News

भारत सोमदिन चन्द्रयान प्रक्षेपण कऽ रहल

एजेन्सी, श्रीहरिकोटा साउन ३ गते ।भारत आगामी सोमदिन चन्द्रयान प्रक्षेपणक मिति घोषणा कएलक अछि । गत साता प्रक्षेपणक पूर्वसन्ध्यामे इन्धन चुलाक कारण अन्तिम समयमे चन्द्रयानक प्रक्षेपण स्थगित कएलगेल छल ।
भारतीय अन्तरिक्ष अनुसन्धान संस्था (इसरो) आगामी सोमदिन अपरान्ह २ बाजि कऽ ४३ मिनेटमे चन्द्रयान–२ के प्रक्षेपण करबाक घोषणा कएलक अछि ।
भारत चन्द्रमामे भूउपग्रह अवतरण करएबाक महत्वाकांक्षी अभियान सफल बनएबाक किछु वर्षसँ प्रयास कऽ रहल छल । रुस, संयुक्तराज्य अमेरिका आ चीन ई सफलता प्राप्त कऽ चुकल अछि ।
भारत एहि परियोजनामे करिब १४ करोड अमेरिकी डलर खर्च कएने अछि । अन्तरिक्ष विज्ञानक क्षेत्रमे ई सभसँ सस्ता अभियान मानलगेल अछि ।
संयुक्त राज्य अमेरिका एहि अभियानके लेल करिब २५ अर्ब डलर अर्थात एखुनक मूल्यअनुसार सय अर्बसँ अधिक खर्च कएने छल । अमेरिका सन् १९६० आ ७० के दशकमे चन्द्रमाके लेल १५ टा अपोलो अभियान सञ्चालन कएने छल ।
आन्ध्रप्रदेशक श्रीहरिकोटासँ ई यान प्रक्षेपणके लेल तैयार कएलगेल इसरो जनओलक अछि ।

Read More »

पाकिस्तानक पूर्वप्रधानमन्त्री अब्बासी गिरफ्तार

एजेन्सी, पाकिस्तान साउन ३ गते ।पाकिस्तानक पूर्वप्रधानमन्त्री शाहीद खकान अब्बासी गिरफ्तार भेल अछि । ओतुका ‘नेशनल एकाउन्टिबिलिटी ब्युरो’ अर्थात एनएबी खब्बासीकेँ गिरफ्तार कएलक अछि ।
अब्बासीउपर प्राकृतिक ग्यास एलएनजीके आयातके लेल ठेक्का देबाक क्रममे सयौैं अर्ब रुपैयाँ घोटाला कएने आरोप अछि । पाकिस्तानक समाचार च्यानल डन न्युज टिभीके अनुसार अब्बासी प्रेस सम्मेलन करबाक तैयारीमे रहल समय गिरफ्तारीमे परल छथि । अब्बासीके संगहि पीएमएल–एनके नेता अहसान इकाबाल सेहो पत्रकार सम्मेलन कार्यक्रममे छलथि ।
पाकिस्तानक पूर्व राष्ट्रपति आसिफ अली जरदारी आ पूर्वप्रधानमन्त्री नवाज शरीफ सेहो भ्रष्टाचारक आरोपमे जेलमे छथि ।

Read More »

चोर रास्तासँ सम्बन्धन

काठमाण्डु साउन ३ गते ।शिक्षा, विज्ञान तथा प्रविधिमन्त्री गिरिराजमणि पोखरेलक विशेष जोडपर प्राविधिक शिक्षा तथा व्यवसायिक तालिम परिषद् (सीटीईभीटी) चोर रास्तासँ किछु संस्थाके सम्बन्धन देलक अछि ।
गत शनिदिन स्वयं अध्यक्ष रहल सीटीईभीटी परिषद्के बैठकमे ओहि संस्थासभकेँ सम्बन्धन दिएबाक निर्णय करा कऽ मन्त्री पोखरेल युनेस्केकोक कार्यक्रममे सहभागी होबए अमेरिका गेल छथि । सामान्यतः शनिदिन परिषद्के बैठक नहि होइत अछि । मुदा ओ प्राविधिक शिक्षासँ सरोकार राखएबला शिक्षा मन्त्रालय तथा सीटीईभीटीक महाशाखा प्रमुखकके सेहो सूचना नहि दऽ बैठक बजा कऽ सम्बन्धन देलन्हि अछि ।
सम्बन्धन देने आ नयाँ सञ्चालनक अनुमति पओने संस्थाक नाम परिषद् गोप्य रखने अछि । स्रोतक अनुसार पोखरेल अपने कार्यकर्ता पोसबाक हिसाबसँ सम्बन्धन देने छथि । नेकपाक दिवंगत नेता नरबहादुर कर्माचार्य, योगी नरहरिनाथ आ गोरखाक दोसर एक प्रतिष्ठानकेँ कार्यक्रम सञ्चालनक स्वीकृति दिओलन्हि अछि । हुनकासभकेँ कोनकोन कार्यक्रम चलाबएलेल देने एहि विषयमे परिषद्के कर्मचारी सेहो अनभिज्ञ छथि ।
पार्टी कार्यकर्ता संस्थापक रहल आ भौतिक संरचना नहि भेल मुदा दर्तामात्र भेल संस्थाकेँ सम्बन्धन देबाक निर्णय करओने कहैत सीटीईभीटी तथा मन्त्रालयक अधिकारी सेहो असन्तुष्टि जनओलन्हि अछि । कर्मचारी तथा अन्य क्षेत्रसँ सेहो विरोध भऽ सकैत अछि आंशकामे अमेरिका जएबासँ एक दिन आगुमात्र निर्णय करओने छथि ।

Read More »

लोकसेवा विज्ञापनविरुद्ध प्रदर्शन

जनकपुरधाम साउन ३ गते ।लोकसेवा विज्ञापनविरुद्ध प्रदर्शनमे उतरल प्रदर्शनकारी सरकार खसएबाक चेतावनी देलक अछि । वृहस्पतिदिन अनामनगरस्थित लोकसेवा आयोगक केन्द्रीय कार्यालयमे तालाबन्दी करए पहुँचल प्रदर्शनकारी राजाके हटओने जँका संघीय मामिला तथा सामान्य प्रशासनमन्त्री लालबाबु पण्डित आ लोकसेवा आयोगक प्रमुख उमेश प्रसाद मैनालीके हटाबएमे समय नहि लागत बतओलन्हि ।
‘सरकार जाहि प्रकारेँ रवैया अपनओने अछि ओहिविरुद्ध मधेशी, मुस्लिम, जनजाती, महिला आ उत्पीडितके तर्फसँ विगतसँ सचेत करबैत आएल छी,’ एक प्रदर्शनकारी कहलन्हि,‘यदी सरकार ठीक नहि भेल तऽ देशके पैघ दुर्घटना भोगए परत ।’
परीक्षासँ एक दिन पहिने आयोगक केन्द्रीय कार्यालय तालाबन्दी करए पहुँचल युवाउपर प्रहरी हस्तक्षेप कएने अछि । प्रदर्शनके क्रममे महिला प्रदर्शनकारी उपर प्रहरी हाथपाथ कएने कहैत युवा प्रदर्शनकारी आक्रोशित भेल छल ।
एहिबीच लोकसेवा आयोग गत जेठ १५ गते कएने विज्ञापनक परीक्षा शुक्रदिनसँ शुरु भऽ रहल अछि । संघीय मामिला तथा सामान्य प्रशासन मन्त्रालयक सिफारिसमे लोकसेवा आयोग गत जेष्ठमे स्थानीय तहक विभित्र पदमे ९ हजार १ सय ६१ कर्मचारीके माँग कएने छल ।
ओम्हर सर्वोच्च अदालत सेहो विज्ञापन खारिज नहि करबाक आदेश देलाक बाद लोकसेवा आयोग परीक्षा सञ्चालनक तैयारी कएने अछि ।

Read More »

भारतसँ पाइपमार्फत आबए लागल तेल

जनकपुरधाम साउन ३ गते ।भारतसँ पाइपलाइनमार्फत पेट्रोलियम पदार्थ नेपाल अएबाक शुरु भेल अछि ।बुधदिन दुपहर १२ बजेसँ बिहारक पटनासँ पाइपमे तेल पठएबाक शुरु कएलगेल आ वृहस्पतिदिन मध्य रातिधरि पाइप होइत बाराके अमलेखगञ्जधरि आबि जाएत डिपोक प्रमुख प्रदीप यादव जानकारी देलन्हि ।
पाइप भरबामे २१ सय किलोलिटर अर्थात २१ लाख लिटर तेल लगैत अछि । शुरुमे पाइप भरि कऽ रखलाक बाद भारतमे एक क्लिक करैत किछुए देरमे नेपालधरि तेल अबैत अछि । नेपालमे डिजलके माँग अधिक भेलाक कारण पहिल चरणमे पाइपलाइनमार्फत डिजलमात्र आनल जाएत । एखन अमलेखगञ्ज डिपोके दैनिक माँग २० लाख लिटर अछि जाहिमे पाइपलाइनसँ एक घन्टामे २ लाख लिटर डिजल नेपाल आओत ।
पाइपलाइन २४ घन्टा चलओला पर एकहि दिनमे ४८ लाख लिटर डिजल नेपाल आओत आ एहिसँ नेपालक माँग पुरा कएल जा सकैत अछि निगम जनओलक अछि । पाइपलाइनसँ आबएबला डिजल भण्डारनके लेल अमलेखगञ्जमे ४१ लाख लिटर क्षमताक २ टा आ ३९ लाख लिटर क्षमताक ४ टा अत्याधुनिक ट्यांकी निर्माण भऽ चुकल अछि ।
कम्पयुटरके माध्यमसँ पाइपलाइन बन्द आ खुला करबालेल अमलेखगन्जमे कन्ट्रोल रुम निर्माणक काज सेहो अन्तिम चरणमे पहुँचल अछि । कन्ट्रोल रुम बनबामे ढिलाइ भेलाक कारण शुरुमे आदमीए पाइपलाइनक व्यवस्थापन करत अमलेखगञ्जक डिपो प्रमुख यादव जानकारी देलन्हि ।
एखन पाइपलाइन भरि कऽ रखलाक बादो नियमित तेल नहि आनल जाएत । भारतीय प्रधानमन्त्री आ नेपालक प्रधानमन्त्री एकहिबेर स्वीच दबा कऽ उद्घाटन करबाक तैयारी चलि रहल निगम जनओलक अछि ।
‘हाइ लेभलसँ उद्घाटन करबाक तैयारी चलि रहल अछि, अगस्तके १५ तारिख धरि एकर उद्घाटन भऽ जाएत, एखन पाइप भरि कऽ राखल जाएत, औपचारिक उद्घाटनके बादे नियमति तेल आनल जाएत,’ निगमके प्रवक्ता वीरेन्द्र गोइत बतओलन्हि ।

Read More »

महोत्तरीके एक दर्जन सडक क्षतिग्रस्त

जनकपुरधाम साउन ३ गते ।अषाढक अन्तिम सप्ताहमे भेल भारी वर्षाक संगहि आएल बाढिसँ महोत्तरी जिल्लाक सडक अस्तव्यस्त कऽ देने अछि । बाढिसँ जिल्लाक २४ जिल्लाक सडक सञ्जाल अवरुद्ध भेल जिल्ला दैवी प्रकोप उद्धार समिति जनओलक अछि ।
जिल्लाक मुख्य ४२ सडकमेसँ २४ टा सडकमे पैघ क्षति भेलाक कारण यातायात सञ्चालनमे समस्या आएल अछि ।
तराई मधेशक ‘लाइफ लाइन’ कहलगेल हुलाकी सडक, बर्दिवास–जलेश्वर सडक खण्ड, जनकपुर–जलेश्वर सडक, जलेश्वर–सम्सी, जलेश्वर–भ्रमरपुरा होइत जनकपुर जोडएबला सडक, जलेश्वर–मठिहानी, जलेश्वर–रौजासहितक २४ टा सडक बाढिक कारण अवरुद्ध भेल समितिक अध्यक्ष तथा प्रमुख जिल्ला अधिकारी उमेशकुमार ढकाल बतओलन्हि ।
जिल्लाक मुख्य सडक बाढिसँ अवरुद्ध भेलाक कारण सुदुरदक्षिण क्षेत्रमे रहल सदरमुकाम जलेश्वरसँ अन्य जिल्लाक सम्बन्धविच्छेद भेल अछि ।
क्षतिग्रस्त सडकमे मर्मतसम्भारक काज द्रुतगतिमे चलि रहल प्रमुख जिल्ला अधिकारी ढकालक कहब अछि । क्षतिग्रस्त सडक आ पूर्वपश्चिम राजमार्गक महोत्तरीक बर्दिवासस्थित भव्सीपुलमे बेलिब्रिज पाँच दिनभितर प्रयोगमे आबि जाएत ढकाल जानकारी देलन्हि ।

Read More »

राहत लऽ कऽ प्रदेश सरकार पहुँचल रौतहट

जनकपुरधाम साउन ३ गते ।प्रदेश सरकार राहत सामग्रीसहित रौतहट पहुँचल अछि । संघीय सरकारक मन्त्रीसभक टोली आ प्रमुख प्रतिपक्षी दल नेपाली कांग्रेसक सभापति शेरबहादुर देउवा बाढिसँ प्रभावित रौतहट पहुँचलाक दोसर दिन वृहस्पतिदिन प्रदेश सरकार राहत लऽ कऽ ओतह पहुँचल अछि ।
मुख्यमन्त्री लालबाबु राउत स्वयं रौतहट पहुँच कऽ बाढिपीडितकेँ राहत वितरण कएलन्हि अछि । गौरस्थित जिल्ला प्रशासन कार्यालय परिसरमे मुख्यमन्त्री राउत पीडितकेँ खाद्यात्र, त्रिपाल, भुलसहितक सामग्री वितरण कएलन्हि ।
प्रदेश सरकार बाढिपीडितकेँ राहत सामग्री वितरणमे सहयोग आ व्यवस्थापन करबालेल मन्त्री आ सांसदसभकेँ अपन अपन क्षेत्रमे केन्द्रीत होबएलेल कहने अछि ।
बाढिपीडितकेँ राहत वितरण करबालेल अलगअलग टोली बना कऽ परिचालन कएलगेल प्रदेश सरकार जनओने अछि । रौतहटके बाढिपीडिटकेँ १ करोड २५ लाख मूल्य बराबरके राहत सामग्री वितरण कएल जा रहल सरकार बतओलक अछि ।
राहत वितरण कार्यक्रममे आन्तरिक मामिला तथा कानुनमन्त्री ज्ञानेन्द्र यादव, भूमि व्यवस्थापन, कृषि तथा सहकारी राज्यमन्त्री योगेन्द्र यादवसहित प्रदेशसभाक सदस्यसभक उपस्थिति छलन्हि ।

Read More »

एक वर्षमे ७३ प्रतिशत मुद्दा फैसला

जनकपुरधाम साउन ३ गते ।समान्यतः नेपालक न्यायप्रक्रिया सुस्त रहल आरोप लगैत आबि रहल अछि । न्याय पाबएमे लाम्बा समयधरि प्रतिक्षा करए परलाक कारण सेहो अदालत उपर ई आरोप लगैत आबि रहल अछि ।
मुदा उच्च अदालत जनकपुर एहि प्रकारक आरोपसभकेँ अन्त करबातर्फ किछु हदधरि पहल कएने देखबामे आएल अछि । उच्च अदालत जनकपुर गत आर्थिक वर्षमे ७२.९७ प्रतिशत मुद्दा फछर्यौट कएलक अछि । पछिला पाँच वर्षमे उच्च अदालत जनकपुर एहि संख्यामे कहियो मुद्दा फछर्यौट नहि कऽ सकल छल ।
आर्थिक वर्ष २०७५÷०७६ मे लगत रहल ४ हजार ४ सय २ मुद्दामेसँ ३ हजार २ सय १२ मुद्दा फछर्यौट भेल उच्च अदालत जनकपुर जनओलक अछि । विगतके १ हजार ९ सय ९७ आ नयाँ दर्तासहित उच्च अदालतमे गत आर्थिक वर्षमे ४ हजार ४ सय २ मुद्दा दर्ता भेल छल । पुरान मुद्दामेसँ १ हजार ८ सय ६१ आ नयाँ दर्तामेसँ १ हजार ३ सय ५१ मुद्दा फछर्यौट भेल उच्च अदालतक तथ्यांकमे उल्लेख अछि ।
तहिना उच्च अदालत जनकपुरमे गत आर्थिक वर्षसँ मात्र शुरु भेल वाणिज्य इजलासतर्फक २७ मुद्दामेसँ १३ टा मुद्दा फछर्यौट भेल अछि तऽ थुनुवा मुद्दा ३४, प्राथमिकताप्राप्त मुद्दा ११, छोट प्रकिृटिके मुद्दा १३, रिट निवेदन २५७ आ अन्यसहित १ हजार १ सय ९० मुद्दा फछर्यौट हएबाक बाँकी रहल रजिष्ट्रार वेदप्रसाद उप्रेती जानकारी देलन्हि । उच्च अदालत जनकपुरमे एक वर्ष पुरा कएने मुद्दासभक संख्या १३५ मात्र रहल ओ बतओलन्हि ।
मुख्य न्यायाधीश हरिकुमार पोखरेल पीडितकेँ न्याय दिआबएलेल न्यायप्रक्रियाकेँ चुस्त बनएबाक प्रयासस्वरुप ई परिणाम देखलगेल बतओलन्हि । दरबन्दीअनुसार जनशक्ति नहि रहल अवस्थामे सेहो उपलब्ध जनशक्ति प्रयोग कऽ न्यायप्रक्रियाकेँ सहज आ तिव्र करबाक प्रयास कएलगेल हुनकर कहब छलन्हि ।

Read More »

अव्यवहारिक करके विरोधमे उद्योगी व्यवसायी

जनकपुरधाम साउन २ गते ।नेपाल सरकार चालु आर्थिक वर्षसँ लागु करए जा रहल किछु करसम्बन्धी व्यवस्थाके उद्योगी व्यवसायीसभ विरोध कएलन्हि अछि । सरकार लागु करए जा रहल ऐन, नीति, नियम, कानुनसँ नीजि क्षेत्रबीच पैघ अनिश्चितता उत्पत्र भेल कहैत उद्योगी व्यवसायीसभ खारिज करबाक माँग कएलक अछि ।
राष्ट्रिय अर्थतन्त्रकेँ गतिशील एवं जीवन्त करबालेल सरकारी स्तरसँ सहजीकरण हएबाक अवस्थामे ठीक उल्टा एक परसँ दोसर ऐन, कानुन लाबि कऽ नीजि क्षेत्रके धाराशायी बनएबाक काज भऽ रहल जनकपुरक उद्योगी व्यवसायीसभ आरोप लगओलक अछि ।
संगहि ओसभ साउन १ गतेसँ लागु भेल करसम्बन्धी विभित्र व्यवस्था खारिज करबालेल सरकारसँ माँग कएलन्हि अछि । जनकपुर उद्योग वाणिज्य संघ आ धनुषा चेम्बर अफ कमर्स जिल्ला प्रशासन कार्यालयमार्फत संघीय सरकारकेँ ज्ञापनपत्र बुझबैत उद्योगी व्यवसायीसभ हकहितविपरित रहल ऐन कानुन खारिज करबाक माँग कएलन्हि अछि ।
एक हजारसँ अधिक तलब भुक्तानी करबाक अवस्थामे सम्बन्धीत कामदारक प्यान नम्बर आवश्यक रहबाक प्रावधान अव्यवहारिक रहल कहैत उद्योग वाणिज्य संघ आ चेम्बर्स अफ कमर्स खारिज करबाक माँग कएलक अछि ।
तहिना मालबस्तु तथा ढुवानी साधनक अनुगमन प्रणाली (भिसीटीएस) कानुन अव्यवहारिक रहल रहल वाणिज्य संघक कहब अछि । ढुवानीमे लगाओलगेल १३ प्रतिशत मूल्य अभिवृद्धि कर, न्यूनतम आधारभूत खाद्य वस्तुमे लगाओलगेल मूल्य अभिवृद्धि कर, अग्रिम आयकर अव्यवहारिक रहल व्यवसायीसभक कहब अछि ।
तहिना बैंक खातामार्फत पारिश्रमिक तत्काल भुक्तानी करब सम्भव नहि रहल उद्योगी व्यवसायीसभ बतओलन्हि अछि । डिजेलमे भ्याट मिन्हाके पुराने व्यवस्था लागु करबाक, योगदानमे आधारित सामाजिक सुरक्षा कोषमे रकम जम्मा करबाक सरकारक सेहो सहभागिता हएबाक, भारतीय मुलके कामदारसभकेँ सूचीकृत करबाक व्यवस्था सरल आ स्थानीय स्तरसँ हएबाक माँग ओसभ कएलन्हि अछि ।

Read More »

मुख्यमन्त्री कार्यालय आगु शिक्षकसभकेँ लाठी

जनकपुरधाम साउन २ गते ।आन्दोलनरत शिक्षकसभ उपर जनकपुरमे लाठी चार्ज भेल अछि । विगत किछुदिनसँ आन्दोलन कऽ रहल अस्थायी शिक्षक उपर मुख्यमन्त्री कार्यालय आगु बुधदिन लाठी चार्ज भेल अछि ।
विगत १२ दिनसँ अस्थायी शिक्षक आन्दोलन परिचालन समितिक अगुवाइमे धर्ना दैत आएल शिक्षकसभ मुख्यमन्त्री तथा मन्त्रीपरिषद् कार्यालय आगु चक्काजाम करबाक प्रयास कएलाक बाद प्रहरी लाठी चार्ज कएने छल ।
प्रहरी शिक्षकउपर लाठी चार्ज करबाक संगहि धरपकड सेहो कएलक अछि । धर्ना पर बैसल शशिकला भट्टराई, जुरनी मण्डल, रेखा कापड, मुकेश तिवारीसहितक शिक्षककेँ प्रहरी नियन्त्रणमे लेने अस्थायी शिक्षक आन्दोलन परिचालन समितिक संयोजक धर्मेन्द्रकुमार यादव बतओलन्हि अछि ।
मुख्यमन्त्री सेहो धर्नास्थलमे आबि कऽ समस्या समाधान करबाक आश्वासन देलाक बादो एखनधरि कोनो पहल नहि कएलाक बाद बाध्य भऽ कऽ सडक अवरुद्ध कएने संयोजक यादव बतओलन्हि । धर्नास्थल पहुँच कऽ समस्या समाधान करबाक आश्वासन देलाक बादो मुख्यमन्त्रीके निर्देशनमे अपनासभ उपर प्रहरी लाठीचार्ज कएने हुनकर आरोप अछि ।
नोकरीसँ निकाललगेल अस्थायी शिक्षकसभ उमेर हदधरि पेशाके ग्यारेन्टी आ औषधी उपचारके व्यवस्थाक माँग करैत अषाढ १९ गतेसँ मुख्यमन्त्री तथा मन्त्रीपरिषद् कार्यालय आगु धर्ना दैत आएल छथि । जीवनक महत्वपूर्ण समय देशक शिक्षा क्षेत्रमे बितओने आ उत्तरार्धमे सरकार रोजगारी छिनने हुनकासभक कहब अछि ।
एहिबीच प्रहरी उपर कएलगेल लाठीचार्जके नेपाल शिक्षक संघ आ नेपाल राष्ट्रिय शिक्षक संगठन भत्र्सना कएलक अछि । पूर्वकालसँ जीविकोपार्जन करैत आबि रहल अस्थायी शिक्षकसभ अपन जायज माँग रखैत कएने शान्तिपूर्ण आन्दोलनमे प्रहरीद्धारा लाठी चार्ज कराएब आपत्तिजनक रहल ओसभ बतओलक अछि ।

Read More »
1 2 3 112