकांश खुद्रा दोकानमे एखन पाकिस्तानसँ आयात भऽ कऽ नेपाल आएल चिनी प्रसस्त रुपेँ भेटैत अछि । भारतसँ पाकिस्तानमे चिनी सँस्ता रहलासँ पैघ व्यवसायीसभ ओहितर्फ आकर्षित भेल बताओलगेल अछि । एक खुद्रा व्यापारीके अनुसार जनकपुर बजारमे एखन नेपालके अपन उत्पादन आ भारतसँ आयात भऽ कऽ आएलसँ अधिक पाकिस्तानसँ आएल चीनी जतह ततह अछि । भारतसँ चिनी आबए बन्द भेला बाद चिनीके पैघ व्यवसायीसभ पाकिस्तानसँ आयात करबालेल शुरु कएने ओ बतओलन्हि ।
अपनेसभ सेहो स्थानीय डिलरसँ पाकिस्तानी चिनी खरिद कऽ उपभोक्ताकेँ बिक्रि करैत आएल एतुका खुद्रा व्यापारी रामबहादुर साह बतबैत छथि ।
पाकिस्तानसँ आयात कएला बाद सँस्ता पडलासँ व्यवसायीसभ ओहितर्फ आकर्षित भेल महोत्तरीके रामनगरस्थित एभेरेष्ट सुगर मिलमे कार्यरत एक कर्मचारी बतओलन्हि । भारतसँ आयात कएलापर प्रति किलो ६०÷६२ रुपैयाँ परएबला चिनी पाकिस्तानसँ आयात कएलापर प्रति किलो ४० रुपैयाँ मात्र पडल ओ जानकारी देलन्हि । पाकिस्तानसँ चिनी आयात कएलापर व्यवसायीसभकेँ प्रति किलो १० सँ १५ रुपैयाँ बचत भऽ रहल बताओलगेल अछि । हुनका अनुसार नेपालके दुगड आ शिखर समूह पाकिस्तानसँ चिनी आयात कऽ रहल अछि ।

पाकिस्तानसँ चिनी आयात होबए लगला बाद नेपाली उद्योगीसभ विरोध सेहो कएने छलथि । पाकिस्तानी चिनीके कारण नेपालके उद्योगसभ घाटामे गेल कहैत ओसभ आपत्ति जनओने छलथि । आ, ओहिके बाद पाकिस्तानसँ चिनी आयात करबामे रोक लगाओलगेल बताओलगेल अछि । मुदा पाकिस्तानसँ चिनी आयात करबालेल ६ महिना आगा रोक लगाओलगेला बादो विगतके भण्डारण एखन धरि नेपाली उपभोक्ता समक्ष पहूँच रहल अछि । एक व्यवसायीके अनुसार नेपाली उपभोक्ताकेँ ६ महिना धरि पहुँचएजँका पाकिस्तानी चिनीके भण्डारण कएलगेल अछि । भारतसँ आयात बन्द भेला बाद पाकिस्तानसँ पहिल बेर चिनी आयात कएलगेल बताओलगेल अछि ।
नेपालमे सञ्चालनमे रहल १०÷१२ चिनी उद्योग ७५ प्रतिशत उपभोक्ताके माँग मात्र पुरा कऽ सकल अछि । नेपालमे उत्पादन होबएबला चिनी भारत आ पाकिस्तानमे परएबला मूल्यसँ अधिक महँगा रहल बताओलगेल अछि । चिनी उत्पादन करबामे कच्चा पदार्थसभ भारतसँ लाबएके बाध्यता रहल अछि ।
चिनी उद्योगी व्यवसायीसभक अनुसार नेपालमे वार्षिक २ लाख २५ हजार टन चिनी खपत होइत अछि । जाहिमेसँ १ लाख ७५ हजार टन स्वदेशमे उत्पादन भऽ रहल अछि तऽ बाँकी ५० हजार टन औपचारिक तथा अनौपचारिक रुपेँ बाहरसँ आयात होइत आएल अछि ।

Read More »

‘सरकारके काम कम, गप्प बेसी’

जनकपुरधाम १८ । नेपाली काँग्रेसक नेता रामशरण महत केपी ओली नेतृत्वक वर्तमान सरकार जनताक अपेक्षा अनुसार काज नहि कऽ सकल आरोप लगओलन्हि । पछिला आठ महिनाक अवधिमे कम्युनिस्ट सरकार जनताके कर आ महँगाइ बाहेक आओर किछु नहि दऽ सकल महत बतओलन्हि ।
‘जनता उत्साहके साथ भोट दऽ कऽ स्थिर सरकार बनाबएलेल जनमत देने छल,’ शनिदिन जनकपुरमे पत्रकारसभसँ बातचित करैत महत कहलन्हि,‘दु तिहाइ मत भेटल वर्तमान सरकार काज कम आ गप्प अधिक कएने अछि ।’
नेता महत सरकार आयस्रोत तथा रोजगारीके अवसर बढाबएतर्फ केन्द्रीत नहि भऽ कऽ सस्ता भाषण कऽ जनताके ठगएके काजमात्र कएने आरोप लगओलन्हि । ‘शान्ति सुरक्षाके भयावह अवस्था अछि, विकास निर्माण जकथक परल अछि,’ ओ कहलन्हि,‘सरकार जनताके शान्ति सुरक्षा तऽ नहिए दऽ सकल अछि, उन्टे डराबएके काज कएने अछि ।’
प्रदेशमे आवश्यक कर्मचारी नहि पठा कऽ सरकार प्रदेश सरकारके कमजोर करैत संघीयता प्रभावित करबाक प्रयासमे रहल कहैत महत ककरो चाहलासँ संघीयता समाप्त नहि होएत बतओलन्हि ।
संविधानक भावना विपरित सरकार करवृद्धि कऽ महँगी बढओने कहैत पूर्व अर्थमन्त्री सेहो रहल महत बजार उपर सरकार नियन्त्रण नहि रहल बतओलन्हि । ‘जनताके सह्य नहि होबएबला हिसाबसँ मूल्यवृद्धि भेल अछि,’ महत कहलन्हि,‘सरकार उपभोक्ताक हकहितलेल बजार नियमन सेहो नहि कऽ सकल अछि, जनतामे व्यापक निराशा अछि ।’ पाँच वर्षक म्यान्डेट भेटलाक बादो एहि प्रकारक गतिविधि रहल तऽ वर्तमान सरकार पुरा अवधि नहि चलि सकत हुनकर दावा छलन्हि ।
प्रतिपक्षक हैसियतमे सरकारक गलत निर्णयके विरोध कएलाकबादो नेपाली काँग्रेस सशक्त रुपेँ प्रस्तुत नहि भऽ सकल महत स्वीकार कएलन्हि अछि । पार्टीक विधान संशोधन भेलाकबादो सभापतिक अधिकार कटौती हएबाक संभावना कम रहल हुनकर छलन्हि । आगामी अगहनमे होबएबला महासमितिक बैसारसँ पार्टीक विधान संशोधन होएत महत जानकारी देलन्हि ।

Read More »

नक्कली नागरिकता बनएबाक प्रयास कएने तीन गोटे पकराएल

जनकपुरधाम १८ । नक्कली नागरिकता बनएबाक प्रयास कएने तीन गोटेके प्रहरी जनकपुरसँ नियन्त्रणमे लेलक अछि । पकराएबलामे भारतक सीतामढी जिल्ला कोरियाही पञ्चायत भेमुवाक २४ वर्षीय तसिफ अंसारी, जनकपुरधाम–१४ रजौलक ५५ वर्षीय मन्जुर अंसारी आ मन्जुरक पत्नी ४८ वर्षीया सलमा खातुन रहल प्रहरी जनओलक अछि ।
प्रहरी नियन्त्रणमे लेने सीतामढी कोरियाहीक तसिफ मन्जुरक साला रहल प्रहरी जनओने अछि । मन्जुर अपन साला आ पत्नीके नातामे भाय परएबला तसिफके बेटा कहि कऽ नेपाली नागरिकता देबाक तैयारी कएने छल ।
मन्जुर आ सलमा भारतीय नागरिक तसिफके नेपाली नागरिकता बनएबाक तैयारी कएने सूचनाक आधार पर प्रहरी छानबिन कएने छल । छानबिनके क्रममे नागरिकता लेबएबला सम्पूर्ण कागजात तैयार अवस्थामे बरामद भेल जिल्ला प्रहरी कार्यालय धनुषाक प्रवक्ता एवम डीएसपी दीपेन्द्र शाही जानकारी देलन्हि ।
नियन्त्रणमे लेलगेल तीनुगोटेके हिरासतमे राखि कऽ एहिसँ पहिने सेहो नक्कली नागरिकता बनएबाक काजमे संलग्न रहल नहि रहल विषयमे आवश्यक अनुसन्धान चलि रहल जिल्ला प्रहरी कार्यालय धनुषा जनओलक अछि ।

Read More »

‘जनकपुर अस्पतालक नाम लक्ष्मी नारायण झा अस्पताल राखी’

जनकपुरधाम १८ ।नेपाली काँग्रेसक उपसभापति विमलेन्द्र निधि जनकपुर अञ्चल अस्पतालक नामाकरण डा.लक्ष्मी नारायण झाक नामसँ करबालेल प्रस्ताव कएलन्हि अछि ।देशमे गणतन्त्र स्थापना करबालेल संघर्ष कएलाक कारण तत्कालीन पञ्चायती सरकार डा.झाके वेपत्ता कएने छल । पेशासँ सर्जन रहल धनुषा निवासी डा.झाक अवस्था एखनो अज्ञाते अछि ।
नेपाल रेडक्रस सोसाइटी जनकपुर शुरु कएने ब्लड कम्पोनेन्ट सर्भिस कार्यक्रमके उद्घाटन कार्यक्रममे बजैत उपसभापति निधि पेशागत आ राजनीतिक रुपमे सेहो डा.झाक योगदान नहि बिसरल जा सकैत अछि उल्लेख कएलन्हि ।
‘विभिन्न अस्पतालसभक नामाकरण राजनीतिज्ञसभक नामसँ भऽ रहल अछि,’ निधि कहलन्हि,‘डा.झाक पैघ योगदान अछि, जनकपुर अञ्चल अस्पतालक नामाकरण हुनके नामसँ करी, हमरासभक पुरा सहयोग रहत ।’
‘डा.झा मधेशक धनुषा जिल्लाके रहथि,’ निधि कहलन्हि,‘एखन अपनासभक स्वास्थ्यमन्त्री उपेन्द्रजी सेहो मधेशक छथि, डा.झाक नाममे अस्पतालक नामाकरण करबामे ढिलाई नहि करबाक चाही । झाक नामसँ अस्पतालक नामाकरण कएलासँ हुनका सम्मान हएतन्हि ।’
जनकपुर अञ्चल अस्पतलाकेँ प्रादेशिक अस्पतालमे रुपान्तरण करबाक उपप्रधा एवम स्वास्थ्यमन्त्री उपेन्द्र यादवक सोचके निधि प्रशंसा कएलन्हि । उपसभापति निधि जनकपुर अस्पतालके प्रादेशिक मात्र नहि अन्तर्राष्ट्रिय स्तरके अस्पताल बनएबा पर जोड देलन्हि । प्रदेश भितर स्वास्थ्य, शिक्षा आ पर्यटनकेँ उन्नत स्वरुप देबएलेल राजनीतिसँ उपर उठि कऽ आगु बढबाक एखनुक आवश्यक्ता रहल हुनकर कहब छलन्हि ।
धनुषा नगराईन नगरपालिका ब्लड कम्पोनेन्ट सर्भिस सञ्चालन करबालेल उपकरण खरिदमे जनकपुर रेडक्रस सोसाइटीके आर्थिक सहयोग कएने अछि ।

Read More »

दशैं लक्षित धनुषा प्रहरीके सुरक्षा योजना सार्वजनिक

जनकपुरधाम १८ । जिल्ला प्रहरी कार्यालय धनुषा पावनि तिहारके लक्षित करैत तैयार कएने अपन सुरक्षा योजना सार्वजनिक कएलक अछि । नेपालीसभक महान पावनि विजया दशमी, दिपावली आ छठिके सभ्य तथा सुरक्षित वातावरणमे सम्पन्न करबाले तैयार कएलगेल सुरक्षा योजना प्रहरी सार्वजनिक कएने अछि । शान्तिपूर्ण तरिकासँ पावनि तिहार सम्पन्न करबालेल पर्व लक्षित विशेष सुरक्षाके संगहि संयुक्त कमाण्ड, पिकेट, मोटरसाइकल गस्ती, क्युआरटी, निरन्तर चेकजाँच, एम्बुस, मोबाइल चेकिङ, पैदल गस्ती, सादा पोशाक, चोरी लुटपाट नियन्त्रण विशेष टोली यात्री हेल्प डेस्कक स्थापना सहितक योजना प्रहरी बनओने अछि ।
पावनि तिहारमे विशेषतः घरेलु मदिरा, जुवातास, लागुऔषध, चोरी आ लुटपाट, गुण्डागर्दी, महिला हिंसा, तस्करीसहितक शिकायत अओलाक कारण एहिके कडाइके साथ नियन्त्रण कएल जाएत जिल्ला प्रहरी कार्यालय धनुषाक प्रवक्ता एवम डीएसपी दीपेन्द्र शाही जानकारी देलन्हि ।
सुरक्षा योजना प्रभावकारी बनाबएलेल आ त्रासविहीन वातावरणमे पावनि तिहार मनाबएलेल एक हजारसँ अधिक सुरक्षाकर्मी परिचालन करबाक योजना बनाओलगेल अछि । पावनि तिहारके लक्षित करैत जिल्ला प्रहरी कार्यालय आ एहि अन्तर्गतके विभिन्न कार्यालयसहित ६५० नेपाल प्रहरी, ३५० सशस्त्र प्रहरी बल आ राष्ट्रिय अनुसन्धान विभागक ५५ सहित कुल १ हजार ५५ सुरक्षाकर्मी २४ औं घण्टा परिचालन कएल जाएत ।
एहिके संगहि राजमार्गमे चलएबला रात्री बसक सुरक्षार्थ धनुषाक लालगढसँ पोर्तहा धरि आवश्यक्ता अनुसार क्रस पेट्रोल या बसमे हथियारधाी प्रहरीसहितक सुरक्षा प्रदान करबाक योजना प्रहरी बनओने अछि ।
अधिक आर्थिक कारोबार होबएबला स्थान सोनचाँदीक दोकना, बैंक वित्तीय संस्थासभक सुरक्षार्थ सादा पोशाकमे सुरक्षाकर्मी परिचालन कएल जाएत जिल्ला प्रहरी कार्यालय धनुषा जनओलक अछि ।
लागुऔषध सेवन तथा बिक्रि वितरण, मनोरञ्जनक नाम पर जुवातास खेलाबएबला, अवैध मदिरा उत्पादन तथा बिक्रि वितरणसहितक काज रोकबालेल सुक्ष्म निगरानी करैत एहि कार्यमे संलग्न देखलगेला पर कानुन अनुसार कारबाही कएल जाएत प्रहरी जनओलक अछि ।
दिपावली तथा छठि पर्वके नाम पर प्रयोग होबएबला फटाकाजन्य वस्तु प्रयोग नहि करबाले जिल्ला प्रहरी कार्यालय धनुषा सर्वसाधारणसँ आग्रह कएने अछि । पर्वक लाभ उठबैत हाथहथियार, विष्फोट पदार्थ, फटाका आ तस्करी सेहो बढि सकैत अछि कहैत सीमा क्षेत्रमे सुरक्षाकर्मीके आओर सक्रिय बनएबाक प्रहरीके योजना अछि ।
तहिना भारतसँ घुरल व्यक्तिसभकेँ सीमानाका पर चेकजाँचक नाम पर दुःख देबाक प्रवृत्तिके निरुत्साहित करबालेल नेपाल प्रहरी, सशस्त्र प्रहरी आ भारतक एसएसबीके संयुक्त हेल्प डेस्क स्थापना कऽ कार्यान्वयन करबाक प्रहरीके तैयारी अछि ।

Read More »

निर्माणाधीन अस्पताल भवनके उद्घाटन करैत उपप्रधानमन्त्री यादव कहलन्हि,‘जनकपुर गंदगीके ढेर’

जनकपुरधाम १८ । उपप्रधान तथा स्वास्थ्यमन्त्री उपेन्द्र यादव निर्माण कार्य पुरा नहि अस्पताल भवनके उद्घाटन कएलन्हि अछि । जनकपुर अञ्चल अस्पताल भितर निर्माणाधीन अवस्थामे रहल अस्पताल भवनके उपप्रधानमन्त्री यादव वृहस्पतिदिन एक कार्यक्रमकबीच उदघाट्न कएलन्हि ।
निर्माणधीन अवस्थामे रहल अस्पतालक नयाँ भवनमे लिफ्ट जडान करबाक बाँकी अछि तऽ वार्डसभमे शैय्या सेहो नहि राखलगेल अछि । अधिकांश काज सम्पन्न हएबाक बाँकी रहल अवस्थामे उपप्रधानमन्त्री यादव अस्पताल भवनके उद्घाट कएलन्हि ।
कुल १९ करोडक लागतमे नयाँ भवन निर्माण कऽ रहल निर्माण व्यवसायीके ६ करोड भुक्तानी देबाक सेहो बाँकी रहल जनाओलगेल अछि । गत आर्थिक वर्षमे अस्पताल निर्माण कम्पनीके १३ करोड रकम भुक्तानी कएने छल । निर्माण पुरा नहि भऽ भवनके धरफरीमे उद्घाटन कएलगेल अस्पतालमे कार्यरत कर्मचारीसभ टिप्पणी कएलन्हि अछि ।
एम्हर अस्पताल भवनके उद्घाटन कार्यक्रममे बजैत उपप्रधानमन्त्री यादव जनकपुरके गंदगीके ढेर बतओलन्हि अछि । ‘जनकपुर गंदगीके ढेर बनल अछि,’ यादव कहलन्हि,‘जनकपुर प्रवेश कएलाकबाद पिडाडी चौक गन्ध करैत अछि । सरसफाइके कोनो काज नहि भेल अछि ।’
गंदगी व्यवस्थापनके लेल पर्याप्ट बजेट अओलाकबादो जनप्रतिनिधिसभ कोनो काज नहि कऽ सकल यादव आरोप लगओलन्हि । ‘जनकपुर भरि गंदगीके ढेर अछि, नाक बन्द कऽ कऽ चलबाक अवस्था अछि,’ उपप्रधानमन्त्री यादव कहलन्हि,‘एखनुक अवस्थामे सीताके जन्म भेल रहैत तऽ जनकपुरमे जन्म नहि हुए कहैतथि । सरसफाइके लेल कोनो काज नहि भेल अछि ।’
बजेट पाबिओ कऽ स्थानीय सरकार काज नहि करत तऽ अमेरिकासँ आबि कऽ आदमी काज करत ओ प्रश्न कएलन्हि । ओ स्वच्छ, साफ तथा हराभरा जनकपुर बनाबएलेल प्रदेश सरकार आ स्थानीय सरकारके अभियान चलएबा पर जोड देलन्हि ।
निःशुल्क आधारभूत स्वास्थ्य सेवाके लेल संसदमे प्रस्ताव चलिगेल जानकारी दैत यादव आब नगरपालिका, गामपालिकासँ हरेक वार्डमे स्वास्थ्य चौकी खोलबाक उदघोष कएलन्हि । प्रदेश २ स्वास्थ्यके क्षेत्रमे पाछु परल अछि कहैत स्वास्थ्य क्षेत्रक विकासके लेल स्तरीय स्वास्थ्य प्रतिष्ठान आ प्रादेशिक आयुर्वेदिक अस्पताल खोलबालेल संसदमे विधेयक चलिगेल ओ जानकारी देलन्हि ।

Read More »