News

राष्ट्रपति भण्डारीद्धारा जानकी मन्दिरमे पूजाअर्चना

जनकपुरधाम वैशाख ३१ गते ।राष्ट्रपति विद्यादेवी भण्डारी जानकी नवमीक अवसर पर जनकपुरस्थित जानकी मन्दिरमे पूर्जाअर्चना कएलीह अछि । जानकी नवमीक अवसर पर आयोजित समारोहमे सहभागी होबएलेल सोमदिन भिन्सर जनकपुर पहुँचल राष्ट्रपति भण्डारी जानकी मन्दिरमे करिब १५ मिनेट पूजाअर्चना कएने छलीह ।मधेश आन्दोलन चलि रहल समय तीन वर्ष पहिने विवाहपञ्चमी महोत्सवमे सहभागी हएबाक क्रममे पैघ विरोधक सामना करए परल राष्ट्रपति भण्डारीकेँ एहिबेर जनकपुरमे भव्य स्वागत कएलगेल अछि । राष्ट्रपति भण्डारीकेँ प्रदेश प्रमुख रत्नेश्वरलाल कायस्थ आ मुख्यमन्त्री लालबाबु राउत स्वागत कएने छलथि ।
जानकी मन्दिरमे पूजापाठपश्चात आयोजित कार्यक्रममे बजैत राष्ट्रपति भण्डारी मिथिला परम्पराअनुसार मनाओल जाएबला जानकी नवमी समग्र नेपाली जनताबीच उत्साह प्रदान करत विश्वास व्यक्त कएलीह ।
मौलिक मिथिलाकला, कालिगढी आ संस्कृतिके उत्कृष्ट नमूनाके रुपमे रहल जानकी मन्दिरमे दर्शन कऽ कऽ ओ प्रसत्र भेल सेहो बतओलीह अछि । जानकी नवमी नेपालक समाजिक, सांस्कृतिक, राष्ट्रिय एकता आ राष्ट्रिय अखण्डताकेँ आओर सुदृढ करबामे सहयोग पहुँचाओत भण्डारी विश्वास व्यक्त कएलीह अछि ।
राजर्षी जनक आ महर्षी अष्टाबक्र सन विद्धान जनकपुरेसँ ज्ञानक ज्योति आ सहिष्णुताक सन्देश फैलओने प्रसंग उल्लेख करैत राष्ट्रपति भण्डारी एकर महत्व दीर्घकालधरि रहत बतओलीह अछि ।
प्राचिनकालसँ शिक्षाक क्षेत्रमे अग्रणी रहल एहि क्षेत्रमे सामाजिक विकृति आ विभेद विद्यमान रहल दुःखद रहल बतबैत भण्डारी एहिकेँ अन्त करबालेल सभकेँ क्रियाशील हएबा पर जोड देलीह अछि । भण्डारी प्रदेश सरकारद्धारा सञ्चालन कएलगेल ‘बेटी पढाउ बेटी बचाउ’ कार्यक्रमकेँ प्रशंसा कएलीह ।
कृषिके लेल उर्वर भूमि मानलगेल एहि क्षेत्रमे कृषि उत्पादन आ उत्पादकत्वमे कमी आएब चिन्ताके विषय रहल कहैत ओ कृषिके आधुनिकीकरण आ व्यवसायीकरण पर जोड देलहि अछि ।
राष्ट्रपति भण्डारी एहिसँ पहिने मधेश आन्दोलन चलि रहल समय विवाहपञ्चमी महोत्सवमे सहभागी होबए तीन वर्ष पहिने जनकपुर आएल रहथि । पछिलाबेर जनकपुर आएल समय हुनका पैघ विरोधक सामना करए परल रहन्हि । राष्ट्रपतिक विरोधमे उतरल किछु आन्दोलनकारी जानकी मन्दिरक गर्वगृहमे तोडफोड सेहो कएने छल ।

Read More »

‘मिडिया काउन्सिल विधेय पत्रकारविरुद्ध ‘कू’ प्रयास’

काठमाण्डु वैशाख ३० गते ।प्रमुख प्रतिपक्षी दल नेपाली कांग्रेसक सभापति शेरबहादुर देउवा सरकार मिडिया काउन्सिल विधेयक लाबि कऽ पत्रकारके लेल कू करबाक प्रयास कएने दावा कएलन्हि अछि ।
रविदिन पार्टी केन्द्रीय कार्यालयमे आयोजित पत्रकार सम्मेलनमे सभापति देउवा स्वतन्त्र पत्रकारिता आ अभिव्यक्ति स्वतन्त्रता उपरके हस्तक्षेप स्वीकार्य नहि होएत बतओलन्हि ।
ओ कहलन्हि,‘पाँचटा ‘फन्डामेन्टल राइट’ मे सँ लिबर्टी पहिल राइट अछि । स्वतन्त्रता उपरके हस्तक्षेप स्वीकार्य नहि होएत । स्वतन्त्रता हमरासभक सिद्धान्त अछि, आदर्श अछि । एहिके लेल पार्लियामेन्टभितर आ बाहर देशभरि आन्दोलन होएत ।’
सभापति देउवा मिडियाबिनाके प्रजातन्त्र कल्पना सेहो नहि कएल जा सकैत अछि उल्लेख कएलन्हि । ओ कहलन्हि,‘पञ्चायतमे ई अधिकार नहि छल । एहिके लेल नेपाली जनता लडाइ कएलक, आब फेर लडत । आहाँसभ कहब तऽ आओर समर्थन करब । आहाँसभकेँ जरुरी परल समय हमरासभक समर्थन अछि ।’
तहिना ‘जय नेपाल’ शब्दक अपव्याख्याक विषयमे पुछलगेल प्रश्नक जबाबमे देउवा नेपालक जय नहि कहि कऽ भारत अथवा चीनके जय कहब कहेत प्रतिप्रश्न कएने छलथि । ओ कहलन्हि,‘ओहन पागल बातके कोनो जबाब नहि रहैत अछि ।’
पत्रकार सम्मेलनमे प्रमुख सचेतक बालकृष्ण खाँण विधेयक संविधान प्रतिकूल रहल बतओलन्हि । संविधान प्रतिकूल विधेयक आगु नहि बढए देबाक ओ चेतावनी देलन्हि ।
तहिना सहमहामन्त्री प्रकाशशरण महत स्वतन्त्र रुपेँ पत्रकारिता करबाक अधिकारकेँ कुन्ठित करएबला विधेयकमे सहमति नहि भऽ सकत बतओलन्हि ।
प्रवक्ता विश्वप्रकाश शर्मा प्रेसकेँ नियन्त्रण कऽ कऽ केहन लोकतान्त्रिक व्यवस्थामे सरकार जाए चाहि रहल कहैत प्रश्न कएने छलथि ।ओ कहलन्हि,‘स्वतन्त्र पत्रकारिताक हकअधिकार नेपाली प्रेस जगत ककरो कृपासँ नहि एहिके लेल पत्रकार लडल अछि । संघर्ष कएने अछि आ खुन बहओने अछि । कम्युनिस्ट कृपासँ नहि देने अछि ।’

Read More »

‘पागल कुकुर पानिसँ आ पागल सरकार प्रेससँ डराइत अछि’

काठमाण्डु वैशाख ३० गते ।सरकार संसदमे दर्ता कएने मिडिया काउन्सिल विधेयकके पत्रकारसभ विरोध कएलक अछि । नेपाल पत्रकार महासंघ सरकारक ओहि कदमके विरोध करैत आन्दोलन आ संघर्षक कार्यक्रम तैयार कएने महासंघक प्रतिनिधिसभ बतओलन्हि अछि ।
तहिना विभित्र पत्रकरा संघ आ स्वतन्त्र पत्रकार सेहो सञ्चार तथा सूचना प्रविधि मन्त्री गोकुल बाँस्कोटा स्वतन्त्र प्रेसकेँ नियमन करबालेल संसदमे दर्ता करओने मिडिया काउन्सिल विधेयकके कडा आलोचना कएलक अछि ।
महासंघक महासचिव रमेश विष्ट एखनुक सरकार पत्रकार आ सम्पूर्ण पत्रकारिता जगतप्रति एखनिधरिके असहिष्णु रहल टिप्पणी कएलन्हि अछि ।
नेपाल पत्रकार मञ्च काठमाण्डुमे आयोजना कएने एक कार्यक्रममे महासचिव विष्ट ई बात बतओलन्हि अछि । ‘समाचार लिखलाक कारण पत्रकारकेँ जेल जाए परए, १० लाखधरि जरिवाना तिरए परए एहन प्रावधान स्वतन्त्र प्रेसविरुद्ध अछि,’ विष्ट कहलन्हि,‘सरकारक जेबसँ निर्णय कऽ गठन होबए जा रहल मिडिया काउन्सिल पत्रकारसभकेँ हत्यासँ अधिक सजाय होबएबला व्यवस्था पाइपलाइनमे रखने अछि ।’
महासचिव विष्ट ई विधेयक प्रेस काउन्सिलके स्वायत्तता उपर सोझे हस्तक्षेप कएने सेहो बतओलन्हि । ‘पत्रकारक घेँट दबाबएबला ई कानुन आनलगेल तऽ हमसभ अभिव्यक्ति स्वतन्त्रता आ प्रेस स्वतन्त्रताके लेल अन्तर्राष्ट्रिय समुदायकेँ बजा कऽ एहि विषयकेँ अन्तर्राष्ट्रियकरण करब,’ विष्ट कहलन्हि ।
तहिना मञ्चके अध्यक्ष युवराज विद्रोही सरकार पागल भऽ कऽ प्रेस उपर नियन्त्रण करए चाहि रहल बतओलन्हि । ‘कुकुर पागल होइत अछि तऽ पानिसँ डराइत अछि, सरकार पागल होइत अछि तऽ प्रेससँ,’ ओ कहलन्हि,‘ई सरकार प्रेसप्रूति शाही शासनसँ अधिक कठोर आ निरंकुश बनल अछि । सरकार मिडिया काउन्सिल विधेयक दर्ता करा कऽ पत्रकारकेँ समाचार लिखबा पर बन्दहेज लगएबाक गलत प्रयास कएने अछि ।’

Read More »

उपमहानगरक सफाइ कर्मचारीद्धारा धर्ना

जनकपुरधाम वैशाख ३० गते ।जनकपुरधाम उपमहानगरपालिकाक कर्मचारीसभ हड्तालमे उतरलाक बाद जनप्रतिपनिधिसभ अपने सरसफाइमे जुटल छथि । बाँकी रहल पछिला चारि महिनाक तलब भुक्तानी करबाक माँग करैत सफाई कर्मचारीसभ उपमहानगरपालिकाक गेटके आगु धर्ना पर बैसल छल ।
जानकी नवमीक पूर्वसन्ध्यामे सफाइ कर्मचारीसभ आन्दोलनमे उतरलाक बाद जनप्रतिनिधिसभ अपने सरसफाइमे जुटल छलथि । मेस्तर, कुचिकारसहितक सफाई कर्मचारीसभ हड्तालमे उतलरालक बाद जनकपुरधाम उपमहानगरपालिका वार्ड नम्बर १० क जनप्रतिनिधिसभ रविदिन जानकी मन्दिर अगलबगल क्षेत्रमे सरसफाइ कएने छलथि ।
बाँकीबक्यौता भुक्तानीके माँग करैत सफाइ कर्मचारीसभ हड्तालमे उतरलाक बाद बाध्य भऽ कऽ सरसफाइमे जुटए परल वार्ड नम्बर १० क वार्डअध्यक्ष मिथिलेश कर्ण बतओलन्हि ।
‘काल्हि जानकी नवमी मनाओल जा रहल अछि, सयौंके संख्यामे श्रद्धालुसभ जानकी मन्दिर अओताह,’ कर्ण कहलन्हि,‘जानकी मन्दिर आबएबला श्रद्धालुके ध्यानमे रखैत सरसफाई कएलगेल अछि ।’ वार्डमे निर्वाचित सदस्यसभक सहयोगमे जानकी मन्दिर अगलबगल क्षेत्रमे सरसफाइ कएलगेल ओ बतओलन्हि ।
उपमहानगरपालिका कार्यालयमे ज्यालादारीमे कार्यरत सफाई कर्मचारीसभ चारि महिनाक बाँकी रहल तलब भुक्तानी करबाक माँग करैत रविदिन दोसरबेर धर्नामे बैसल छलथि । बाँकी रहल तलब उपलब्ध करएबाक माँग करैत एहिसँ पहिने सेहो सफाइ कर्मचारीसभ आन्दोलन कएने छल । तलब भुक्तानी करबालेल उपमहानगरपालिका सहमति कएलाक बादो सहमति कार्यान्वयन नहि कऽ रहल हुनकासभक कहब अछि ।
एम्हर उपमहानगरपालिकाक जानकी नवमी रहल आ राष्ट्रपति सेहो आबि रहलाक कारण सहयोग करबाक आग्रह कएलाक बाद धर्नामे बैसल सफाई कर्मचारीसभ हड्ताल स्थगित कएने बताओलगेल अछि । नगर प्रमुख लालकिशोर साह दु दिनभितर तलबसम्बन्धी समस्या समाधान करबाक आश्वासन देने हुनकासभक कहब अछि ।
संघीय सरकार माघ ९ गतेसँ दैनिक ज्यालादारी कर्मचारी हटएबालेल पत्राचार कएलाक बाद एहि प्रकारक समस्या उत्पत्र भेल उपमेयर रीता मिश्र बतओलीह अछि । उपमहानगरपालिका आन्दोलनरत कर्मचारीसभक तलबसम्बन्धी समस्या समाधान करबालेल पहल भऽ रहल ओ जानकारी देलीह ।

Read More »

प्रदेश २ मे सार्वजनिक छुट्टी

जनकपुरधाम वैशाख ३० गते ।जगत जननी जानकीक जन्मोत्सव जानकी नवमीके अवसर पर सोमदिन प्रदेश २ मे सार्वजनिक छुट्टी देबाक निर्णय कएलगेल अछि । नेपाल सरकार गत वर्षसँ एहि अवसर पर सार्वजनिक छुट्टीके शुरुवात कएने छल । जानकी नवमीके अवसर पर प्रदेशमे सार्वजनिक छुट्टी देबाक निर्णय कएलगेल प्रदेश २ क आन्तरिक मामिला तथा कानुन मन्त्री ज्ञानेन्द्र यादव जानकारी देलन्हि अछि । एहिबीच जानकी जन्मोत्सवके देखैत नीजि विद्यालयसभक संगठन एन प्याबसन सेहो विद्यालयसभ बन्द करबाक निर्णय कएने धनुषा अध्यक्ष चन्द्र नारायण मण्डल जानकारी देलन्हि अछि । वैशाख शुक्ल नवमीके दिन जानकीक जन्म त्रेता युगमे राजा जनकक नन्दनीके रुपमे भेल छल जनविश्वास अछि ।
एम्हर जानकी जन्मोत्सवके देखैत जानकी मन्दिरके आयोजनमे विभिन्न धार्मिक कार्यक्रमसभक आयोजना कएलगेल अछि । जानकी मन्दिरक छोटे महन्थ रामरोशन दासक अनुसार जानकी नवमीके अवसर पर श्रीराम कथा, नवाह परायण पाठ, बधाई मंगल गान, रामायण मेला, रामायणसभा सहितक कार्यक्रमके आयोजना कएलगेल अछि ।

Read More »

राष्ट्रिय विभूति ‘सीताक’ जन्मदिनके कियाक नहि भेट सकल राष्ट्रिय मान्यता ?

जनकपुरधाम वैशाख ३० गते ।भगवान सीताकेँ सरकार राष्ट्रिय विभूतिके सूचीमे रखने अछि । नेपालके विश्वके मानचित्रमे परिचित कराबएबला व्यक्तित्वसभक सूचीमे सीताकेँ सेहो सरकार सामेल कएने अछि । सीताक संगहि हुनक पिता राजा जनक सेहो राष्ट्रिय विभूतिक सूचीमे छथि ।
पौराणिक ग्रन्थसभक अनुसार त्रेतायुगमे राजा जनक स्वयं हर चला कऽ खेत जोति रहल समय जमीनक निचासँ सीताक जन्म भेल छल । वैशाख शुक्ल नवमीके दिन जनकपुरमे सीताक जन्म भेल पौराणिक मान्यता कायम अछि । सीताक जन्म भेल दिनकेँ जानकी नवमी सेहो कहल जाइत अछि ।
एहि वर्ष वैशाख शुक्ल नवमी सोमदिन मनाओल जा रहल अछि । आ, जनकपुरमे जानकी नवमी उल्लासपूर्वक मनाओल जा रहल अछि । जानकी नवमीक अवसर पर जानकी मन्दिर एक सप्ताह पहिनेसँ विभित्र धार्मिक कार्यक्रमसभक आयोजना करैत आबि रहल अछि ।
सीता राष्ट्रिय विभूति रहलाक बादो हुनकर जन्मदिन अर्थात जानकी नवमी राष्ट्रियस्वरुप ग्रहण नहि कऽ सकल अछि । राष्ट्रक गहना रहल सीताक जन्मदिनक अवसर जनकपुरधरिमात्र सीमित रहिगेल अछि । अन्य धार्मिक उत्सवजँका जानकी नवमीके सेहो राष्ट्रिय मान्यता देबएलेल बेरबेर आवाज सेहो उठैत आबि रहल अछि । दु वर्ष पहिने कांग्रेसक उपसभापति विमलेन्द्र निधि गृहमन्त्री रहल समय पहिलबेर जानकी नवमीके अवसर पर धनुषा आ महोत्तरीमे सार्वजनिक छुट्टी देबाक निर्णय कएलगेल छल । पछिला वर्षसँ प्रदेश सरकार जानकी नवमीके अवसर पर प्रदेश २ मे सार्वजनिक छुट्टी देबाक निर्णय कएने अछि ।
राष्ट्रिय विभूति रहलाक बादो सीताक जन्मोत्सव राष्ट्रियस्वरुप ग्रहण नहि कऽ सकब दुखद रहल बतबैत छथि जानकी मन्दिरक उत्तराधिकारी महन्थ रामरोशन दास ।
‘सीताकेँ राष्ट्रिय विभूति कहलगेल अछि, मुदा हुनके जन्मदिनमे मनाओल जाएबला जानकी नवमीके राष्ट्रिय मान्यता नहि भेटसकब दुखद रहल हमरा बुभि परैत अछि,’ दास कहलन्हि,‘राष्ट्रव्यापी रुपेँ जानकी नवमी मनएबालेल सरकारी पहलके आवश्यक्ता अछि ।’
महन्थ दास जानकी नवमीकेँ राष्ट्रियस्वरुप दिआबएलेल एहि वर्ष राष्ट्रपति विद्यादेवी भण्डारीके आमन्त्रण कएलगेल बतओलन्हि । ‘अयोध्यासँ जुडल रामनवमी उत्सव देशव्यापी मनाओल जाइत अछि मुदा जानकी नवमी राष्ट्रिय मान्यता नहि पाबि सकि रहल अछि,’ ओ कहैत छथि,‘जानकी नवमीके सेहो राष्ट्रिय मान्यता दिआबएलेल अपन तर्फसँ हरसम्भव प्रयास करैत आबि रहल छी ।’
जानकी नवमीकेँ राष्ट्रियस्वरुप दिआबएलेल कमसँकम सरकारके सार्वजनिक छुट्टीके व्यवस्था करबाक चाही प्राध्यापक डा.सुरेन्द्र लाभ बतबैत छथि । ‘एकतर्फ राष्ट्रिय विभूतिके सूचीमे राखब आ दोसरतर्फ छुट्टी सेहो नहि दऽ सकब नाम भजाबएलेलमात्र राष्ट्रिय विभूति घोषणा कएलगेल महसुस होइत अछि,’ लाभ कहलन्हि,‘अन्य अवसरसभमे छुट्टी दऽ कऽ प्रतिक बनएबाक काज होइत आएल अछि तऽ जानकी नवमीक विषयमे सेहो सरकारकेँ पुनरावलोकन करब जरुरी अछि ।’
राष्ट्रिय विभूति भगवान वुद्धक जन्मजयन्ति मनएबालेल सरकारक तर्फसँ भऽ रहल पहलजँका जानकी नवमीमे सेहो सरकारी प्रयास आवश्यक रहल बतबैत प्राध्यापक लाभ कहलन्हि,‘सीता हिन्दुसभक आस्थाक केन्द्र छथि । वुद्ध जयन्ती राष्ट्रसँ मान्यताप्राप्त भेल आ जानकी नवमीके मान्यता नहि भेट सकल सर्वसाधारण महसुस कएने अछि । सरकारकेँ ओहितर्फ ध्यान देबाक आवश्यक्ता अछि ।’
जानकी नवमीके सन्दर्भमे सरकारक भाषण आ आचरणमे भित्रता रहल प्राध्यापक भोगेन्द्र झा टिप्पणी करैत एहि प्रकारक भित्रता नहि रहबाक चाही बतओलन्हि । ‘सीताकेँ राष्ट्रिय विभूतिके रुपमे भजाएब मुदा विभूति जँका मान्यता नहि देब केन्द्र सरकारक विभेदपूर्ण मानसिकताक प्रतिक हम बुझि रहल छी,’ प्राध्यापक झा बतओलन्हि ।
छुट्टी देब पैघ विषय नहि रहल कहैत झा कहलन्हि,‘जानकी नवमीमे छुट्टीए देब जरुरी नहि छैक । मुदा, सरकारक तर्फसँ विश्वव्यापीकरणक आवश्यक्ता अछि । एहिसँ कोनो व्यक्ति, कोनो समुदायके लाभ नहि भऽ समग्र राष्ट्रकेँ लाभ हएतैक । अपनत्वक भावनाक विकास हएतैक, राष्ट्रियता मजबुत हएतैक । सीता राष्ट्रक गौरव रहल देखाबएलेल सेहो जानकी नवमीके वैश्विकरण करबातर्फ पहलके आवश्यक्ता अछि ।’
राष्ट्रिय मान्यताके लेल जानकी नवमीक अवसर पर कमसँकम सार्वजनिक छुट्टीके घोषणा करबालेल संघीय सरकारकेँ पत्राचार कएलाक बादो कार्यान्वयन नहि कएने प्रदेश २ क आन्तरिक मामिला तथा कानूनमन्त्री ज्ञानेन्द्र यादव बतओलन्हि । ‘प्रदेश सरकार जानकी नवमीमे सार्वजनिक छुट्टी देबाक निर्णय कऽ चुकल अछि,’ मन्त्री यादव कहलन्हि,‘मुदा जानकी नवमी प्रदेशधरि मात्र सीमित नहि रहि कऽ देशव्यापी रुपेँ मनाओल जाए हमरासभक मान्यता अछि । ओहिअनुसार सार्वजनिक छुट्टीके व्यवस्था करबालेल ध्यानाकर्षण करबैत संघीय सरकारकेँ पत्राचार कएने रहौं । मुदा छुट्टी नहि देलगेल अछि ।’
यद्यपि एहि वर्ष जनकपुरसँ बाहर काठमाण्डु, विराटनगर, रौतहटसहितक स्थानमे सेहो जानकी नवमी विभित्र कार्यक्रमसभक आयोजना कऽ मनाओल जा रहल अछि । रौतहटमे जानकी नवमीक अवसर पर आयोजन कएलगेल कार्यक्रममे सहभागी होबएलेल उपराष्ट्रपति नन्दकिशोर पुन पहुँच रहल जनाओलगेल अछि ।

Read More »

आई जानकी नवमी उल्लासपूर्वक मनाओल जा रहल

जनकपुरधाम वैशाख ३० गते ।पौराणिक कालमे नन्दनी जानकीक जन्म दिनक स्मरणमे आई जानकी नवमी हर्षोल्लास एवम श्रद्धापूर्वक मनाओल जा रहल अछि । जानकी नवमीके अवसर पर जनकपुरक विश्वप्रसिद्ध जानकी मन्दिरमे विशेष पूजा आरधाना सहित विभिन्न कार्यक्रमके आयोजना कएलगेल अछि । वैशाख शुक्ल नवमीके दिन सीताके जन्म त्रेता युगमे राजा जनकक नन्दनीके रुपमे भेल छल । जानकी नवमी आई रहलाक बादो जानकी मन्दिर एक सप्ताह पहिनेसँ विभिन्न प्रकारक धार्मिक कार्यक्रमके आयोजना करैत आबि रहल अछि । जानकी मन्दिर प्रत्येक दिन नवाह परायण संगीतमय पाठ सहितकके आयोजना कएने अछि । जानकी नवमीके भव्यता देबाक प्रयास स्वरुप आई दुधमती स्थित जानकी घाट पर सामूहिक स्नान, आरती सहितक कार्यक्रमके आयोजना कएलगेल अछि । तहिना जानकी मन्दिरक प्राङणमे प्रवचन, सहितक कार्यक्रमके आयोजना कएलगेल अछि । जानकी नवमीमे सहभागी होबएलेल भारतक विभिन्न स्थानसँ साधु सन्त जनकपुर आएल छथि । जानकी नवमीमे सहभागी होबएलेल एहि वर्ष भारतक विभिन्न पीठसभसँ पाँचसयसँ अधिक सँख्यामे भारतक साधुसन्त आएल जानकी मन्दिर जनओलक अछि । जानकी नवमीके अवसर पर जानकी मन्दिरके भव्य रुपेँ सजाओलगेल अछि । विभिन्न प्रकारक आधुनिक बल्बसभ जडान कऽ मन्दिरके सजाओलगेल अछि । जानकी नवमीक अवसर पर जानकी मन्दिरमे दर्शन करबालेल नेपाल तथा भारतक विभिन्न स्थानसँ श्रद्धालुसभ जनकपुर आएल करैत छथि ।
राष्ट्रपति भण्डारी जनकपुर आबि रहल
जानकी नवमी महोत्सवमे सहभागी होबएलेल राष्ट्रपति विद्यादेवी भण्डारी आई जनकपुर पहुँचल रहल छथि । भिन्सर ९ बजे जनकपुर पहुँचबाक कार्यक्रम रहल भण्डारीकेँ जानकी मन्दिरमे पूजाअर्चना करबाक कार्यक्रम रहल जनाओलगेल अछि । पूजाअर्चनापश्चात जानकी मन्दिर प्राङ्गणमे आयोजना होबएबला जानकी नवमी महोत्सव कार्यक्रमके उद्घाटन करबाक सेहो हुनकर कार्यक्रम छन्हि । एहिबीच जानकी नवमीक अवसर पर राष्ट्रपतिके अएबाक कार्यक्रम तय भेलाक बाद सुरक्षा अधिकारीसभ जानकी मन्दिर आ ओहि क्षेत्रक निरीक्षण कएलन्हि अछि । जानकी मन्दिर आ अगलबगल क्षेत्रमे सुरक्षा प्रबन्ध मिलएबाक दृष्टिकोणसँ निरीक्षण कएलगेल छल ।

Read More »

आरजे हंट सीजन थ्रीके आयोजना

एजेन्सी, दरभंगा | आरजे हंट सीजन थ्रीके विजेता पूजाके घोषणा कएलगेल अछि । तहिना प्रतियोगिताक पहिल रनरके उपाधि निशा एवं दोसर रनरअपके उपाधि मुस्कानके देलगेल अछि ।
प्रतियोगिताक सेल्पी स्टारक विजेता मधुश्री आ शिवानी सिन्हाकेँ संयुक्त रुपसँ घोषणा कएलगेल अछि । तहिना पहिल रनर मृत्युंजय कुमार झा आ दोसर रनके उपाधि अंकिता श्रीवास्तवके दोलगेल अछि । प्रतियोगिताक सभ विजेताकेँ पुरस्कृत कएलगेल अछि ।
शनिदिन रामबागस्थित गंगा रेजीडेंसीमे द वेद्धारा आयोजित आरजे हंट कार्यक्रमके उद्घाटन करैत दरभंगाक मेयर वैजयंती देवी खेरिया एहि प्रकारक प्रतियोगितासँ भित्री प्रतिभा बाहर आएल करैत अछि बतओने छलीह ।अपन प्रतिभा पहिचान कऽ आगु बढबा पर ओ जोड देलीह ।
द वेक प्रमुख आशिष सिंह मिथिला क्षेत्रक आदमीके सार्वजनिक कार्यक्रममे बाजएमे होइत आएल झिझकके अन्त करबाक उद्देश्यसँ विगत दु वर्षसँ आरजे हंटके नामसँ कार्यक्रमके आयोजना होइत आएल जानकारी देलन्हि ।
कार्यक्रमके ग्रान्ड फिनालेसँ पहिने विभित्र कलेजमे औडिशन लेलगेल छल । औडिसनमे सयकडो छात्रछात्रा भाग लेने छल । जनकपुुरक रेडियो मिथिलाक स्टेशन म्यानेजर राकेश सिंह, सुष्मिता झा आ आकाश आनन्द निर्णायकके भूमिकामे छलथि ।

Read More »

वार्षिकोत्वसके अवसर पर डस्टबीनक व्यवस्था

जनकपुरधाम वैशाख २९ गते ।प्रिमियर इनस्योरेन्स कम्पनी अपन २६ अम वार्षिकोत्सवके अवसर पर जनकपुरक विभित्र स्थान पर डस्टबिनक व्यवस्था कएलक अछि । स्वच्छ जनकपुर बनएबाक अभियानमे सहयोग पहुँचएबाक उद्देश्यके साथ प्रिमियर इनस्योरेन्स कम्पनिक जनकपुर शाखा अधिक भीडभाड रहएबला स्थान पर डस्टबीनक व्यवस्था कएने अछि ।
शाखाक प्रबन्धक राहुल कर्णक अनुसार २६ आ वार्षिकोत्वसके अवसर पर जनकपुरक जानकी मन्दिर, स्वर्गद्धारी, गंगा आरती स्थल, अञ्चल अस्पताल, मुरली चौकसहितक स्थान पर शाखाक तर्फसँ डस्टबिन राखलगेल अछि । व्यवसायके संगहि समाजप्रतिके दायित्व महसुस करैत वार्षिकोत्सवके अवसर पर ई काज कएलगेल कर्ण बतओलन्हि ।
ननलाइफ बीमाक क्षेत्रमे सफलतापूर्वक सेवा प्रदान करैत आबि रहल प्रिमियर इन्सयोरेन्स कम्पनी जनकपुरक संगहि लहान, बर्दिवास, राजविराजसहितक शाखामे विभित्र गतिविधि कऽ वार्षिकोत्सव मनओने अछि ।

Read More »

याक एण्ड यति होटलमे प्रहरीके छापा

काठमाण्डु वैशाख २९ गते ।प्रहरी काठमाण्डुक दरबारमार्गस्थित याक एण्ड यति होटलमे छापा मारलक अछि । अवैध नेटवर्किङ बिजनेसमे संलग्न गिरोह रहल सूचना भेटलाक बाद प्रहरी होटलमे छापामारी कएने छल ।
होटलमे अवैध नेटवर्किङ बिजनेसमे संलग्न १२ टा भारतीय नागरिकके नियन्त्रणमे लेलगेल प्रहरी जनओलक अछि । एहि विषयमे विस्तृत अनुसन्धान शुरु कएलगेल काठमाण्डु महानगरीय प्रहरी परिसरके प्रमुख उत्तम सुवेदी जानकारी देलन्हि ।
सुवेदीके अनुसार अवैध नेटवर्किङ बिजनेसमे एकटा संगठित गिरोह संलग्न देखलगेल अछि । ई गिरोह याक एण्ड यति सहित विभित्र स्थानके माध्यम बना कऽ धन्धा सञ्चालन कएने खुलासा भेल अछि । एकर अनुसन्धानमे नेपाल प्रहरी, राष्ट्रिय अनुसन्धान विभाग आ राजश्व अनुसन्धान विभाग जुटल अछि ।

Read More »