मैथिली समाचार

आई मिनापक होरी महोत्सव

जनकपुरधाम चैत ०५ गते ।मिथिला नाट्यकला परिषद (मिनाप) आने वर्ष जँका एहु वर्ष होरी महोत्सवके आयोजना करए जा रहल अछि । एहि अवसर पर मिनाप हरेक वर्ष होरी गायन प्रतियोगिताके आयोजना कएल करैत अछि । मिथिलाक पौराणिक होरी आ लोक संस्कृतिके जीवंत रखबाक उद्देश्यसँ मिनाप होरी महोत्सव तथा होरी गायन प्रतियोगिताके आयोजना करैत आएल अछि । मिनाप मंगलदिन दुपहर १ बजेसँ जानकी मन्दिरके प्राङ्गणमे आयोजना कएने होरी गायन प्रतियोगितामे सप्तरीसँ सर्लाही धरिके होरी गायन टोली सहभागी भऽ रहल मिनाप जनओलक अछि । गायन प्रतियोगितामे उत्कृष्ट स्थान लाबएबला टोलीके मिनाप पुरस्कृत सेहो करैत आबि रहल अछि । तहिना मिनाप अन्य वर्ष जँका एहुबेर महामुर्ख सम्मेलनक आयोजना कएने अछि । बुधदिन दुपहरमे जानकी मन्दिर प्राङ्गणमे महामुर्ख सम्मेलनक आयोजना कएलगेल मिनाप जनओने अछि । एहि अवसर पर महामुर्ख सहित विभिन्न उपाधिसँ सम्मानित करबाक परम्परा रहल अछि ।

Read More »

मिथिला मध्यमा परिक्रमा आई विशौल पहुँचत

जनकपुरधाम फागुन ०५ गते ।मिथिला मध्यमा परिक्रमा आई भारतक विशौल पहुँच रहल अछि । सोमदिन भारतक सीमावर्ती क्षेत्र करुणा पहुँचल परिक्रमा आई विशौल पहुँच रहल अछि ।
धनुषाक ठेरा कचुरीसँ किशोरीजीक डोलासँग शुरु भेल मिथिला मध्यमा परिक्रमा महोत्तरी तथा भारतक विभिन्न धार्मिक स्थलीके परिक्रमा करैत बुधदिन जनकपुर पहुँचत जनाओलगेल अछि । मंगलदिन भारतक विशौलमे विश्राम कऽ कलानेश्वरमे दर्शन करैत बुधदिन परिक्रमा जनकपुर पहुँच रहल बुझबामे आएल अछि । वृहस्पतिदिन जनकपुरमे अन्तरगृह परिक्रमा घुमल जाएत वृहत्तर जनकपुर क्षेत्र विकास परिषद जनओने अछि । जनकपुर क्षेत्रमे अन्तगृह परिक्रमा घुमालक दोसर दिन होली मनएबाक परम्परा अछि ।
एहिसँ पहिने जानकी मंदिरक दर्शन करैत जनकपुरक हनुमाननगरसँ फागुन ३ गते विधिवत रुपेँ शुरु भेल परिक्रमाक तिर्थालु कल्याणेश्वर, फुलहर, मठिहानी, जलेश्वर, मडई, ध्रुवकुण्ड, कञ्चनवन, पवर्ता, धनुषाधाम, सतोखर, औरही सहितक स्थान पहुँचल छथि ।
मिथिला महात्मय अनुसार १८ अम शताब्दीसँ माध्यमा परिक्रमाके रुपमा मनाओल जा रहल एहि धार्मिक यात्राक सहभागीसभ १५ दिन रात्री भजन किर्तन कऽ १५ दिन बिताओल करैत अछि । विश्वक सभसँ लम्बा धार्मिक यात्रा कञ्चनवनके बाद धनुषाक पर्वता, धनुषाधाम, सतोखर, औरहीमे एक–एक राति विश्राम कऽ पूर्णिमासँ एकदिन पहिने जनकपुर पहुँचैत अछि । पूर्णीमाक दिन जनकपुरक अन्तगृह परिक्रमा कऽ १५ दिनक मिथिला मध्यमा परिक्रमा समापन होइत अछि ।
नेपाल भारत दुनु देशक धार्मिक साँस्कृतिक एवम पारम्परिक सदभावक प्रतिक बनल परिक्रमा यात्रामे नेपालक १२ तथा भारतक ३ स्थानमे विश्राम स्थल अछि । मिथिला महात्ममे एहि विश्राम स्थलके पौराणिक एवम धार्मिक महत्वके विषयमे अलग अलग व्यख्यान कएलगेलाक कारण भक्तजनसभमे अटुट आस्था रहल अछि । मिथिला महात्म अनुसार १८ अम शताब्दीसँ एहि धर्म यात्राकेँ माध्यमिकी परिक्रमाके रुपमे मनाओल जा रहल अछि । सभसँ लम्बा दुरीके एहि धार्मिक यात्रामे नेपालमे १०७ आ भारतमे २६ कऽ कऽ कुल १३३ किलोमिटर भूमिके पैदल यात्रा तय कएल जाति अछि । परिक्रमामे भारतक अयोध्या, मथुरा, हरिद्धार, दरभंगा, सीमाढी, बैधनाथधाम सहितक स्थानक साधुसंतसभक उल्लेख्य रुपमे सहभागीता अछि ।

Read More »

प्रदेश २ मे नयाँ उद्योगकेँ २० वर्ष कोनो कर नहि लागत

जनकपुरधाम चैत ०५ गते । प्रदेश २ सरकार प्रदेशभितर स्थापना होबएबला नयाँ उद्योगककेँ २० वर्षधरि कोनो प्रकारक कर नहि लेबाक घोषणा कएलक अछि । कृषि आ पर्यटन मुख्य आर्थिक स्रोत रहल प्रदेश २ भितर उद्योग स्थापनाके आकर्षित करबालेल प्रदेश सरकार ई निर्णय कएलक अछि ।
कार्यान्वयनमे अओलाक एक वर्षसँ अधिक समय बितगेलाक बादो लगानी नहि आबि सकलबाक बाद उद्योगमैत्री निती बनाबएतर्फ प्रदेश सरकार आगु बढल अछि । एहि नितीअनुरुप सोमदिन सम्पत्र मन्त्रिपरिषदके बैठक प्रदेशभितर नयाँ उद्योग स्थापना होबएबला उद्योगसँ कर नहि लेबाक निर्णय कएलक अछि ।
एहिके संगहि बैठक उद्योग स्थापनाके लेल प्रदेश सरकार स्वयं जग्गा उपलब्ध करएबाक निती लेलक अछि । उद्योग सञ्चालनके लेल इच्छुक उद्योगीकेँ प्रदेश सरकार बिना कोनो शुल्क लिजमे जग्गा उपलब्ध करएबाक निर्णय कएने मन्त्रिपरिषद बैठक कएने मुख्मयन्त्री तथा मन्त्रिपरिषद कार्यालय जनओलक अछि ।
तहिना उद्योग सञ्चालन करबालेल सुरक्षाक पूर्ण ग्यारेन्टी देबएलेल उद्योग सुरक्षाबल सेहो गठन करबाक निर्णय भेल अछि । प्रदेश सरकार एखन झन्झटिला रहल उद्योग दर्ता प्रक्रियाकेँ सहज बनएबाक सोच बनओलक अछि । प्रक्रियाकेँ सहज बनबैत तीन घन्टाभितर उद्योग दर्ता करबाक व्यवस्था कायम करबाक प्रदेश सरकारक निर्णय अछि । तहिना उद्योगसभकेँ सहुलियत दरमे बिजली उपलब्ध कराबएलेल प्रदेश सरकारक तर्फसँ पहल कएल जाएत मन्त्रिपरिषदके बैठक निर्णय कएलक अछि ।

Read More »

सिके घोषणा कएलन्हि पार्टीके नाम, संवैधानिक रुपेँ संघर्ष करबाक प्रतिवद्धता

जनकपुरधाम चैत ०५ गते ।स्वतन्त्रम मधेश गठबन्धनके परिवर्तन करैत सिके राउत नयाँ पार्टीके नाम ‘जनमत पार्टी’ रखलन्हि अछि । सिरहाक लहानमे दु दिन चलल राष्ट्रिय परिषद् बैठक पार्टीके नाम सार्वजनिक कएलक अछि । पार्टीक अध्यक्षमे सिके राउत छथि । तहिना नवगठित पार्टीमे ३५ गोटे केन्द्रीय समिति राखलगेल अछि ।
पार्टीक झण्डामे लाल, उज्जर आ हरियर लाइन रखबाक निर्णय परिषद्के बैठक कएलक अछि । तहिना पार्टीक चुनाव चिन्हमे ‘अष्टदल’ रखैत निर्वाचन आयोगमे दर्ता प्रक्रिया आगु बढएबाक निर्णय कएलगेल अछि । निर्वाचन आयोगमे दल दर्ता हएबाक संगहि केन्द्रीय कार्यकारिणी समितिके विस्तार कएल जाएत । केन्द्रीय समितिमे अन्य सदस्य मनोनित करबाक जिम्मेवारी सर्वसम्मतिसँ राष्ट्रिय अध्यक्षके देलगेल अछि ।
‘जनमत पार्टी’ गठन संगहि जनमत जुटाबएलेल जनता समक्ष जएबाक आ जनमतेसँ संवैधानिक रुपेँ जनताक समस्या, माँग, हकअधिकारके लेल अनवरत समर्पित रहबाक प्रतिवद्धता परिषद्के बैठक कएलक अछि ।
तहिना सरकारसँग भेल ११ सुत्रीय सहमतिके कार्यान्वयनमे लाबएलेल परिषद्के बैठक चन्दन सिंहक संयोजकत्वमे तीन सदस्यीय सहमति कायान्वयन समिति गठन कएलक अछि । समितिके स्वतन्त्र मधेश गठबन्धनक समर्थक उपर लगाओलगेल मुद्दा अविलम्ब फिर्ता तथा प्रहरी हिरासतमे मृत्यु भेल बाँके जिल्ला संयोजक राम मनोहर यादवक परिवारकेँ सरकारसँगक सहमतिअनुसार क्षतिपूर्ति तथा परिवारक एक गोटेकेँ रोजगारी उपलब्ध करएबालेल पहल करबालेल कहलगेल अछि ।
परिषद्के बैठक केन्द्रीय समितिमे कैलाश महतो (महोत्तरी), राजकुमार यादव (सिरहा) अब्दुल खान (बर्दिया), चन्दन सिंह (महोत्तरी), बबिता ईसर (सप्तरी), कौशिला महतो (झापा), परमेश्वर मुर्मु (मोरंग), सीताराम पंडित (सुनसरी), सुरेन्द्र शर्मा (सप्तरी), सतिला यादव (सिरहा), इन्द्रजीत यादव (धनुषा), संजय यादव (महोत्तरी), नरेश कुशवाहा (सर्लाही), वीरेन्द्र साह (रौतहट), दिनेश यादव (बारा), संजय साह (पर्सा), ध्रुव गौड (नवलपरासी), भोपेन्द्र यादव (रुपन्देही), हकिकुल्ला खान (कपिलवस्तु), राधा यादव (दाङ), इरफान अहमद शेष (बाँके), महेन्द्र प्रसाद चौधरी (कैलाली), दुर्गा चौहान (नवलपरासी) र आशा मेहता (सुन्सरी) के चयन कएने अछि ।
एहिसँ पहिने अलग मधेशक देशक अभियान चलबैत आबि रहल सिके राउतक स्वतन्त्रम मधेश गठबन्धन आ सरकारबीच फागुन २४ गते ११ सुत्रीय सहमति भेल छल । सहमितके दु दिनबाद जनकपुर पहुँचल राउत मौन छलथि । सरकारसँगक सहमति पश्चात पहिलबेर बैसल परिषद् बैठकके बाद आधिकारिक धारणा सार्वजनिक भेल अछि ।

Read More »

‘सरकार नहि छोडब’

विराटनगर चैत ०४ गते ।उप्रधान एवं स्वास्थ्य तथा जनसंख्यामन्त्री उपेन्द्र यादव सरकारसँ बाहर अएबाक बात सत्य नहि रहल बतओलन्हि अछि । विराटनगर विमानस्थलमे सञ्चारकर्मीसभसँ बातचित करैत मन्त्री यादव पार्टी वर्तमान सरकार छोडबाक सम्बन्धमे कोनो सोँच नहि बनओने स्पष्ट कएलन्हि अछि ।
सरकार विप्लव समूहक गतिविधि पर रोक लगा कऽ अपन कर्तव्य पुरा कएने हुनकर कहब छलन्हि । ओ कहलन्हि,‘ई काज कोनो सरकार करत । राजनीतिक गतिविधिके नाम पर आदमीक हत्या, लुटपाट आ आतंक सिर्जना कऽ जनतामे त्रास नहि फैलाओल जा सकैत अछि ।’
उपप्रधानमन्त्री यादव सिके राउतसँगक सम्झौतामे कतौह जनमतसंग्रह उल्लेख नहि रहल प्रष्ट करैत जनमतसंग्रह आ जनअभिमत फरक विषय रहल बतओलन्हि । राउतसँगक सहमति सकारात्मक कदम रहल हुनकर कहब छलन्हि ।
स्वास्थ्यमन्त्री सेहो रहल उपप्रधानमन्त्री यादव बीपी कोइराला स्वास्थ्य विज्ञान प्रतिष्ठानभितरके अनियमितताक सम्बन्धमे विगतके सरकार छानबिन कएने आ एखनुक सिनेटके प्रतिवेदनक आधार पर उपकुलपतिके बर्खास्त कएलगेल जानकारी देलन्हि ।

Read More »

चोरीमे संलग्न चारिगोटे प्रहरी नियन्त्रणमे

जनकपुरधाम चैत ४ गते ।जनकपुरक एक घरसँ चोरी कएने आरोपमे प्रहरी समानसहित चारि गोटेके नियन्त्रणमे लेलक अछि । पकराएबलामे जनकपुरधाम–८ पगलाबाबा धर्मशाला नजदिक घर रहल २३ वर्षीय सलामत दर्जी, ३५ वर्षीया नशरा खातुन, पेठिया बजारक २१ वर्षीय असरफ राईन आ वार्ड नम्बर २३ सोनामाई टोलक ३३ वर्षीय मो.कमरान दर्जी रहल प्रहरी जनओलक अछि ।
प्रहरी चारुगोटेके जनकपुरधाम–२ विद्यानगरक ब्रम्हदेव यादवक घरमे चोरी कएने आरोपमे नियन्त्रणमे लेलक अछि । गत २९ गते रातिक समय यादवक घरमे चोरी भेल छल । गोप्य सूचनाक आधार पर जिल्ला प्रहरी कार्यालय धनुषा आ प्रहरी चौकी भिठ्ठामोडक संयुक्त टोली चारु गोटेके जलेश्वर नगरपालिका–३ स्थित भारततर्फ जाएबला सडक खण्डसँ नियन्त्रणमे लेने जिल्ला प्रहरी कार्यालय धनुषाक डीएसपी रामेश्वर कार्की जानकारी देलन्हि अछि ।
ओकरासभक सँगसँ १ थान चाँदीके हसुली, चाँदीके ब्रासलेट १ थान, चाँदीके बाला १ जोड, पायल १ जोड, चाँदीके औठी १ थान, ठेसा ६ थान, राष्ट्रिय बैंकके दीर्घसेवा पदक १ थान सहितक सामान बरामद भेल कार्की जानकारी देलन्हि अछि ।
चारु गोटेके हिरासतमे राखि कऽ आवश्यक अनुसन्धान भऽ रहल प्रहरी जनओलक अछि ।

Read More »

परिक्रमाक विश्रामस्थलके अवलोकन

जनकपुरधाम चैत ०४ गते ।नेपाली कांग्रेस १५ दिनक मिथिला मध्यमा परिक्रमाक विश्रामस्थलसभक अवलोकन एवं निरीक्षण करए जा रहल अछि । कांग्रेसक जनकपुर नगरसमिति परिक्रमा पहुँचएबला नेपाल तथा भारतक सभ विश्रामस्थल पहुँच कऽ स्थलतग अवलोकन एवं निरीक्षण करबाक निर्णय कएलक अछि । कार्यक्रमक विषयमे जानकारी देबएलेल रविदिन आयोजित पत्रकार सम्मेलनमे नगरसभापति मनोज साह मंगलदिन भिन्सर ६ बजे परिक्रमाक पहिल पडाव जनकपुरक हनुमाननगरसँ मोटरसाइकलसहितके टोली प्रस्थान करत जानकारी देलन्हि ।
धार्मिक एवं सांस्कृतिक महत्वके ध्यानमे रखैत परिक्रमाक पडाबसभक स्थलगत निरीक्षण एवं अवलोकन करबालेल जनकपुरसँ युवासभक टोली प्रस्थान कऽ रहल नगरसमिति सभापति साह बतओलन्हि अछि ।
जनकपुरसँ शुरु होइत भारतक कल्याणेश्वर, फुलहर, मटिहानी, जलेश्वर, मडई, धु्रवकुण्ड, कञ्चनवन, पर्वत्ता, धनुषाधाम, सतोषर, औरही, करुणा विशौल होइत पुनः जनकपुर अएबाक कार्यक्रम रहल पत्रकार सम्मेलनमे जानकारी देलगेल अछि ।

Read More »

राजा जनकक भूमिपर पूर्वराजाक देश चिन्ता

जनकपुरधाम चैत ०४ गते ।पूर्वराजा ज्ञानेन्द्र शाह चारिदिन जनकपुर भ्रमण समाप्त कऽ रविदिन झापाक दमक पहुँचल छथि । शाह झापा जएबासँ पूर्व अपन चारिदिन जनकपुरक भ्रमण सफल रहल प्रतिक्रिया देलन्हि अछि । मुदा ओ देशक अवस्थाक विषयमे सेहो चिन्ता व्यक्त कएने छथि । पूर्वराजा शाह जनता एखनो शान्तिक अनुभूति नहि कऽ सकल कहैत चिन्ता व्यक्त कएने छथि । देशमे शान्ति कायम भेल देखए चाहि रहल अपन एकमात्र इच्छा रहल ओ बतओने छथि ।
चारिदिन जनकपुरमे रहि कऽ रविदिन सप्तरीक सखडा भगवतीमे पूजापाठ करैत ओ झापाक दमक पहुँचल छथि । पूर्वराजा शाह झापाक दमकसँ एहिबेरके मधेश भ्रमण शुरु कएने छथि । फागुन २९ गते जनकपुर पहुँचल ओ जनकपुरके केन्द्र बना कऽ पछिला तीन दिनमे मधेशक तीन जिल्ला भ्रमण कएलन्हि ।
पूर्वराजा शाह सर्लाहीक मलंगवास्थित दुर्गा मन्दिर, उदयपुरक घाइघाटस्थित राधाकृष्ण मन्दिर आ सप्तरीक सखडा भगवतीमे पूजाअर्चना कएलन्हि अछि । ओ चैत १ गते जनकपुरक जानकी मन्दिरमे पूजापाठ कएने रहथि ।
पूर्वराजा ज्ञानेन्द्रक सचिवालय एहि भ्रमणकेँ धार्मिक भ्रमण बता रहलाक बादो मधेशक राजनीति गोलचक्करमे घुमि रहल समय हुनकर एहि भ्रमणके अर्थपूर्ण रुपेँ देखलगेल अछि । हुनकर भ्रमणकेँ धार्मिक कहलगेलाक बादो भ्रमणक क्रममे नागरिकक भावना सेहो बुझलन्हि अछि । जनकपुरसहित मधेशक एहि भ्रमणके बाद पूर्वराजा ज्ञानेन्द्र उत्साहित देखलगेल हुनकर एक समर्थक बतओलन्हि । ‘जनकपुरसहित मधेशक अन्य जिल्लासभक भ्रमणके बाद ओ खुश भऽ कऽ घुरल छथि,’ ओ कहलन्हि,‘ओ उत्साहित भऽ कऽ जनकपुरसँ घुरल हमरासभकेँ बुझा रहल अछि ।’
पूर्वराजा शाह जनकपुरमे रहल समय समर्थकसभसँ सामूहिक या व्यक्तिगत भेटघाट नहि कएने बताओलगेल अछि । यद्यपि जनकपुर अएबासँ पूर्व ओ धनुषा, महोत्तरी, सर्लाही, सिरहा, सप्तरी तथा उदयपुर जिल्लाक अपन समर्थक खास व्यक्तिसभकेँ बजा कऽ झापामे भेट कएने बुझबामे आएल अछि ।
दु दिन पहिने जानकी मन्दिरमे पूजापाठ करए पहुँचल पूर्वराजा शाह सञ्चारकर्मीसभसँ बातचित करैत देशमे जनता शान्ति महसुस नहि कऽ सकल प्रतिक्रिया देने रहथि । देशमे शान्ति कायम हुए बतबैत अपन एहि भ्रमणके ओ धार्मिक भ्रमण बतओने रहथि । संगहि मधेशके मधेश नहि तराई कहबालेल आग्रह सेहो कएने रहथि ।

Read More »

सिके राउतक बैठकमे ‘जनअभिमत’ पर आइ चर्चा

जनकपुरधाम चैत ०४ गते । सिके राउत संयोजक रहल स्वतन्त्र मधेश गठबन्धनक राष्ट्रिय परिषद् बैठक रविदिनसँ सिरहाक लहानमे शुरु भेल अछि । लहानस्थित मारवारी सेवाश्रममे दु दिनधरि चलएबला बैठक राष्ट्रियगानसँ शुरु कएलगेल बताओलगेल अछि ।
बैठकके शुरुवातमे पञ्चकन्यासभ राष्ट्रियगान गओने छलथि । कडा सुरक्षाबीच जारी गोप्य बैठकमे सहभागीसभक मोबाइलफोन सेहो बैठकस्थल भितर निषेध कएलगेल अछि । बैठकस्थल नजदिक सुरक्षाव्यवस्था कडा बनाओलगेल अछि । बैठकमे सहभागी होबएबलासभकेँ नागरिकता प्रमाणपत्र देखा कऽ मात्र प्रवेश देलगेल अछि ।
रविदिनक बैठककमे सहभागीसभ सरकारसँग हालहि भेल ११ सुत्रीय सम्झौताक विषयमे स्पष्ट करबालेल संयोजक राउतसमक्ष अपन अपन धारणा रखने बताओलगेल अछि । बैठकमे सहभागीसभ अपन अपन जिज्ञासा रखबाक क्रम समाप्त भेलाक बाद राउत सोमदिनके बैठकमे जबाब देता बताओलगेल अछि । तहिना सरकारसँग भेल ११ सुत्रीय सम्झौताक दोसर बुँदामे उल्लेख कएलगेल जनअभिमत सम्बन्धमे सेहो सोमदिनके बैठकमे चर्चा होएत बुझबामे आएल अछि ।
सरकासँग ११ सुत्रीय सम्झौता कऽ मूलधारक राजनीतिमे अओलाक बाद पहिलबेर भऽ रहल बैठकमे गठबन्धनक आगामी रणनीतिक विषयमे निष्कर्ष निकालल जाएत । फागुन २४ गते सरकारसँ अचानक सम्झौता कऽ मूलधारक राजनीतिमे अवतरण कएने गठबन्धनक संयोजक सिके राउतक तर्फसँ एखनधरि कोनो आधिकारिक प्रतिक्रिया नहि आएल अछि । राउतसहित गठबन्धनआवद्ध कार्यकर्तासभ सेहो सरकारसँगक सम्झौताक बाद आगुक रणनीतिके विषयमे स्पष्ट रुपेँ नहि बाजल छथि ।
दु दिनधरि लहानमे चलएबला बैठकमे गठबन्धनक आगामी रणनीति, पार्टी दर्ता, मधेशमे उठएबला एजेन्डासहितक विषयमे छलफल होएत एक नेता जानकारी देलन्हि ।
सरकारसँ सम्झौता कऽ कऽ सिके राउत गठबन्धन आगु बढओने स्वतन्त्र मधेशक एजेन्डा त्याग कएने कहैत कतेको कार्यकर्ता असन्तुष्ट रहल बताओलगेल अछि । तहिना प्रहरी हिरासतमे निधन भेल राममनोहर यादवकेँ सेहो गठबन्धन सहिद घोषणा नहि करा सकल कहैत कार्यकर्तासभमे असन्तुष्टि देखलगेल अछि ।
बैठकमे संयोजक सिके राउत कार्यकर्तासभकेँ सरकारसँग भेल सम्झौता तथा आगामी दिनमे कोना आगु बढल जाए एहि विषयमे राणनीतिक विषय जानकारी करओताह बताओलगेल अछि ।
बैठकमे उपत्यकासहित २३ जिल्लाक दु सयसँ अधिक केन्द्रीय परिषद् सदस्यसभक उपस्थिति रहल बताओलगेल अछि । राष्ट्रिय परिषद् बैठकके बाद राउतकेँ लहान आ सप्तरीक राजविराजमे नागरिक अभिनन्दन करबाक तैयारी रहल बताओलगेल अछि ।

Read More »

निर्मला हत्या प्रकरणः डीएसपीसहित ६ प्रहरी रिहा

काठमाण्डु चैत ०१ गते । निर्मला हत्या प्रकरणमे पकराएल ६ टा प्रहरीके जिल्ला अदालत कञ्चनपुर धरौटीमे रिहा करबाक आदेश देलक अछि । निर्मला हत्या प्रकरणमे पकराएलसभकेँ यातना देने आ प्रमाण नष्ट कएने आरोपमे २२ फागुनमे तत्कालीन कञ्चनपुर प्रहरीक प्रहरी उपरीक्षक दिल्लीराज विष्टसहित ८ गोटेविरुद्ध अदालतमे मुद्दा दायर भेल छल ।
मुद्दाक सुनवाइ करैत वृहस्पतिदिन ६ गोटेके धरौटीमे रिहा करबालेल आदेश देलगेल जिल्ला अदालत कञ्चनपुरक श्रेस्तेदार हरिकृष्ण अवस्थी जानकारी देलन्हि । अवस्थीके अनुसार तत्कालीन प्रहरी नायब उपरीक्षक (डीएसपी) ज्ञानबहादुर सेठी आ प्रहरी निरीक्षक एकेन्द्र खड्काकेँ अभियुक्तकेँ यातना देने कसुरमे पाँच–पाँच लाख धरौटीमे रिहा करबाक आदेश देलगेल अछि ।
तहिना सार्वजनिक न्याय अन्तर्गत प्रहरी निरीक्षक जगदिश भट्टकेँ चारि लाख, सई हरिदेवसिंह धामीकेँ तीन लाख ५० हजार आ रामसिंह धामीके तीन लाख धरौटीमे रिहा करबाक आदेश देलगेल अछि तऽ प्रहरी जवान चाँदनी साउँदकेँ दु लाख धरौटीमे छोडबाक आदेश अदालत देलक अछि ।
सरकारी वकिल कार्यालय कञ्चनपुर निर्मलाक माय दुर्गादेवी पन्त आ दिलिपसिंह विष्टक भैया खड्ग विष्टक जाहेरीके आधार पर जिल्ला अदालतमे अलग अलग मुद्दा दायर कएने छल । सरकार निर्मला प्रकरणमे तत्कालीन एसपी दिल्लीराज विष्ट आ इन्सपेक्टर जगदिश भट्टकेँ सेवासँ बर्खास्त कऽ चुकल अछि तऽ अन्य ६ टा प्रहरी कर्मचारी निलम्बनमे अछि ।

Read More »
1 2 3 63