देश

१५ औं निजामती दिवस प्रविधिको प्रयोगबाट परिणाममुखी सेवा प्रवाह

kpoliकाठमाडौं, भदौ २२ गते । प्रधानमन्त्री के.पी. शर्मा ओलीले नागरिकको घरदैलोमा गुणस्तरीय सेवा प्रवाहलाई सुनिश्चित गर्न राष्ट्रसेवक कर्मचारीसँग आग्रह गर्नुभएको छ । १५ औं निजामती दिवसको अवसरमा शुभकामना सन्देश दिंदै प्रधानमन्त्री ओलीले सूचना प्रविधिको अधिकतम उपयोग गरेर सक्षम र परिणाममुखी सेवा प्रवाह गर्न पनि निजामती कर्मचारीलाई अपिल गर्नुभयो ।
‘नतिजामुखी प्रशासन, समृद्धि र सुशासन’ भन्ने मूल नाराका साथ शुक्रवार देशभर निजामती दिवस विभिन्न कार्यक्रम गरेर मनाइँदैछ । प्रधानमन्त्री ओलीले शुभकामना सन्देशमा सरकार र जनताबीचको सम्बन्धलाई सुमधुर बनाउन निजामती सेवाको भूमिका अहम हुने समेत बताउनुभएको छ ।
प्रधानमन्त्री ओलीले भन्नुभएको छ, ‘स्वप्नदर्शी राजनीतिक नेतृत्व र व्यावसायिक कौशल, विज्ञता र इमान्दारीले भरिपूर्ण कर्मचारी प्रशासन लोकतन्त्रको जग हो । नेपाली जनताले यस्तै जगमा खडा भएको आदर्श र समग्र लोकतन्त्रको परिकल्पना गरेका छन् ।’ यसैगरी, सङ्घीय मामिला तथा सामान्य प्रशासनमन्त्री लालबाबु पण्डितले जनताको बढ्दो आवश्यकता र अपेक्षालाई राष्ट्रको उपलब्ध स्रोत साधनको विवेकपूर्ण उपयोगमार्फत सम्बोधन गर्न नेपालको निजामती प्रशासन प्रतिबद्ध हुनुपर्ने बताउनुभएको छ ।
मन्त्री पण्डितले दिनुभएको शुभकामना सन्देशमा राष्ट्रको समृद्धि र साधनको अधिकतम उपयोग गर्दै मुलुकको तीव्र सामाजिक तथा आर्थिक विकासमा निजामती कर्मचारीलाई नेतृत्वदायी भूमिका निर्वाह गर्न आग्रह गर्नुभएको छ ।
राजनीति र प्रशासन एकै सिक्काका दुई पाटा हुन् भन्दै मन्त्री पण्डितले निजामती कर्मचारीको कार्यसम्पादनका आधारमा दण्ड तथा पुरस्कारको व्यवस्था गरी कर्मचारीको पदस्थापन, सरुवा र बढुवालाई त्यससँग आवद्ध गरिने बताउनुभयो ।
नेपाल सरकारका मुख्य सचिव लोकदर्शन रेग्मीले निजामति कर्मचारीले प्रवाह गर्ने सेवाबाट निजामती प्रशासनको छवि उज्यालो हुँदै जाने विश्वास व्यक्त गर्नुभयो । उहाँले भन्नुभयो, ‘‘विगतबाट पाठ सिक्दै नवप्रवर्तन शैलीमा अझ उच्च मनोबलका साथ काम गर्नेतर्फ सबै एक भई अग्रसर हुनु जरुरी छ, यस तथ्यलाई ध्यान दिँदै आ–आफ्नो ठाउँबाट सिर्जनशील सक्रियता देखाउन सम्पूर्ण निजामती साथीलाई अपील गर्दछु ।’’
सङ्घीय मामिला तथा सामान्य प्रशासन मन्त्रालयका सचिव दिनेशकुमार थपलियाले निजामती सेवाले जस्तोसुकै चुनौतीपूर्ण अवस्थामा पनि आफूलाई अब्बल सावित गरेको बताउनु भएको छ । उहाँले आगामी दिनमा समेत प्रशासनिक पुनर्संरचना र कर्मचारी समायोजनको प्रक्रियामा समाहित भई ‘समृद्ध नेपाल ः सुखी नेपाली’ भन्ने राष्ट्रिय सोचलाई मूर्तरूप दिन निजामती सेवाले महत्वपूर्ण योगदान पु¥याउने विश्वास व्यक्त गर्नुभयो ।

Read More »

‘चिकित्सक आन्दोलित हुनुपर्ने कारण छैन’

काठमाडौँ, भदौ २१ गते । डा. गोविन्द केसीको अनशन होस् या मुलुकी संहिताकोे विषय, कुनै पनि मुद्दामा चिकित्सकले बिरामीको उपचार गर्नुपर्ने नैसर्गिक अधिकारविपरीत आन्दोलन गर्न नहुने बुद्धिजीवी एवम् उपभोक्ताकर्मीले धारणा व्यक्त गर्नुभएको छ । पछिल्लो समय चिकित्सक मुलुकी ऐनमा भएको विषयलाई लिएर आन्दोलित छन् । मुलुकी संहितामा भएका कतिपय प्रावधानहरूले चिकित्सकलाई अपराधीकरण गर्न खोजिएको भन्दै अस्पताल बन्दसम्मका आन्दोलन सुरु भएको छ । चिकित्सकले गर्दै आएको आन्दोलन राजनीतिक रुपमा भएको भन्दै सरकारले कारबाही गर्नुपर्ने आवाज पनि उठ्न थालेको छ ।
वरिष्ठ अधिवक्ता तथा राष्ट्रिय सभाका सांसद रामनारायण विडारीले मुलुकी संहिता जनताका लागि भएको भन्दै चिकित्सकका लागि विशेष ऐन हुने बताउनुभयो । कानुनको व्याख्या चिकित्सकले गर्ने नभई वकिलले गर्ने भएकोले चिकित्सकको काम बिरामीको उपचार र चिरफार गर्ने भएकोले त्यतै केन्द्रित हुनुपर्ने उहाँले बताउनुभयो ।विशेष ऐन अन्र्तगत चिकित्सकको सेवा सुविधा आचारसंहिता जस्ता विषय मेडिकल काउन्सिल ऐनले गर्छ, बिडारीले भन्नुभयो,“ चिकित्सकका लागि चिकित्सा सम्बन्धी छुट्टै ऐन हुन्छ ।” १९१० सालदेखिको कानुनलाई निरन्तरता दिइएको भन्दै उहाँले चिकित्सकले आन्दोलन गर्ने, तर्सनुपर्ने, पूर्वाग्रही हुने कुनै पनि कारण नभएको उल्लेख गर्नुभयो ।बदनियत नचिताई काम गर्ने चिकित्सक डराउनुपर्ने अवस्था नरहेको भन्दै उहाँले चिकित्सकलाई अप्ठ्यारो पार्न मुलुकी ऐन आएको होइन भन्नुभयो । आपराधिक कार्यबाट उन्मुक्ति नेपालको कोही व्यक्तिलाई पनि नहुने भन्दै उहाँले चिकित्सक, वकिल, पत्रकार, प्राध्यापकलाई सबैैलाई कानुन लाग्ने बताउनुभयो ।
भारत, अमेरिका र बेलायतमा चिकित्सक माथि कानुन लाग्ने गरेको उहाँले बताउनुभयो । अमेरिका बेलायतजस्ता देशमा कतिपय गलत उपचार गरेका कारण चिकित्सक अझै जेलमा रहेका छन् ।नेपालका चिकित्सक आन्दोलित हुनुपर्ने कारण नरहेको भन्दै सांसद विडारीले चिकित्सकले लापरबाही गरेको हो होइन छानविनको लागि कुनै संयन्त्र आवस्यक भए त्यस्तो संयन्त्र बनाउन सकिने उल्लेख गर्नुभयो । कानुनी कुरा चिकित्सकले स्पष्ट बुझ्न नसकेको उहाँको ठम्याइ छ ।यता नेपाल मेडिकल काउन्सिलका रजिष्ट्रार डा. दिलीप शर्माले सरकारले चिकित्सकका माग सम्बोधन गर्ने बताइरहँदा आन्दोलन अगाडि बढाउनु उपयुक्त नहुने बताउनुभयो । उहाँले आन्दोलनले जनताको स्वास्थ्यप्रतिको अधिकार हनन हुनुहुन्न भन्नेमा काउन्सिल रहेको बताउनुभयो ।
उपभोक्ता हित संरक्षण मञ्चका महासचिव बाबुराम हुमागाईले पछिल्लो समय चिकित्सकले नैतिक दायित्व भुल्दै गएको बताउनुभयो । उहाँले संसारका जुनसुकै देशमा चिकित्सकलाई बाध्ने कानुन भएको भन्दै यसले अत्यावस्यक सेवा बन्द गर्नु राम्रो नभएको बताउनुभयो ।डाक्टरको आन्दोलनलाई सरकारले तत्काल एक्सनमा गएर कारबाही गर्नुपर्ने भन्दै उहाँले बिरामीले उपचार नपाइ मर्नुपर्ने अवस्थाको अन्त्य हुनुपर्नेमा जोड दिनुभयो । सरकारले मुलुकी ऐन संहितालाई कसरी सम्बोधन गर्न सकिन्छ भन्नेमा छलफल जारी रहेको बताइरहेको बेला चिकित्सकले आन्दोलन गर्नु शतप्रतिशत राजनीतिक भएको उहाँले बताउनुभयो ।चिकित्सक भगवान नभएको तर्क गर्दै मञ्चका महासचिव हुमागाइले कानुन चिकित्सकलाई पनि लाग्नुपर्छ भन्नुभयो । चिकित्सकलाई कानुन लाग्नै हुन्न भन्ने पक्षमा उपभोक्ता हित संरक्षण मञ्च नरहेको भन्दै हुमागाईले आन्दोलन गर्ने चिकित्सकमाथि सरकारले कारबाही गर्नुपर्ने बताउनुभयो ।

Read More »

नेपाल—भारत मैत्री धर्मशाला सञ्चालन गर्न समय लाग्ने

dharmasala

काठमाडौँ, भदौ १९ गते । नेपाल–भारत मैत्री धर्मशाला सञ्चालनमा आउन समय लाग्ने भएको छ । धर्मशालाको माथिल्लो तलाको भित्री केही भागमा निर्माणका काम जारी छ । धर्मशालाको यो निर्माण कार्य सकिएपछि कोठाको शुल्क तोक्ने र सञ्चालन विधि तयार भएपछि मात्र धर्मशाला सञ्चालनमा आउने भएको छ । पशुपति क्षेत्र विकास कोषका कार्यकारी निर्देशक रमेश उप्रेतीका अनुसार भित्री साजसज्जाका केही सामान्य कार्य बाँकी छन् ।
तत्कालीन राष्ट्रिय सभाका अध्यक्ष वेनीबहादुर कार्की, भारतका आदि शङ्कराचार्य जयेन्द्र सरस्वती र भारतीय राजदूत शिवशङ्कर मुखर्जीले तीन पटक शिलान्यास गर्नुभएको थियो । प्रधानमन्त्री केपी ओली र भारतीय प्रधानमन्त्री नरेन्द्र मोदीले हालै धर्मशालाको संयुक्त रुपमा उद्घाटन गर्नुभएको थियो ।

Read More »

५४ लाख ९६ हजारसहित ५ जना ‘हुण्डी कारोबारी’ सार्वजनिक

१८ भदौ, वीरगञ्ज । ५४ लाख ९६ हजार रुपैयाँसहित पक्राउ परेका पाँच जना शंकास्पद हुण्डी कारोबारीलाई वीरगञ्ज प्रहरीले सोमबार बिहान सार्वजनिक गरेको छ । सार्वजनिक गरिएकामध्ये २ जना भारतीय नागरिक छन् ।
प्रहरीले पर्साको विन्दवासनी गाउँपालिका वडा नम्बर ५ प्रसौनीभाठा बस्ने पवन कुमार गुप्ता, वीरगञ्ज महानगरपालिका वडा नम्बर ६ जेल रोड बस्ने अजय मानन्धर, पूर्वी चम्पारण जिल्ला मोतिहारी पञ्चायत चम्पापुर थाना रामगढवा मानाना बस्ने साविर मियाँ, मोतिहारी रक्सौल नगरपालिका वडा नम्बर ३ थाना रक्सौल बस्ने अशोक श्रीवास्तव र बाराको सिम्रौनगढ नगरपालिका वडा नम्बर १ खजानी बस्ने अजय कुमार जैसवाल रहेका छन् ।
विशेष सूचनाको आधारमा एकैपटक तीन स्थानमा छापा मारेर उनीहरुलाई नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक सत्यनारायण थापाले जानकारी दिए । ‘अवैध वित्तीय कारोबार हुने गरेको विशेष सूचना आएको थियो, एकैपटक वीरगञ्जका तीन स्थानमा छापामारी गर्‍यौं,’ उनले भने, ‘कानुन बमोजिम खानतलासी गर्दा स्रोत नखुलेको अवैध रकमसहित उनीहरुलाई नियन्त्रणमा लिन सफल भयौं ।’
अनुसन्धानका लागि ८ जनालाई पक्रेको भएपनि अन्य तीन जना निर्दोष देखिएकाले छोडिएको दावी प्रहरीले गरेको छ ।
प्रहरीले दिएको जानकारीअनुसार वीरगञ्ज महानगरपालिका वडा नम्बर ८ माईस्थान स्थत सुमित्रादेवी गुप्ताको घरमा पवन कुमारले र वीरगञ्ज महानगरपालिका वडानम्बर १० घडिअर्वापोखरीस्थित सोनालाल गुप्ताको घरमा अजय कुमारले घर भाडामा लिएर अवैध रुपमा अवैध वित्तीय कारोबार गर्दै आएका थिए । गुप्ता फिल्म हल र मनी चेन्जरका सञ्चालक समेत रहेको बुझिएको छ ।
प्रहरीले भने तत्काल हुण्डी कारोबारी हुन वा होइनन् एकिनसाथ भन्न सक्ने अवस्था नरहेको बताएको छ । ‘अहिले नै हुण्डी कारोबारी हुन् वा अन्य भन्ने खुल्न सकेको छैन, राजश्वको अनुसन्धान पछि खुल्छ,’ प्रहरी नायब उपरीक्षक थापाले भने ।
उनीहरुलाई आवश्यक अनुसन्धान तथा कारबाहीका लागि राजश्व अनुसन्धान विभाग हरिहरभवन पुल्चोक ललितपुर पठाउने तयारी भइरहेको प्रहरीले जनाएको छ ।
Read More »

चिकित्सकको आन्दोलनमा कांग्रेसको समर्थनः देउवा

१८ भदौ, चितवन । नेपाली कांग्रेसका सभापति शेरबहादुर देउवाले उपचार सेवा नै ठप्प पार्दै आएका चिकित्सकहरुको आन्दोलनमा आफ्नो पार्टीको समर्थन रहेको बताएका छन् ।चितवनको भरतपुरमा नेपाल प्रेस युनियनले सोमबार विहान गरेको पत्रकार सम्मेलनमा सभापति देउवाले उनीहरुका जायज माग सम्वोधन हुनुपर्ने बताए । तपाईं नै प्रधानमन्त्री भएको बेला संहिता जारी गर्नुअघि चिकित्सकहरुसँग छलफल र परामर्श गर्नु भएन भन्ने पत्रकारको जिज्ञासामा सभापति देउवाले छलफल गरेर नै ल्याएको प्रतिक्रिया दिए ।रकारका पछिल्ला कामकारबाही सहि ढंगले अघि नबढेको बताएका सभापति देउवाले विमस्टेक भने सफलतापूर्वक सम्पन्न भएको बताए । सार्क र विमस्टेक फरक-फरक संगठन भएकाले एकलाई अर्कोसँग जोड्न नहुने उनको तर्क छ । संयुक्त सैन्य अभ्यास सहमतीअनुसार हुन लागेको उनले बताए ।देशमा पछिल्लो समयमा बढेका बलात्कारका घटनाप्रति चिन्ता व्यक्त गर्दै सभापति देउवाले दोषीको पहिचान गरी कारबाही गराउन सरकार असफल भएको टिप्पणी गरे ।

Read More »

कोसी ब्यारेज पीडितद्वारा भारतसँग क्षतिपूर्ति माग

काठमाडौँ, भदौ १८ गते । कोसी ब्यारेजका कारणले सयौँ हेक्टर खेतीयोग्य जमिन कटान भएको र बस्तीमा क्षति पुगेको भन्दै कोसी ब्यारेज पीडितले भारत सरकारसँग दुई अर्ब ५९ करोड रुपियाँ क्षतिपूर्ति माग गरेका छन् ।
नेपाल भारतबीच भएको कोसी सम्झौता विपरीत भारतीय पक्षले ब्यारेजभन्दा दक्षिणतर्फ कोसी नदीको पानी पश्चिम नेपालतर्फ बगाउँदा सप्तरीका जोगनियाँ, हनुमाननगर र गोबरगडा क्षेत्रमा बर्सेनि क्षति हुने गरेको भन्दै कोसी सङ्घर्ष समिति, कोसी विस्थापित समाज र कोसी विस्थापित परिवार समाज सप्तरीले प्रधानमन्त्री, गृहमन्त्री तथा परराष्ट्रमन्त्रीलाई पहल गरिदिन आग्रह गरेका छन् ।
बिमस्टेकको बेला भारतीय प्रधानमन्त्री नरेन्द्र मोदी नेपाल भ्रमणमा रहेका बेला नेपालस्थित भारतीय राजदूतावासलाई ज्ञापनपत्र बुझाइएको कोसी सङ्घर्ष समितिले जनाएको छ ।
ऊर्जा, जलस्रोत तथा सिँचाइ मन्त्रालयका अनुसार प्रधानमन्त्री कार्यालयमा दिइएको निवेदनमा भारतीय पक्षले एकलौटी रूपमा कोसी ब्यारेजदेखि दक्षिण पश्चिम नेपालतर्फ पानी डो¥याएर पठाउने गरेकोले ६२५ हेक्टर खेतीयोग्य जमिन कटान भएको र बस्ती डुबानमा पर्दा अन्नपात, लुगाकपडा क्षति भएको उल्लेख छ । सन् १९९० देखि २०१८ सम्मको क्षतिबापत भारतसँग सो रकम माग गरिएको छ ।
सो माग सहितको पत्र भारतीय प्रधानमन्त्री नरेन्द्र मोदीको कार्यालय र बिहारका मुख्यमन्त्रीको कार्यालयमा पनि दिइएको कुरा समितिले जानकारी दिएको छ । भारतीय प्रधानमन्त्री नेपाल रहँदा उहाँलाई प्रत्यक्ष भेटेर ज्ञापनपत्र दिने प्रयास भने विफल भएको बताइएको छ ।
प्रधानमन्त्री तथा मन्त्रिपरिषद्को कार्यालयले तत्काल स्थलगत अध्ययन गरी प्रतिवदेन बुझाउन ऊर्जा, जलस्रोत तथा सिँचाइ मन्त्रालयलाई निर्देशन दिएको छ । मन्त्रालयको जलस्रोत महाशाखाका सिनियर डिभिजनल इन्जिनियर रमेशप्रसाद पौडेलका अनुसार स्थलगत अध्ययन गर्नका लागि जलस्रोत तथा सिँचाइ विभागलाई जिम्मेवारी दिइएको छ । विभागले स्थलगत अध्ययन प्रतिवेदन दिएपछि सो विषयमा काम कारबाही अघि बढाइने भएको छ ।
सन् १९७५ मा कोसी सम्झौताको पुनरावलोकन हुँदा ब्यारेजले प्रभाव पार्ने स्थानमा कुनै पनि संरचना निर्माण गर्दा वा काम गर्दा नेपालसँग समन्वय गरेर मात्र काम अघि बढाइने व्यवस्था गरिएको छ तर ब्यारेजदेखि दक्षिणतिरको भागमा भारतले एकलौटी ढङ्गले पानीलाई पश्चिम नेपालको क्षेत्रमा बग्ने गरी गहिरो गरेर ढुङ्गा, बालुवा झिकेपछि हाल पानी नेपालतर्फमात्र बग्ने गरेको छ । भारतले पूर्वतर्फ नहरको संरचना निर्माण गरेर हिउँदमा पानी लिने गरेको छ भने बर्खाका बेला कोसी नदीमा पानीको बहाव बढ्ने बित्तिकै पश्चिम पट्टीको ढोका खोलेर पानी पश्चिम पट्टी छोड्ने गरेको आरोप स्थानीय बासिन्दाले लगाएका छन् ।
मन्त्रालयका जलस्रोत महाशाखा प्रमुख महेश्वरनरसिंह केसीका अनुसार नेपाल र भारतबीच सीमा क्षेत्रमा देखिएका बाढी तथा डुबानका समस्या लगायतका विषयमा छलफल गर्न आगामी अक्टोबरमा संयुक्त बैठक आयोजना गरिने भएको छ । उहाँले भन्नुभयो, सीमा क्षेत्रमा धेरै समस्या छन् । कोसी मात्र नभएर गण्डकको सुस्ता, लक्ष्मणपुर बाँध लगायतका क्षेत्रमा भएका समस्या समाधानका लागि दुई देशका प्राविधिकबीच बैठकमा निष्कर्षमा पुगिने छ ।
कोसी ब्यारेज निर्माण गर्दा आफ्नो भूमि डुबानमा परेको र सोको मुआब्जा पनि भारतले हालसम्म नदिएको पनि स्थानीयले बताउँदै आएका छन् ।

Read More »

अन्तर्राष्ट्रिय विमानस्थल सञ्चालनमा आयो

TIAकाठमाडौँ, भदौ १७ गते । यती एयरलाइन्सको विमान दुर्घटनाका कारण अवरुद्ध त्रिभुवन अन्तर्राष्ट्रिय विमानस्थल केहीसमय अघिदेखि सञ्चालनमा आएको छ । झण्डै १२ घण्टादेखि अवरुद्ध विमानस्थल खुलेसँगै आन्तरिक तथा अन्तर्राष्ट्रिय उडान सामान्य अवस्थामा सञ्चालन भएको विमानस्थलले जनाएको छ ।विमानस्थलका महाप्रबन्धक राजकुमार क्षेत्रीका अनुसार धस्सिएको विमानलाई लामो समयको प्रयासपछि अहिले यतीकै पार्किङस्थलमा लगिएको छ । करीब २० मिनेट अघिदेखि सेवा शुरु गरिएको हो । नेपालगञ्जबाट २१ यात्रु बोकेर काठमाडौँ आइपुगेको यतीको कलसाइन नाइन एन एएचडब्लु भएको जेट स्ट्रिम विमान गए राति अवतरणको क्रममा धावनमार्गमा चिप्लिएको थियो । शनिबार राति ८ः३० बजे भएको उक्त घटनापछि विमानस्थल अवरुद्ध थियो । दुर्घटनामा कुनै मानवीय क्षति भएन ।घाँसे मैदानमा धस्सिएको विमानलाई प्राधिकरण, विमानस्थलको फायर फाइटिङका कर्मचारी, नेपाल प्रहरी, सशस्त्र प्रहरी बललगायतको संयुक्त टोलीले लगातारको प्रयासपछि धावनमार्गमा लगेको थियो ।

Read More »

चार महिनामा ११८ बालिका बलात्कृत

rape

काठमाडौँ, भदौ १५ गते । पछिल्लो चार महिनामा ११८ जना बालिका बलात्कृत भएका छन् । केन्द्रीय बालकल्याण समितिले २०७४ साल चैतदेखि २०७५ असारसम्म सञ्चारमाध्यममा प्रकाशमा आएका बालअधिकार हननका घटनालाई समेटेर तयार गरेको प्रतिवेदनमा यस्तो तथ्य पाइएको हो । प्रतिवेदन अनुसार बालिका बलात्कार भएका घटनामध्ये १४ जना सामूहिक रूपमै बलात्कृत भएका छन् ।
प्रतिवेदन अनुसार सबैभन्दा बढी चैतमा ५७ जना बालबालिका बलात्कृत भएका छन् । जसमध्ये ५५ जना बालिका छन् भने दुई जना बालक जर्मन नागरिकबाट यौनदुव्र्यवहारको शिकार भएको पाइएको छ । यस्तै, वैशाखमा २८ जना, जेठमा १३ र असारमा २२ बालिका बलात्कारको शिकार भएको प्रतिवेदनमा उल्लेख गरिएको छ ।
बलात्कारमा संलग्न अभियुक्तमध्ये १९ जना बालक नै रहेको छन् भने बाँकी वयस्क रहेका छन् ।
केन्द्रीय बालकल्याण समितिका कार्यकारी निर्देशक तारक धितालले बालिका बलात्कारका डरलाग्दा र पत्याउनै नसक्ने खालका घटना सार्वजानिक भएकाले यसको नियन्त्रणका लागि अहिले भएका कानूनको प्रभावकारी कार्यान्वयनका लागि सम्बन्धित निकायको ध्यान जानुपर्ने बताउनुभयो ।
भदौ १ गतेदेखि कार्यान्वयनमा आएको मुलुकी अपराध संहिताको व्यवस्था अनुसार बलात्कारपछि हत्यामा आजीवन कारागारको सजाय हुने व्यवस्था गरिएको छ ।

Read More »

प्रधानमन्त्री ओली र बङ्गलादेशका प्रधानमन्त्रीबीच भेटवार्ता

काठमाडौँ ।  प्रधानमन्त्री केपी शर्मा ओली र बङ्गलादेशका प्रधानमन्त्री शेख हसिनाबीच आज द्विपक्षीय भेटवार्ता भएको छ । बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को चौथो शिखर सम्मेलनमा भाग लिने सिलसिलामा आज बिहान राजधानी आइपुग्नुभएकी प्रधानमन्त्री हसिनासँग नेपाल–बङ्गलादेश सम्बन्धका विविध विषयमा विचारविमर्श भएको परराष्ट्र मन्त्रालयले जनाएको छ । भेटमा पारस्परिक हित र चासोका साझा विषयका साथै बिम्स्टेक सम्मेलनबारे पनि छलफल भएको थियो ।
Read More »

घरले च्यापिएर एकै परिवारका पाँचको मृत्यु

सल्यान, भदौ १३ गते । सल्यानमा गए राति घरले च्यापिएर एकै घरका पाँचको मृत्यु भएको छ । बागचौर नगरपालिका–४ सिमखोलीमा घर भत्किँदा एकै घरका पाँचको च्यापिएर मृत्यु भएको छ भने एक घाइते भएका छन् । मृत्यु हुनेमा ३९ वर्षीय रामसिंह कामी, उहाँकी ३५ वर्षीया श्रीमती रामकला कामी, उहाँकी ६ वर्षीया छोरी गङ्गा कामी, पाँच वर्षीया छोरी प्रमिला कामी र चार वर्षीय छोरा रुपलाल कामीको मृत्यु भएको जिल्ला प्रहरी कार्यालय सल्यानले जनाएको छ ।

मृतक रामसिंहको एकतले घरको दलिन र पर्खाल भत्किएपछि च्यापिएर पाँचको घटनास्थलमै मृत्यु भएको जिल्ला प्रहरी कार्यालय सल्यानका प्रहरी नायब उपरीक्षक वीरेन्द्रबहादुर शाहीले जानकारी दिनुभयो ।

घटनालगत्तै स्थानीयले प्रहरीलाई खबर गरेपछि सिमाखोली प्रहरी चौकी तथा इलाका प्रहरी कार्यालय थारमारेबाट गएको टोलीले उद्धार गरेको प्रहरी नायब उपरीक्षक शाहीले जानकारी दिनुभयो । अहिले प्रमुख जिल्ला अधिकारीको नेतृत्वमा टोली घटनास्थलमा पुगेको शाहीको भनाइ रहेको छ ।

घटनामा परेकी मृतककी ११ वर्षीय छोरी सुनिता कामीलाई जीवितै उद्धार गरिएको छ । अहिले सुनिताको अवस्था सामान्य रहेको प्रहरीको भनाइ छ ।

Read More »