मैथिली समाचार

नेपालधरि रेल बनाएब कठिन चीनक स्पोष्टोक्ति

काठमाण्डु जेठ १० गते ।नेपालधरि रेल मार्ग बनाएब कठिन रहल चीन जनओलक अछि । यद्यपि रेल लएबाक कार्यमे चीन सरकार प्रतिवद्ध रहल कहैत ओ नेपाल सरकारक तर्फसँ सेहो सकारात्मक पहल भऽ रहल कहैत खुशी व्यक्त कएलक अछि ।वृहस्पतिदिन काठमाण्डुस्थित दूतावासमे पत्रकार सम्मेलन करैत चिनियाँ राजदूत हउ यान्छी कहलीह,‘राजनीतक सहमति होइते काल्हिए रेलवे लाइन नहि बनि जाइत अछि । यद्यपि रेल नेपाल धरि लाबएलेल चिनियाँ सरकार पूर्ण रुपेँ प्रतिवद्ध अछि ।’
क्रस बोर्डर रेलवे लाइन निर्माण भौगोलिक रुपेँ कठिन आ खर्चिला रहल ओ बतओलीह । एहिके लेल विस्तृत आ वैज्ञानिक अध्ययन आवश्यक रहल हुनकर कहब छलन्हि ।
विभित्र चारि चरणक काम पुरा करबाक अछि कहैत ओ पहिल चरणक प्रि–फिसिबिलिटीके काजमात्र पुरा भेल बतओलीह । दोसरणमे फिसिबिलिटी अध्ययन, तेसर चरणमे डिजाइन आ चारिम तथा अन्तिम चरणमे निर्माणक काज शुरु होएत ओ बतोलीह ।
‘नेपाल–चीन क्रस बोर्डर रेलवे महत्पूर्ण अछि । मुदा ई बहुत कठिन छैक । सहज नहि अछि हमरासभकेँ,’ राजदूत यान्छी कहलीह,‘ई लम्बा समयके प्रोजेक्ट अछि । मुदा हमसभ प्रतिवद्ध छी ।’
हिमाल पारसँ लेल लएबाक काज तत्काल जटिल रहलाक कारण एहिमे अध्ययन जारी रहल उल्लेख करैत चीनसँ जल्दिए रेल आबि रहल नेपालमे चलि रहल बहसँ ओसभ आश्चर्यमे परल राजदूत यान्छी बतओलीह ।
एहि विषयमे नेपाल सरकार, रेल विभागक अधिकारी आ चिनियाँ टोलीबीच छलफल जारी रहल ओ जानकारी देलीह अछि । ओ कहलीह,‘हमसभ अपना तर्फसँ तयारी जारी रखने अछि । नेपालक तर्फसँ विस्तृत तैयारी जारी रहए ।’ नेपाल–चीन रेलवे निर्माण करबालेल कतेक खर्च लागत आ कोन मोडेलमे बनत एहि विषयमे सेहो कानो निष्कर्ष नहि निकलि सकल ओ बतओलीह अछि ।

Read More »

‘जनसंख्याक आधार पर स्रोत साधनके वितरण’

जनकपुरधाम जेठ १० गते ।मुख्यमन्त्री लालबाबु राउत मानव सुचकांकक अवस्था आ जनसंख्याके आधार पर स्रोत साधनक वितरण करबा पर जोड देलन्हि अछि ।राष्ट्रिय प्राकृतिक स्रोत तथा वित्त आयोग वृहस्पतदिन जनकपुरमे आयोजना कएने कार्यक्रममे मुख्यमन्त्री राउत संघ सरकार एखन कएने स्रोत साधनक वितरण अव्यवहारिक रहल उल्लेख कएलन्हि अछि ।विकास निर्माणक मुख्य आधार प्रदेश आ स्थानीय सरकार रहल उल्लेख करैत ओ बजेटके वितरण करबाक क्रममे केन्द्र सरकार ४० प्रतिशत राखि कऽ प्रदेश आ स्थानीय तहकेँ ३०÷३० प्रतिशत बजेट देबएलेल आग्रह कएलन्हि ।
प्रदेश २ मानव सूचकांकके आधार पर सभसँ पाछु रहलाक कारण ओकरा आधार बना कऽ बजेट उपलब्ध कराबमे पहल करबालेल राष्ट्रिय प्राकृतिक स्रोत तथा वित्त आयोगकेँ सुझाव ओ सुझाव देलन्हि ।
प्राकृतिक स्रोतक वितरण सेहो न्यायोचित ढंगसँ हएबाक चाही कहैत मुख्यमन्त्री राउत प्राकृतिक स्रोतक प्रभावित क्षेत्रके सेहो ध्यान देब जरुरी रहल बतओलन्हि ।
प्रदेश २ सँ सभसँ अधिक युवासभ खाडी देशमे रहल आ ओतहसँ आएल रेमिटान्ससँ देश चलि रहल बतबैत ओ ओहि युवासभकेँ लक्षित कऽ रोजगारमूलक कार्यक्रम लएबा पर जोड देलन्हि अछि ।
आयोगक अध्यक्ष बालानन्द पौडेलक अध्यक्षतामे सम्पत्र कार्यक्रममे वन, उद्योग तथा पर्यटनमन्त्री रामनरेश राय, भौतिक पूर्वाधार मन्त्री जितेन्द्र सोनल, समाजिक विकास मन्त्री नवल किशोर साह अपन अपन विचार रखने छलथि ।

Read More »

चारि लाखसँ अधिक भोटसँ राहुल गान्धी विजयी

एजेन्सी, जेठ १० गते । भारतीय कांग्रेस आईके अध्यक्ष राहुल गान्धी लोकसभा चुनावमे विजयी भेल छथि । केरला आ उत्तरप्रदेश दुनु स्थानसँ चुनाव लडल गान्धी मतगणना सम्पत्र भेल केरलासँ चुनाव चितल छथि । समाचार तैयार करए धरि उत्तर प्रदेशमे ओ पाछु छलथि ।अध्यक्ष गान्धी केरलाके वायनाडमे चारि लाखसँ अधिक भोटसँ प्रतिस्पर्धी भारतीय कम्युनिस्ट पार्टीक पीपी सुनिरकेँ पराजित कएने भारतीय सञ्चारमाध्यमसभ जनओलक अछि । एम्हर उत्तर प्रदेशक अमेठीमे गान्धी भारतीय जनता पार्टीक उपाध्यक्ष स्मृति इरानीसँ पैघ मतक अन्तरसँ पाछु छथि ।
भारतीय सञ्चार माध्यम इन्डियन एक्सप्रेसक अनुसार बिहारमे पैघ चर्चामे रहल सिपीआइ उम्मेदवार कन्हैया कुमार बीजेपीक गिरिराजसिंहसँ पराजित भेल छथि ।
तहिना बिहारक बीजेपी अध्यक्ष नियत्यान्द राय आरएलएसपीक अध्यक्ष उपेन्द्र कुशवाहाकेँ उजियारपुरमे पराजित कएलन्हि अछि । तहिना बीजेपीक छेदी पासवान कांग्रेसक उम्मेदवार तथा पूर्व लोकसभाक सभामुख मिरा कुमारकेँ ससाराममे पराजित कएलन्हि अछि । एनडीए गठबन्धनक जनता दल युनाइटेड सीतमाढी सीट जितलक अछि । तहिना एलजेपीक उम्मेदवार चिराग पासवान पुनः जमुईमे जीत हासिल कएलन्हि अछि ।

Read More »

रत्नसागर मन्दिरक पूर्वमहन्थके पुर्पक्षके लेल हिरासतमे रखबाक आदेश

जनकपुरधाम जेठ १० गते ।उच्च अदालत जनकपुर जनकपुरस्थित रत्नसागर मन्दिरक पूर्वमहन्थ बैकुण्ठ दासके पुर्पक्षके लेल हिरासतमे रखबाक आदेश देलक अछि ।फर्जी कऽ मठमन्दिरक जग्गा बेचबिखन कएने मुद्दामे जिल्ला अदालत धनुषा धरौटी करबालेल देने आदेश बदर करैत उच्च अदालत दासकेँ पुर्पक्षके लेल हिरासतमे रखबाक आदेश देलक अछि ।
हजारी जनक विद्यापीठ जिल्ला अदालतक आदेश खारिज करबाक माँग करैत देने पुनरावेदनउपर सुनवाइ करैत उच्च अदालत जनकपुरक न्यायाधीशद्वय विनोदमोहन आचार्य आ अनन्तराज डुम्रेक संयुक्त इजलास वृहस्पतिदिन ई आदेश सुनओने अछि ।
जनकपुर–८ स्थित हजारी जनक विद्यापीठ भोगचलन करैत आबि रहल करोडौं मूल्य बराबरके अढाइ विघा जमीन दास नक्कली लालपूर्जा बना कऽ हडपने कहैत प्राचार्य विजय चौधरी अदालतमे मुद्दा दायर कएने रहथि । एहि मुद्दामे गिरफ्तार दास विगत किछु दिनपहिने जिल्ला अदालतक आदेशसँ १५ लाख धरौटी बुझा कऽ रिहा भेल रहथि ।
एहिसँ पहिने गत वैशाख १६ गते सर्वोच्च अदालत दासक महन्थ पद सेहो खारिज करबाक फैसला सुनओेने छल । गुठी संस्थान अधिनस्त रत्नसागर मन्दिरक महन्थमे नियमविपरित रहल कहैत सर्वोच्च दासके पदसँ बर्खास्त करबाक फैसला सुनओने छल । गुठी संस्थान २०६० सालम पाँच वर्षके लेल महन्थ नियुक्त कएलाक बादो ओ खनधरि महन्थके रुपमे रहैत आबि रहल छलथि ।

Read More »

पाँच वर्षबाद भारतमे पुनः मोदी

जनकपुरधाम जेठ १० गते ।प्रधानमन्त्री नरेन्द्र मोदी आगामी पाँच वर्ष पुनः भारतक नेतृत्व करताह निश्चित भेल अछि । मोदी आ भारतीय जनता पार्टी नेतृत्वक एनडीएक एहि जीतकेँ आबएबला किछुदिन मात्र नहि आगामी वर्षसभमे सेहो बहुआयामीक ढंगसँ व्याख्या होएत ।चुनावी अभियानसभमे मोदीक व्यक्तित्वके अहम् भूमिका छल । हुनका हिन्दु राष्ट्रवादके एकमात्र नमूनाके रुपमे देखाओलगेल छल । गत जनवरीमे पुलवामामे भेल आतंकवादी आक्रमण आ ओहिके बाद भारतद्धारा कएलगेल जबाबी कारबाहीकेँ चुनावी अभियानक क्रममे खुब प्रचार कएलगेल । सम्पूर्ण भारतीयकेँ आक्रोशित बनाबएबला ओहि आतंकी आक्रमणक जबाबी कारबाहीकेँ मोदी चुनावी कार्यक्रमसभमे विरतापूर्ण काजक रुपमे व्याख्या कएने छलथि । ‘घरमे घुसके मारेंगे,’ भारतमे पैघ नारा बनल छल आ ई पैघ काज कएने चुनावी नतिजा देखओने अछि ।
जातीय आधारमे मतदाताके भोट देबाक प्रवृत्तिकेँ राष्ट्रिय सुरक्षाक ई नयाँ नारा समाप्त कऽ देलक आ हिन्दु मतदाताकेँ धु्रवीकृत कऽ देलक । ई प्रवृत्ति २०१४ मे सेहो छल मुदा एहि चुनावमे आओर वृद्धि भेल नतिजासँ देखबामे आएल अछि ।
२०१४ मे भाजपा जितने क्षेत्र एखनि ओकरासँग यथावत अछि । बल्कि पश्चिम बंगालसहितक नयाँ स्थानमे ओ विजयप्राप्त कएलक अछि । मूलधारक मिडियामे रहल एकतर्फा प्रचार सेहो मोदीक पक्षमे चुनावी नतिजा लाबएमे प्रमुख रहल ।
एहिबीच भारतीय प्रधानमन्त्री नरेन्द्र मोदी नयाँ नारा लओलन्हि अछि । २०१४ के चुनावमे सेहो मतपरिणाममे अपन जीत सम्भावनासंगहि भारत जितल कहैत आब खुशीके दिन आओत नारा लगओने मोदी आगामी पाँच वर्षके लेल सेहो नयाँ नारा देलन्हि अछि ।
वृहस्पतिदिन अपन आधिकारिक ट्वीटर ह्याण्डलसँ ट्वीट करैत प्रधानमन्त्री मोदी ‘सभके साथ, सभके विकास, सभके विश्वास, विजयी भारत’ नामक नारा लगओलन्हि अछि ।
एहिबीच भारतक लोकसभा निर्वाचनक मतगणनाक अन्तिम परिणाम अएबाक बाँकी रहल समय प्रधानमन्त्री केपी शर्मा ओली भारतीय प्राधानमन्त्री नरेन्द्र मोदीकेँ विजयी भेल कहैत बधाइ देलन्हि अछि । प्रधानमन्त्री ओली ट्वीट करैत मोदीके बधाइ देलन्हि अछि ।
तहिना प्रधानमन्त्री मोदीकेँ चिनियाँ राष्ट्रपति सि जिन पिङ्ग सेहो शुभकामना देलन्हि अछि । लोकसभा निर्वाचनमे मोदीक नेतृत्वमे भाजपा विजय हासिल कएने कहैत राष्ट्रपति जिन पिङ्ग शुभकामना देलन्हि अछि । जिन पिङ्ग शुभकामना पत्र पठबैत मोदीसँग सहकार्य करबालेल तैयार रहल बतओने भारतक विदेश मन्त्रालय जनओलक अछि ।
मतपरिणामक बाद हृदयघात
भारतक मध्यप्रदेश राज्यस्थित सिहोर जिल्लाक कांग्रेस नेता रतनसिंह ठाकुरके हृदयघातक कारण मृत्यु भऽ गेल अछि । चुनावी मतपरिणाम सार्वजनिक भऽ रहल समय विपक्षी दल कांग्रेसक अध्यक्ष रतनसिंह ठाकुरकेँ वृहस्पतिदिन भिन्सर १० बजे मतगणनास्थलमे हृदयघात भेल छल । हुनकर इलाजक क्रममे अस्पतालमे मृत्यु भेल भारतीय सञ्चारमाध्यम दैनिक भाष्करके अनलाइन संस्करण जनओने अछि ।

Read More »

सुरक्षामे चुनौतीः जनकपुरधरि कोनो पहुँचल हथियार ?

जनकपुरधाम जेठ १० गते । डकैती करबाक उद्देश्यसँ जनकपुर पहुँचल आठटा भारतीय डकैतके प्रहरी गिरफ्तार कएलक अछि । गिरफ्तार भेल डकैतसभकेँ जिल्ला प्रहरी कार्यालय पत्रकार सम्मेलन कऽ कऽ वृहस्पतिदिन सार्वजनिक कएलक अछि । पकराएलसभमेसँ ६ गोटे भारत बिहार समस्तीपुर आ दु गोटे मधुबनी जिल्ला साहरघाटके अछि ।
जनकपुरधाम उपमहानगरपालिका–८ स्थित बिहारकुण्डक महन्त नारायण शरणक निवासमे बुधदिन राति डाका करएगेल ओकरासभकेँ प्रहरी घेराबन्दी कऽ कऽ नियन्त्रणमे लेने छल । पकराएलमेसँ २० वर्षीय रबि मलिक डोम प्रहरीके गोली लागि कऽ घायल भेल अछि । पायरमे गोली लागल मलिकके जनकपुर अञ्चल अस्पतालमे इलाज चलि रहल अछि ।
तहिना ओकरेसभक समूहमे रहल मधुबनी साहरघाटक ३८ वर्षीय पप्पु उपमनामक संजयकुमार सुमन भागि रहल समय महोत्तरीक मठिहानीसँ प्रहरी बुधेदिन राति नियन्त्रणमे लेलक । महोत्तरीक मठिहानीसँ संजयक गाम साहरघाट मुश्किलसँ ३÷४ किलोमिटरके दुरी पर अछि । प्रहरी कनिको देर कएने रहैत तऽ ओ सीमा पार करबामे सफल भऽ जाइत ।
डाकुसभक समूहमे रहल २० वर्षीय साहिल रजक, २४ वर्षीय अजितकुमार सिंह, २८ वर्षीय सुजितकुमार राय, ३० वर्षीय अमितकुमार सिंह, २० वर्षीय अमितकुमार यादव आ मधुबनी साहरघाटक ३२ वर्षीय रंजितकुमार भगतके प्रहरी घेराबन्दी कऽ तत्काल नियन्त्रणमे लेलक ।
आठटा भारतीय डाकुके घटनास्थलेसँ गिरफ्तार करब प्रहरीके पैघ सफलता रहल धनुषाक एसपी शेखर खनाल दावा करैत छथि । महन्थके घरमे डकैती करबाक उद्देश्यसँ जनकपुरसँ पहुँचल ओकरासभकेँ घटनासँ पहिने नियन्त्रणमे लेल प्रहरीके सफलता रहल हुनकर कहब छलन्हि । समय पर सूचना भेटलासँ पैघ घटना रुकल एसपी खनाल बतओलन्हि ।
जनकपुरधरि कोना पहुँचल हथियार ?
डकैत करबाक उद्देश्यसँ जनकपुर पहुँचल ओकरासभक सँगसँ प्रहरी पैघ परिमाणमे हथियार बरामद कएलक अछि । एसपी खनालक अनुसार ओकरासभक साथसँ मेड इन यूएसए लिखल १ टा पेस्तोल, ओहिमे प्रयोग होबएबला म्यागजिन एक थान, पेस्तोलक गोली २ टा, खोका १ टा, गोली लोड कएलगेल कटुवा पेस्तोल १ टा, कटुवा पेस्तोलक गोली २ टा, खुकुरी १ टा बरामद भेल अछि ।
दुटा मोटरसाइकल आ एकटा स्कुटी चढि कऽ भारतसँ जनकपुरधरि पहुँचल ओसभ एतेक हथियारसहित आएल घटना शान्ति सुरक्षाउपर प्रश्नचिन्ह खडा कएलक अछि । भारतीय सीमा क्षेत्रसँ जनकपुरधरि पहुँचबामे कमसँ १५÷१६ किलोमिटरके यात्रा करए परैत अछि । ओ, एहि बीचमे विभित्र स्थान पर प्रहरीके चेकजाँच टोली खटल रहलैत अछि । सीमानाका पर सेहो नेपाल प्रहरी आ सशस्त्र प्रहरी २४ औं घन्टा तैनाथ रहैत अछि । मुदा ओसभ सहो हथियार लऽ कऽ आबि रहलसभक विषयमे कियाक नहि बुझि सकल ? तीनटा मोटरसाइकलमे हथियार लऽ कऽ आएल ओकरासभकेँ प्रहरी सीमानाकासँ लऽ कऽ जनकपुरधरि सेहो नहि पकरि सकब सुरक्षा चुनौती बढओने आमनागरिकबीच विश्लेषण शुरु भेल अछि ।
यद्यपि धनुषाक एसपी खनाल कोना कऽ हथियार जनकपुरधरि पहुँचल एहि विषयमे अनुसन्धान कऽ रहल प्रतिक्रिया देलन्हि अछि । ‘जनकपुर तक ओसभ हथियार लऽ कऽ कोना पहुँचल, कोन नाकासँ ओसभ एतहधरि आएल अछि । एहि विषयमे हमसभ अनुसन्धान कऽ रहल छी,’ एसपी खनाल बतओलन्हि ।
डाकुके पहुँचबासँ पहिने घटनास्थल पहुँचल छल प्रहरी
आठगोटेके समूहमे रहल ओसभ बुधदिन दुपहरियामे जनकपुरम पहुँचल छल । जनकपुरधाम–४ महावीर चौकस्थित लवली होटलमे दिनभरि रुकल ओसभ राति करिब सवा ९ बजेतर्फ डकैत करबालेल विहारकुण्ड मन्दिर पहुँचल छल । मुदा ओकरासभके पहुँचबासँ पहिने प्रहरी ओतह पहुँचलाक बाद डकैत करबाक योजना सफल नहि भऽ सकल ।
‘डाकुसभ पहुँचबाक संगहि प्रहरी घेराबन्दी कएलाक बाद ओकरासभमेसँ एकगोटे फायर खोललक, प्रहरी जबाबी कारबाही कएलाक बाद एकगोटेके पायरमे गोली लागल,’ एसपी खनाल कहैत छथि,‘ओहिके बाद प्रहरी घेराबन्दी कऽ कऽ नियन्त्रणमे लेलक ।’
ओसभ रुकल होटलेसँ कियाक नियन्त्रणमे नहि लेलगेल प्रश्न जबाबमे एसपी खनाल कहलन्हि,‘ओसभ दिनेमे आबि कऽ होटलमे ठहरल सूचना हमरासभकेँ नहि भेट सकल । ओहि सूचनाक आधार पर ओकरासभकेँ पहुँचबासँ पहिने प्रहरी टोली घटनास्थल पहुँचल छल ।’ खनालक अनुसार ओसभ एहिसँ पहिने सेहो जनकपुर पहुँच कऽ ओहि होटलमे नास्ता खाना खाइत छल अनुसन्धानसँ खुजल अछि । प्रहरी होटल सञ्चालक प्रल्हाद साहसँ सेहो पुछताछ कएलक अछि । प्रहरीके अनुसार विहारकुण्डमे डकैती करए जएबासँ पहिने ओसभ ओहि क्षेत्रक बेरबेर रेकी सेहो कएने छल ।
स्थानीयके संलग्नता भऽ सकैत अछि प्रहरीके आशंका
एहि घटनामे स्थानीयके सेहो संलग्नता भऽ सकैत अछि प्रहरीके आशंका अछि । मन्दिरक महन्थलँग रहल रुपैयाँ आ गरगहनाक विषयमे ओकरासभकेँ के खबर कएलक ओहितर्फ सेहो अनुसन्धान चलि रहल एसपी खनाल बतबैत छथि । घटनामे स्थानीयके संलग्नता देखलगेल तऽ जल्दिए सार्वजनिक कएल जाएत हुनकर कहब छन्हि ।
मन्दिरलँग महन्थ जमीन बिक्रि कएने पैसा रहल सूचनाक आधार पर ओसभ डकैत करबालेल जनकपुरधरि पहुँचल बताओलगेल अछि । पकराएल व्यक्तिसभ नेपालभितर कोनो आपराधिक घटना नहि कएलाक बादो भारतक विभित्र स्थानमे लुटपाट, डांकासहितक घटनासभमे संलग्न रहल अनुसन्धानसँ खुजल खनाल बतओलन्हि ।

Read More »

पानि बिक्रीमे कडाइ

काठमाण्डु जेठ ९ गते ।पिबएबला पानिक बिक्री वितरणमे सरकार कडाई करए जा रहल अछि । बजारमे देखलगेल गुणस्तरहीन पिबएबला पानि उत्पादककेँ कारबाही करबाक हिसाबसँ सरकार विधेयक लओने अछि ।
सरकार संसदमे दर्ता करओनो पिबएबला पानि तथा सरसफाइ सम्बन्धमे व्यवस्था करबालेल बनल विधेयकमे गुणस्तरहीन पिबएबला पानिसँ अस्वस्थ्य भेला पर उत्पादकके क्षतिपूर्ति देबाक व्यवस्था कएलगेल अछि ।
विधेयकके दफा ४४ कहलगेल अछि,‘अनुमतिप्राप्त संस्था निर्धारित मापदण्डअनुसार पिबएबला पानि उपलब्ध नहि करओने प्रमाणित भेल या पिबएबला पानि उपयोग कएलासँ उपभोक्ताक स्वास्थ्यमे प्रतिकुल असर भेला पर अनुमति प्राप्त संस्थाके ओहन उपभोक्ताकेँ तयकएलगेल अनुसार क्षतिपूर्ति भराबए परत ।’
एखन पिबएबला पानिक नियमन भेलाक बादो कारबाही प्रक्रिया कमजोर अछि । एहि बातकेँ ध्यानमे रखैत सरकार विधेयक संसदमे दर्ता करओने खानेपानीमन्त्री विना मगर जानकारी देलीह अछि ।
बिना अनुमति पिबएबला पानिक सेवा, सरसफाइ सेवा, आयोजना या सेवा प्रणालीक निर्मााण या सञ्चालन कएला पर एक वर्ष कैद या एक लाख जरिवाना या दुनु सजाय भऽ सकैत अछि विधेयकमे व्यवस्था कएलगेल अछि ।

Read More »

राष्ट्रपति पहिलबेर फिर्ता कएलीह विधेयक

काठमाण्डु जेठ ९ गते ।राष्ट्रपति विद्यादेवी भण्डारी राहदानीसम्बन्धी कानुनके संशोधन तथा एकीकरण करबालेल बनल विधेयक प्रतिनिधिसभामे फिर्ता पठओलीह अछि ।राष्ट्रपति कार्यालय बुधदिन विज्ञप्ति जारी करैत ई विधेयक प्रतिनिधिसभामे पठाओलगेल जानकारी देलक अछि । विज्ञप्तिमे संविधान देने अधिकार प्रयोग करैत विधेयक पर पुनर्विचार करबालेल प्रतिनिधिसभामे फिर्ता पठाओलगेल उल्लेख अछि ।
सभामुख कृष्णबहादुर महरा प्रमाणित कऽ कऽ राष्ट्रपतिसँ प्रमाणिकरणक लेल विधेयक राष्ट्रपति कार्यालयमे पेश भेल छल ।
विधेयककेँ राष्ट्रपति अध्ययन कऽ विज्ञसभसँ परामर्श कऽ प्रक्रिया सेहो देख कऽ एहन निर्णय कएने भऽ सकैत अछि सांसद रामनारयण बिडारी बतओलन्हि । ओ कहलन्हि,‘प्राविधिक बात, विषयवस्तु, विज्ञसँगक सुझाव आ प्रक्रिया तथा संविधान अध्ययन कऽ राष्ट्रपति निर्णय लेने छथि । ओ मूलतः पुनर्विचार करबालेल कहने छथि ।’
राष्ट्रपति एहि विधेयकमे व्यवस्था कएलगेल प्रत्यायोजित व्यवस्थासम्बन्धी अधिकार, राहदानी बनएबाब प्रक्रियाकेँ विषयमे सज्ञान लेने बताओलगेल अछि । विधेयकमे प्रत्यायोजित अधिकारअन्तर्गत निर्देशिका बनाओल जाएत कहलगेल अछि । नियमावलीअनुसार निर्देशिका बनैत अछि । मुदा नियमावलीए नहि बनल अछि । मुदा विधेयक बनबो नहि कएलगेल नियमावलीमे आधारित भऽ कऽ निर्देशिका बनाओल जाएत कहने अछि ।
तहिना राहदानी नहि बनाबएलेल कोनो सरकारी कार्यालय लिख कऽ देलापर नहि देबएलेल विधेयकमे व्यवस्था कएलगेल अछि । सांसद विडारीक अनुसार हुलाक कार्यालय ककरो राहदानी नहि देबएलेल लिख देत तऽ राहदानी नहि भेटबाक व्यवस्था कएलगेल अछि । एहिकेँ खारिज करबालेल अधिकारकर्मी आ विज्ञसभक सुझाव छल ।
दोसर मुख्य विषय मुद्दा लागल व्यक्तिकेँ राहदानी जारी नहि करबाक व्यवस्था विधेयकमे कएलगेल छल । सरोकारबलासभ अदालतक आदेशअनुसार हएबाक स्थान पर मुद्दा लागल भरमे राहदानी जारी नहि करबाक व्यवस्था गलत रहल बतबैत आबि रहल छथि ।
एहि विधेयकमे प्रक्रिया सेहो मिलल बताओलगेल अछि । सांसद बिडारीक अनुसार प्रतिनिधिसभासँ राष्ट्रियसभामे गेल छल । ओतहसँ ६० दिनभितर फिर्ता नहि भेल कहैत राष्ट्रियसभा संशोधनसहित पास कएने व्यवस्था समावेश नहि कएलगेल अछि । जखन की ओहि ६० दिनमे संसद चलले नहि छल ।
राष्ट्रियसभा सदस्य बिडारी प्रक्रियाविपरित रहलाक कारण सेहो विधेयक फिर्ता आएब सही रहल बतओलन्हि । ओ आब संयुक्त सदनमे विधेयक उपर छलफल र्होत बतओलन्हि ।
राष्ट्रपति मंगलदिनमात्र राष्ट्रियसभा सदस्यद्वय रामनारयण बिडारी आ राधेश्याम अधिकारीसँ सल्लाह कएने रहथि । भेटक क्रममे राष्ट्रपति विधेयकके विषयमे सज्ञान लेने बिडारी बतओलन्हि । ओहि छलफलके बाद राष्ट्रपति ई निर्णय लेलीह अछि । देश संघीय प्रणालीमे गेलाक बाद राष्ट्रपति विधेयक फिर्ता कएने ई पहिल घटना अछि ।

Read More »

स्वर्णपदक विजेत अजित प्रदेश सरकारसँ सम्मानित

जनकपुरधाम जेठ ९ गते ।तेसर एसियाली युथ एथलेटिक्समे स्वर्णपदक जितबामे सफल अजित यादव प्रदेश सरकारसँ सम्मानित भेल छथि । गत चैतमे हङकङमे सम्पत्र एसियाली युथ एथलेटिक्समे स्वर्ण जितबामे सफल सप्तरी राजविराज–१२ क अजितकेँ बुधदिन प्रदेश २ सरकार सम्मानित कएलक अछि ।
मुख्यमन्त्री लालबाबु राउत एक समारोहकेबीच ५ लाख ११ हजारक चेक हस्तान्तरण कऽ अजितके पुरस्कृत कएलन्हि अछि । ओ तेसर युथ एथलेटिक्स च्याम्पियनसीप प्रतियोगितामे नेपाल प्रतिनिधित्व करैत स्वर्णपदक जितल रहथि ।
अजित ३ हजार मिटरके दौड ८ मिनेट ३० सेकेण्डमे पुरा करैत प्रतियोगितामे नेपालक तर्फसँ पहिलबेर स्वर्णपदक जितबामे सफल भेल रहथि ।
अजित एथलेटिक्समे स्वर्णपदक जित कऽ देश आ प्रदेशक नाम विश्वस्तरमे स्थापित कएने कहैत प्रदेश सरकार पाँच लाख नगद पुरस्कार देबाक निर्णय कएने छल । सरकारक मन्त्रिपरिषद्के बैठकक निर्णयअनुसार हुनका पुरस्कृत कएलगेल अछि ।

Read More »

‘निजामती विधेयक पारित भेलाक बाद अपन शासन’

जनकपुरधाम जेठ ९ गते ।मुख्यमन्त्री लालबाबु राउत संघीय सरकारक कारण कर्मचारीके चरम अभाव भेल आरोप लगओलन्हि अछि । कर्मचारीक अभावसँ समस्याके सामना करए परि रहल कहैत जल्दी कानुन बना कऽ अपने कर्मचारी भर्ना कएल जाएत ओ बतओलन्हि अछि ।
प्रदेशक निमाती सेवा गठन, सञ्चालनक शर्तसम्बन्धी विधेयक पर सांसदसभ उठओने प्रश्नके जबाब दैत मुख्यमन्त्री राउत विधेयक जल्दी पारित करबामे सहयोग करबालेल आग्रह कएलन्हि । ओ कहलन्हि,‘एहि विधेयकके यथाशीघ्र पारित करी, पारित भेलाक बाद हमसभ अपने कर्मचारी भर्ना कऽ सकब ।’
मुख्यमन्त्री राउत कहलन्हि,‘एखनुक सचिवसभ कखनि अबैत अछि आ जाइत अछि मालुमो नहि होइत अछि, हमसभ ई बात जोडसँ बाजए सेहो नहि सकि रहल छी ।’
विधेयक पारित भेलाक बाद केन्द्र सरकार अपन कर्मचारी फिर्ता लऽ जाइत तइयो हएतैक हुनकर कहब छलन्हि । ‘विधेयक पारित भेलाक बाद कोन सचिव आबि रहल अछि, काठमाण्डुतर्फ घुरि कऽ देखबाक दिन अन्त होएत,’ ओ कहलन्हि,‘ओहिके बाद अपन शासन, अपन प्रशासन होएत, गरीब आ सक्षम युवाके रोजगारी भेटतैक ।’
सामान्य प्रशासन मन्त्रालय समय पर कर्मचारी पठा देने रहैत तऽ एतेक जल्दी नहि करए परैत कहैत मुख्यमन्त्री राउत कहलन्हि,‘कर्मचारी नहि पठओलासँ विधेयकके जल्दी पारित करबाक विकल्प नहि अछि ।’
सांसदसभ विधेयकमे मुख्यमन्त्री स्वयं कर्मचारीक बदली, पदोन्नती करबाक व्यवस्था रखने कहैत विरोध जनओलन्हि । ‘विधेयकमे कर्मचारीके बदली, पदोन्नती मुख्यमन्त्री अन्तर्गत राखलगेल अछि,’ सत्तारुढ समाजवादी पार्टीक सांसद रामअशिष यादव कहलन्हि,‘एहिसँ मुख्यमन्त्रीजी कर्मचारीएमे ओझराएल रहताह आ अन्य काजसभ प्रभावित हएबाक अवस्था आबि सकैत अछि ।’ सांसद यादव कर्मचारी बदली, पदोन्नतीके जिम्मेवारी आन्तरिक मामिला तथा कानुन मन्त्रालयके देबाक धारणा रखलन्हि ।
नेकपाक सांसद सुन्दरबहादुर विश्वकर्मा निजामती कर्मचारीकेँ जनताक शासक नहि भऽ सेवक बनबाक हिसाबसँ विधेयक तैयार करबालेल सुझाव देलन्हि ।
विगत किछु समयसँ कर्मचारीसभ जतहसँ नियुक्ति लैत अछि, ओतहिसँ सेवानिवृत होइत आएल कहैत सांसद विश्वकर्मा एकहि स्थानमे रहबाक प्रवृत्तिके अन्त करबाक धारणा रखलन्हि ।

Read More »
1 24 25 26 27 28 114