स्थानीय

‘राइड टु सिन्धुलीगढी साइकल यात्रा’ जनकपुर आबि गेल

जनकपुरधाम २६ गते ।समृद्ध सिन्धुली अभियानके आयोजनामे अगहन २३ गतेसँ सुरु भेल राइड टु सिन्धुलीगढी साइकल यात्रा मंगलदिन जनकपुर पहुँचल अछि । काठमाण्डूके पशुपतिनाथ मन्दिर परिसरसँ सुरु भेल साइकल यात्रा ऐतिहासिक सिन्धुलीगढी होइत तेसर दिन जनकपुरधाम आएल अछि । विवाहपञ्चमीमे सहभागी करएबाक उदेश्य सेहो राखलगेल साइकल यात्रीकेँ विवाहपञ्चमीके एकदिन आगा जनकपुरधाममे स्वागत कएलगेल अछि ।
‘राइड टु सिन्धुलीगढी साइकल यात्रा’ दुनु साँस्कृतिक शहर काठमाण्डू आ जनकपुरकेँ ऐतिहासिक सिन्धुलीगढीसँग जोड्बाक कहैत उपप्रधानमन्त्री इश्वर पोखरेल रविदिन विदाई कएने छलथि । ओहि यात्राके १ सय ५० यात्री मंगलदिन अपरान्ह जनकपुर पहूँचत बताओलगेल अछि । ऐतिहासिक स्थलसभकेँ चिन्हाबएके सँगहि पर्यटन प्रबर्धनमे सेहो सहयोग पहुँचबाक बतबैत उपप्रधानमन्त्री पोखरेल साइकल यात्राके नेतृत्वकर्ता देवेन्द्र बस्नेत आ लाउनहिल च्याम्पियन निष्मा श्रेष्ठकेँ झण्डा हस्तान्तरण कऽ कऽ साइकल यात्रीकेँ विदाइ कएने छलथि ।
‘राइड टु सिन्धुलीगढी’ केँ ब्रान्डिङ कऽ कऽ हरेक वर्ष ब्यवसायिक साइकलयात्रीकेँ सहभागी करएबाक योजना अनुरुप समृद्ध सिन्धुली अभियान एहि बर्ष जनकपुरधामकेँ जोड्एके प्रयासके अभियानक संयोजक लीलानाथ घिमिरे बतओलन्हि । सन्धुलीगढीमे तत्कालीन ब्रिटीस कम्पनीके सेनाकेँ पराजित कएने सम्झनामे सुरु कएलगेल साइकल यात्रा एहिवर्ष अगहन २३, २४, २५ आ २६ गते कऽ चारि दिन रहल अछि । अभियान दु वर्षसँ सिन्धुलीगढी धरि साइकलयात्रा करैत आएल अछि ।

Read More »

विवाहपञ्मी देखबालेल श्रद्धालुभक्तजनसभक पैघ भीड

जनकपुरधाम २६ गते । रामजानकी विवाहोत्सवमे सहभागी होबए आएल तिर्थालुसभक जनकपुरमे पैघ भीड लागल अछि । विवाहोत्सव अन्तर्गत बुधदिन होबएबला प्रमुख समारोहसँ एक दिन आगुए जनकपुर तिर्थालुसभसँ भरिभराउ देखलगेल । विशेषतः विवाहोत्सव होबएबला प्रमुख स्थान जानकी मन्दिर आ रंगभूमि क्षेत्रमे पैघ संख्यामे तिर्थालुसभक भिड देखलगेल अछि । विवाहोत्सवमे सहभागी होबए भारत तथा नेपालक विभिन्न स्थानसँ तिर्थालुहरु जनकपुर आएल अछि ।
विवाहोत्सवसँ एक दिन आगुए देखलगेल भिड प्रमुख समारोहके दिन आओर अधिक तिर्थालुके भीडभाड रहबाक अनुमान कएलगेल अछि । एहि वर्ष राम जानकी विवाह पञ्चमीके दिन नेपाल तथा भारतसँ दश लाख तिर्थालु अएबाक अनुमान कएलगेल अछि । विवाहोत्सवमे सहभागी होबएबला तिर्थालुसभ महोत्तरीके जलेश्वर आ धनुषाक जटही नाकासँ जनकपुर आबि रहल अछि । तिर्थालुसभकेँ चापकेँ ध्यानमे राखि जनकपुर अञ्चल बस व्यवसायी संघ जलेश्वर आ जटही सडक खण्डमे चलएबला बससभक ‘क्यू’ दु दिनक लेल अन्त कएलक अछि । तिर्थालुसभक अत्याधिक चापक कारण समय तालिका तोडि कऽ बससभ चलि रहल जनकपुर अञ्चल बस व्यवासायी संघक अध्यक्ष मनोज चौधरी जानकारी देलन्हि ।
अध्यक्ष चौधरीके अनुसार गत वर्षक तुलनामे ३० प्रतिशतसँ अधिक तिर्थालु विवाहोत्सवमे सहभागी होबउ जनकपुर आबि रहल छथि । ओ विगतके वर्षसभमे भारतक विहार राज्यसँ अधिक तिर्थालु आबि रहला बादो एहि वर्ष उत्तर प्रदेशसँ सेहो तिर्थालु अएलासँ भिडभाड बढल जानकारी देलन्हि । ‘विगतके वषजँका विहारसँ आबएबला तिर्थालु तऽ आएल अछि,’ ओ कहलन्हि,‘मुदा उत्तर प्रदेशक मुख्यमन्त्री योगी आदित्यनाथ आबि रहलासँ, ओतहसँ आबएबला तिर्थालु बढल अछि ।’ विवाहोत्सवमे जनकपुर आबएबला प्रमुख नाका महोत्तरीके भिठ्ठामोड आ धनुषाक जटही धरि प्रत्येक १० मिनेटमे यात्रुबाहक बस चलि रहल बतबैत चौधरी हरेक बसमे ५०÷६० गोटे तिर्थालु आबि रहल जानकारी देलन्हि । अन्य दिन ओ सडक खण्डसभमे साँझ ८ बजे धरि मात्र बस चलैत अएला बादो विवाहोत्सवकेँ मध्यनजर कऽ तिर्थालु आबए धरि बस चलाबएके तैयारी रहल ओ बतओलन्हि ।
एहिके सँगहि भारतक विभिन्न स्थानसँ रिजर्व बस, निजी गाडी सहितक साधन प्रयोग कऽ हजारोके संख्यामे तिर्थालु जनकपुर आबएके क्रम जारी अछि । भारतसँ आबएबला तिर्थालुसभकेँ गाडीकेँ ट्राफिक प्रहरी नगर क्षेत्र भितर प्रवेश नहि करए देने अछि । तिर्थालुके लेल रिजर्व आ निजी गाडीसभ जनकपुर प्रवेश करएबला नाकामे पार्किङके व्यवस्था कएलगेल अछि ।

Read More »

मटकोर सम्पन्न, आई रामजानकी विवाहोत्सव

जनकपुरधाम २६ गते । रामजानकी विवाहोत्सव अन्तर्गत मंगलदिन मटकोरक कार्यक्रम सम्पन्न भेल अछि । मैथिली परम्परा अनुसार विवाहपूर्व होबएबला मटकोर जानकी मन्दिर आ राम मन्दिर अलग अलग कएलक अछि । मिथिलाक परम्परा अनुसार विवाहसँ पूर्व बर आ कन्याके अलग अलग मटकोर होइत आएल अछि ।
जानकी मन्दिरद्धारा गंगा सागर पोखिरमे आयोजना कएलगेल मटकोर कार्यक्रममे प्रदेश प्रमुख रत्नेश्वर लाल कायस्थ, जानकी मन्दिरक छोटे महन्थ रामरोशन दासहित विशिष्ट व्यक्ति एवम पैघ संख्यामे तिर्थालु तथा सर्वसाधारणके उपस्थिति छल । मटकोर कार्यक्र चलि रहल समय मैथिली गीत संगीत उपस्थित सर्वसाधारणके मनोरञ्जन प्रदान कएने छल ।
मैथिली परम्परा अनुसार मटकोरक दिन पोखरिसँ लाओलगेल माटिसँ विवाहक दिन बेदी निर्माण करबाक प्रचलन अछि । गाजाबाजा सहित जानकी मन्दिरसँ निकलएबला टोली मटकोरकेलेल गंगासागर पोखरि पहुँचल छल ।
एहिबीच त्रेता युगमे मर्यादा पुरुष भगवान राम आ जगत जननी सीताक विवाहक स्मरण स्वरुप प्रत्येक वर्ष अगहन शुक्ल पंचमी तिथीमे मनाओल जाएबला विवाह महोत्सव उत्साहपूर्वक मनाओल जा रहल अछि । मैथिली परम्परा अनुसार आई राति जानकी मंदिरक प्राङणमे भगवान रामसीताक वैवाहिक कार्यक्रम सम्पन्न होएत । भगवान राम आ सीताक प्रतिक बना कऽ सम्पन्न होबएबला वैवाहिक कार्यक्रममे भारतक अयोध्या सहित अन्य स्थानसँ बरियातक रुपमे आएल महन्थ एवम साधुसंतसभक सेहो सहभागिता रहत जानकी मंदिरक महन्थ रामतपेश्वर दास जानकारी देलन्हि । तहिना वैवाहिक कार्यक्रममे नेपाल तथा भारतक विभिन्न स्थानसँ आएल श्रद्धालु एवम भक्तजनसभक सेहो सहभागिता रहल करैत अछि ।
एहिसँ पहिने स्थानीय बाह्र विग्हा मैदानमे भगवान राम आ सीताक स्वयंभर कार्यक्रम कएल जाइत अछि । राम मंदिरसँ भगवान रामक डोला सहित निकलल बरियात पक्ष आ जानकी मंदिरसँ बिभिन्न झाँकी सहित निकलल जानकी मंदिरक डोरा बाह्र विग्हा मैदान पहुँचलाक बाद स्वयंभर कार्यक्रम कएल जाइत अछि । स्वयंभर कार्यक्रममे मुख्य महन्थसभ पूजा अर्चना कऽकऽ माला फेर करैत अछि । तहिना स्वयंभर कार्यक्रमके बाद बाह्र विग्हा मैदानसँ शोभा यात्रा निकलबाक तैयारी अछि । शोभा यात्रामे बिभिन्न सरकारी कार्यालय, संघसंस्था, मठ मंदिर सहितकके झाँकी सहभागि कराओल जाति अछि ।
एम्हर विवाह पञ्चमीके दृष्टिगत करैत जानकी मंदिरकेँ विशेष रुपसँ सजाओलगेल अछि । जानकी मंदिरमे विभिन्न प्रकारक बल्ब जडान कऽकऽ अन्य वर्षक तुलनामे एहि वर्ष विशेष सरसजावट कएलगेल अछि । एहिबीच रामजानकी विवाह महोत्सवमे सहभागि होबएबला तिर्थालु जनकपुर आएबाक क्रम सुरु भऽ चुकल अछि । धार्मिक एवम साँस्कृतिक महत्व रहल विवाह महोत्सवमे नेपाल तथा भारतक विभिन्न स्थानसँ लाखौके संख्यामे तिर्थालुसभ आएल करैत अछि । विवाह पञ्चमीमे आबएबला साधुसंत एवम तिर्थालुसभ तीनचारि दिन पहिनेसँ जनकपुर आबि रहल छथि ।
विवाहपञ्चमीमे तिर्थालुसभक भिडभाडके देखैत निजी तथा सरकारी स्तरसँ निःशुल्क शिविर सञ्चालन करबाक तैयारी कएलगेल अछि । स्थानीय युवा क्लब, गैरसरकारी संघसंस्था, जातीय संस्था सहितकके तर्फसँ जनकपुरक विभिन्न स्थान पर शिविर सञ्चालन करबाक तैयारी कएलगेल अछि । विवाह महोत्सवक सप्ताहव्यापी कार्यक्रम अन्तर्गत प्रमुख वैवाहिक कार्यक्रम कार्यक्रमक दोसर दिन रामकलेवा अर्थात बरियातक विदाई करबाक परम्परा रहल अछि ।

Read More »

सुरक्षा व्यवस्था कडा

जनकपुरधाम २५ गते । रामजानकी विवाहोत्सवमे सहभागी होबएलेल तिर्थालुसभकेँ जनकपुर पहुँचबाक क्रम शुरु भेल अछि । अगहन २६ गते मनाओल जाएबला विवाहोत्सवमे सहभागी होबएलेल भारत उत्तर प्रदेशक मुख्यमन्त्री योगी आदित्यनाथ जनकपुर आबि रहल छथि । उत्तर प्रदेशक मुख्यमन्त्री आदित्यनाथके जनकपुर अएबाक निश्चित भेलाक बाद विवाहोत्सवमे अन्य वर्षसभक अपेक्षा एहि वर्ष तिर्थालुसभक भिड बढबाक अनुमान कएलगेल अछि ।
मुख्यमन्त्री आदित्यनाथ आ श्रद्धालुसभक भिडकेँ दृष्टिगत करैत सुरक्षा निकाय विशेष सुरक्षा योजना तैयार कएने अछि । मुख्यमन्त्री आदित्यनाथक संगहि नेपाल तथा भारतक विशिष्ट अतिथिसभ जनकपुर आबि रहलाक कारण जिल्ला सुरक्षा समिति विवाहोत्सवके लक्षित करैत विशेष सुरक्षा योजना तैयार कएने छैक ।
विवाहोत्सवमे सहभागी होबएलेल आबएबला विशिष्ट अतिथिके संगहि तिर्थालुसभकेँ सुरक्षा आ सहजता प्रदान करबालेल सुरक्षा निकाय ‘ड्रोन क्यामरा’ सँ निगरानी करबाक संगहि ‘¥यापिड कम्युनिकेसन सिस्टम (आरसीएस)’ प्रविधि प्रयोगमे लओने अछि ।
उत्तर प्रदेशक मुख्यमन्त्रीके संगहि विशिष्ट अतिथि तथा तिर्थालुसभकेँ सुरक्षा आ सहजता प्रदान करबालेल तीन हजारक संख्यामे नेपाल प्रहरी परिचालन करबाक तैयारी रहल प्रदेश प्रहरी कार्यालयक प्रवक्ता डीएसपी दानबहादुर थापा जानकारी देलन्हि । विवाहोत्सवमे उत्तर प्रदेशक मुख्यमन्त्रीके संगहि लाखौंके संख्यामे श्रद्धालु सहभागी भेलाक कारण सुरक्षा चुनौतीके मध्यनजर करैत सादा पोशाकसहित तीन हजारके संख्यामे नेपाल प्रहरी परिचालन कएल जाएत ओ बतओलन्हि ।
‘भिआइपी तथा भक्तजनसभक सुरक्षा आ सम्मान देबाक उद्देश्यसँ हमसभ सुरक्षा योजना तैयार कएने छी,’ प्रवक्ता थापा कहलन्हि,‘प्रहरी आरसीएस प्रणाली अपना कऽ कन्ट्रोल रुमसँ भिडियोमार्फत हरेक गतिविधिके निगरानी करत ।’ एहिके संगहि अधिक भिडभाड रहएबला स्थान जानकी मन्दिर आ रंगभूमि मैदान क्षेत्रमे ड्रोन क्यामरा प्रयोग कऽ हरेक गतिविधि निगरानी कएल जाएत ओ बतओलन्हि ।
उत्तर प्रदेश मुख्यमन्त्री आदित्यनाथ जनकपुर पहुँचल समय संभावित ‘सेक्युरिटी थ्रेटक’ विषयमे सेहो सुरक्षा निकाय विश्लेषण शुरु कएलक अछि । सुरक्षा चुनौतीके आधार पर उत्तर प्रदेशक मुख्यमन्त्री आदित्यनाथकेँ सुरक्षा उपलब्ध कराओल जाएत एक प्रहरी अधिकृत बतओलन्हि । नेपालीकेँ संगहि आदित्यनाथक अपन सुरक्षाकर्मीसेहो रहत हुनकर कहब छलन्हि ।
रामजानकी विवाहोत्सवके देखैत सीमा क्षेत्रमे सेहो सुरक्षा सतर्कता बढाओलगेल अछि । खुल्ला सीमाके कारण दुनु देशबीच सहज आवतजावत रहलाक कारण सीमा क्षेत्रमे चेकजाँचके कडा बनाओलगेल प्रदेश प्रहरीक प्रवक्ता थापाके कहब अछि । नेपाल प्रहरी आ सशस्त्र प्रहरीके संगहि नेपाली सेनाकेँ रिजर्व फोर्सके रुपमे तैयार अवस्थामे राखलगेल अछि ।
उत्तर प्रदेशक मुख्यमन्त्री आदित्यनाथके अगहन २६ गते निजी विमानसँ भिन्सर १० बजे जनकपुर पहुँचबाक कार्यक्रम अछि । जनकपुर विमानस्थलमे अवतरण कएलाक बाद जानकी मन्दिर पहुँच कऽ हुनकर पूजाअर्चना करबाक कार्यक्रम रहल बतओलगेल अछि । जानकी मन्दिरमे पूजा कएलाकबाद प्रदेश सरकार हुनकर सम्मानमे मधेश भवनमे आयोजना कएने दिवा भोजमे आदित्यनाथ सहभागी होएताह । ओहिके बाद रंगभूमि मैदानमे सहभागी भऽ कऽ आदित्यनाथके ओहि दिन भारत घुरबाक कार्यक्रम रहल बताओलगेल अछि ।
एहिबीच विवाह पञ्चमीमे लाखौंके संख्यामे श्रद्धालु अएबाक अपेक्षा कएलगेल अछि । सवारी साधनके चाप बढला बाद मंगलदिनसँ नगरक्षेत्रमे पैघ सवारी साधनकेँ नगरसँ बाहरे पार्किङके व्यवस्था कएल जाएत । नगरक्षेत्रमे प्रवेश करएबाल चारिटा मार्गमे पैघ क्षमताके गाडी रोकल जाएत तऽ नगर भितरके गाडीसभकेँ सेहो मन्दिर क्षेत्रमे प्रवेशमे रोक लगाबएके तैयारी कएलगेल मध्य क्षेत्रीय ट्राफिक प्रहरी कार्यालय पथलैयाके एसपी किरण बज्राचार्य जानकारी देली अछि । एहिबचि आदित्यनाथ बुधदिन भारतसँ बुलेटप्रुफ गाडी जनकपुर लाओलगेल अछि । एहि बाहेक ज्यामर सहित सातटा अन्य गाडी सेहो हुनकर सुरक्षाके लेल लआओलगेल अछि ।
सुरक्षा प्रयोजनक लेल भारतीय सुरक्षाकर्मीसभ सेहो जनकपुर आबि गेल डिआईजी पाल जानकारी देलन्हि । भारतीय दूतावासक डिसिएम डा. अजय कुमारके अनुसार मुख्यमन्त्री आदित्यनाथ बुधपखन भारतक लखनऊसँ विशेष विमानसँ जनकपुर विमानस्थल अओताह ।

Read More »

जटही नाका पर बरियातके भव्य स्वागत

जनकपुरधाम २५ गते ।अगहन २६ गते होबए जा रहल रामजानकी विवाहोत्सवमे सहभागी होबएलेल भारतक अयोध्यासहित विभिन्न स्थानसँ चलल बरियात सोमदिन जनकपुर पहुँचल अछि । भारतक अयोध्यासहित विभिन्न स्थानसँ विवाहोत्सवमे सहभागी होबएलेल बरियातके रुपमे साधुसन्तसभ धनुषाके जटही नाका होइत जनकपुर पहुँचल छथि ।
धनुषाक नगराईन नगरपालिकास्थित जटही नाकामे भारतसँ आएल बरियातसभकेँ भव्य स्वागत कएलगेल छल । नेपाली काँग्रेसक नेता तथा कार्यकर्ता जटही नाका पहुँच कऽ भारतसँ आएल बरियात तथा अतिथिसभकेँ स्वागत कएने छलथि । भारतीय बरियातसभकेँ स्वागत करबालेल जानकी मन्दिरक छोटे महन्थ रामरोशन दास स्वयं जटही नाका पहुँचल छलथि ।
जटही नाकासँ नगराईन नगरपालिकाक नगराईनस्थित विद्यालयमे अयोध्यासँ आएल बरियात तथा अतिथिकेँ किछुदेर विश्राम कराओलगेल छल । विश्रामक क्रममे बरियातसभकेँ नगराईन नगरपालिकाक तर्फसँ नास्ताके व्यवस्था कएलगेल छल । भारतीय अतिथिसभ नगराईन पहुँचलाक बाद ओतुका स्थानीयसभ सेहो स्वागत सत्कारमे जुटल छलथि । एहिसँ पहिने भारतक अयोध्यासँ महोत्तरी नाकासँ विशिष्ट बरियात अएबाक परम्परा रहलाक बादो एहि वर्ष धनुषाक जटही नाकासँ जनकपुर पहुँचल अछि ।
गाडी, घोडा आ रथसँ पहुँचल बरियात तथा अन्य अतिथिक स्वागतके लेल नेपाली काँग्रेस धनुषाक सभापति महेश शंकर गिरीक नेतृत्वमे प्रदेश २ संसदीय दलक नेता रामसरोज यादव, नगराईन नगरपालिकाक मेयर परमेश्वर यादव, मैथिली विकास कोषक अध्यक्ष जीवनाथ चौधरी, तरुण दल धनुषाक अध्यक्ष संजय लाभ कर्ण, तरुण दल जनकपुर नगर समिति अध्यक्ष पंकज महतो, नेवि संघक जिल्ला अध्यक्ष सुजित मिश्र, काँग्रेस नेता गणेश तिवारी, प्रफुलराज घिमिरेसहित सयौंके संख्यामे नेता, कार्यकर्ता तथा सर्वसाधारण जटही नाका पहुँचल छलथि ।
दु दिन पहिने नेपाली काँग्रेसक उपसभापति विमलेन्द्र निधि रामजानकी विवाहोत्सवमे सहभागी होबए आबएबला बरियात तथा भारतीय अतिथिसभके स्वागतके संगहि महोत्सव सफल करबालेल धनुषा काँग्रेसके निर्देशन देने छलथि ।

Read More »

तिलकोत्सव सम्पन्न, आई मटकोर

जनकपुरधाम २५ गते ।त्रेता युगमे भगवान राम आ सीताक विवाह भेल मान्यताकेसँग रामजानकी विवाह महोत्सव अन्तर्गत भव्यताके साथ सोमदिन तिलकोत्सव कार्यक्रम सम्पन्न भेल अछि । वैवाहिक कार्यक्रमपूर्व राम मंदिर प्रांङणमे धार्मिक समारोहके बीच तिलकोत्सव कार्यक्रम सम्पन्न भेल छल । जानकी मंदिरके महन्थ रामतपेश्वर दास आ राम मंदिरक महन्थ राम गिरी तथा विवाह महोत्सवमे बरियातक रुपमे आएल अयोध्याक विशिष्ठ साधु संतक उपस्थितिमे वैवाहिक समारोहक प्रमुख कार्यक्रम तिलकोत्सव सम्पन्न भेल छल ।
तिलकोत्सव कार्यक्रममे माता सीताक पिताके भूमिका निर्वाह कएने जानकी मंदिरक महन्थ दास अयोध्यासँ आएल बरियातसभकेँ दोसल्ला ओढा कऽ स्वागत कएने छलथि । तहिना अयोध्यासँ विभिन्न भूमिकामे आएल साधुसंतसभ सेहो जानकी मंदिरक महन्थ, राम मंदिरक महन्थ, प्रशासनिक निकायक प्रमुख सहितकके दोसल्ला ओढा कऽ सम्मान कएलन्हि । तिलकोत्सव कार्यक्रम चलि रहल समय मिथिला परम्परा अनुसार कन्या पक्षसँ आएल अतिथिसभसँग हँसी मजाक करबाक प्रचलन अछि । तिलकोत्सवके अवसर पर जानकी मंदिरसँ विभिन्न प्रकारक भार राम मंदिर पहुँचएबाक परम्परा सेहो अछि । एहि परम्परा अनुसार जानकी मंदिरक महन्थ दासक नेतृत्वमे जानकी मंदिरसँ गाजाबाज सहित भार लऽकऽ निकलल टोली नगरक विभिन्न भागके परिक्रमा करैत राम मंदिर पहुँचल छल । ४ सयसँ अधिक भार लऽकऽ जानकी मंदिरसँ निकलल टोलीमे उत्तराधिकारी महंथ रामरोशन दास, प्रशासनिक निकाय, सुरक्षा निकाय, स्थानीय समाजसेवी, युवा क्लबक प्रतिनिधि सहितकके सहभागिता छलन्हि । ।
प्रत्येक वर्ष विवाहोत्सव अन्तर्गत मनाओल जाएबला तिलकोत्सव कार्यक्रमके आयोजना स्थानीय महाबिर युवा कमिटी करैत आबि रहल अछि । अन्य वर्षजँका एहुबेर महावीर युवा कमिटी मिथिला परम्परा अनुसार तिलकोत्सव कार्यक्रमके आयोजना कएने छल । तिलकोत्सव कार्यक्रममे अयोध्यासँ बरियातक रुपमे आएल साधुसन्त सहित धनुषाक प्रशासनिक निकायक प्रमुख, सुरक्षा निकायक प्रमुख, विभिन्न सराकारी कार्यालयक प्रमुख सहितकके उपस्थिति छलन्हि । तहिना तिलकोत्सव कार्यक्रम देखबालेल उल्लेख्य संख्यामे श्रद्धालुसभक उपस्थिति छल ।
एहिबीच तिलकोत्सव कार्यक्रमक समापनके संगहि मिथिलाक वैवाहिक परम्परा अनुसार मंगलदिन मटकोर कार्यक्रमके आयोजना होबए जा रहल अछि । एहि अवसर पर जानकी मन्दिरसँ निकलल टोलीद्धारा स्थानीय गंगासागरमे माटि कोरएके परम्परा अछि । मैथिली परम्परा अनुसार मटकोरक दिन पोखरिसँ लाओलगेल माटिसँ विवाहक दिन बेदी निर्माण करबाक प्रचलन अछि । गाजाबाजा सहित जानकी मन्दिरसँ निकलएबला टोली मटकोरकेलेल गंगासागर पोखरि पहुँचल करैत अछि । एहि अवसर पर पैघ संख्यामे तिर्थालु तथा स्थानीय सर्वसाधारणक उपस्थिति रहल करैत अछि ।

Read More »

सजाओलगेल जानकी मन्दिर

जनकपुरधाम २४ गते ।त्रेता युगमे मर्यादा पुरुषोत्तम राम आ जगज्जननी सीताक विवाह भेल मान्यताके साथ मनाओल जाएबला विवाह पञ्चमीके देखैत जनकपुरक जानकी मन्दिरमे भव्य सजावट कएलगेल अछि । प्रत्येक वर्ष अगहन शुक्ल पञ्चमीके दिन मुख्य समारोह विवाहोत्सवके लक्षित करैत जानकी मन्दिरके भव्यरुपेँ सजाओलगेल अछि । विवाहोत्सवके प्रमुख आकर्षणक केन्द्र जानकी मन्दिरकेँ विभिन्न प्रकारक बल्बसभसँ सजाओलगेल गेलाक कारण एखन मन्दिर भवन आ परिसर प्रकाशमय बनल अछि ।
जानकी मन्दिरके सजाबएलेल करिब ८ लाख मूल्य बराबरके फूल भारतक कोलकत्तासँ आनलगेल अछि । भारतक उत्तर प्रदेशक मुख्यमन्त्री योगी आदित्यनाथसहित पाँच सयके संख्यामे विशिष्ट अतिथि आबि रहलाक कारण विगतके वर्षसभसँ फरक तरिकासँ एहि वर्ष सर–सजावटसहितक काजके विशेष ध्यान देलगेल अछि ।
विवाहोत्सवके ध्यानमे रखैत हरेकदिन साँझक समय जानकी मन्दिरमे भऽ रहल धार्मिक प्रवचन आ झाँकीके आनन्द लेबएलेल पैघ संख्यामे सर्वसाधारणसभ पहुँचल करैत छथि । अगहन २६ गते होबए जा रहल विवाहोत्सवमे सहभागी होबएलेल नेपाल तथा भारतक विभिन्न स्थानसँ श्रद्धालुसभ जनकपुर पहुँचबाक क्रम शुरु भऽ चुकल अछि ।
सप्ताव्यापी कार्यक्रमके साथ मनाओल जा रहल रामजानकी विवाहोत्सव शुक्रदिनसँ शुरु भऽ चुकल अछि । मिथिला परम्परा अनुसार विभिन्न प्रकारक विधि पुरा करबालेल सात दिनक समय आवश्यक रहलाक कारण रामजानकी विवाहोत्सव सेहो सप्ताहव्यापी कार्यक्रमके साथ मनाओल जाइत अछि ।
पौराणिक परम्परा अनुसार सप्ताव्यापी कार्यक्रम अन्तर्गत पहिल दिन जनकपुर नगर दर्शन, दोसर दिन फूलबारीलीला आ रविदिन धनुषयज्ञ सम्पन्न भऽ चुकल अछि । तहिना चारिम दिन तिलकोत्सव, पाँचम दिन मटकोर, छठम दिन विवाहोत्सव आ सातम दिन रामकलेवा मनाओल जाइत अछि ।
रामायणमा उल्लेख कएलगेल अनुसार विवाहोत्सवके लेल मनाओल जाएबला विभिन्न धार्मिक कार्यक्रम देखबालेल जानकी मन्दिरमे पैघ संख्यामे तिर्थालुसभ आबि रहल जानकी मन्दिरक छोटे महन्थ रामरोशन दास जानकारी देलन्हि । भारतक अयोध्यासँ विवाह करबालेल जनकपुर पहुँचल समय पुरा कएलगेल सम्पूर्ण विधि अनुसार विवाहोत्सव मनाओल जा रहल दास बतओलन्हि । दासक अनुसार अन्य वर्षजँका एहु वर्ष सेहो भव्यताके साथ रामजानकी विवाहोत्सव मनएबाक सम्पूर्ण तैयारी पुरा भऽ चुकल अछि । विवाहोत्सवमे सहभागी होबएलेल नेपाल तथा भारतक विभिन्न स्थानसँ साधुसन्त तथा तिर्थालु अएबाक क्रम शुरु भऽ चुकल ओ बतओलन्हि । विवाहोत्सवमे सहभागी होबए आएल अतिथिसभकेँ खानपान तथा वासके लेल जानकी मन्दिर, राम मन्दिर आ नेपाली सेना व्यवस्था कएने अछि ।
रामजानकी विवाहोत्सवमे भारतक अयोध्याके संगहि विभिन्न स्थानसँ साधुसन्तसभ बरियातके रुपमे आएल करैत छथि । अतिथिके स्वागत करब मिथिलाक परम्परा रहल कहैत बरियातक स्वागतके लेल भव्य तैयारी कएलगेल छोटे महन्त दासके कहब अछि ।

Read More »

धनुषयज्ञ सम्पन्न, आई तिलकोत्सव

जनकपुरधाम २४ गते । त्रेता युगमे भगवान राम आ सीताबीच विवाह भेल स्मरण करैत विवाहपञ्चमीक सप्ताहव्यापी कार्यक्रम अन्तर्गत रविदिन धनुषयज्ञ कार्यक्रम सम्पन्न भेल अछि । रंगभूमि मैदानमे भव्य कार्यक्रमकबीच भारतक विभिन्न स्थानसँ आएल साधुसन्त, तिर्थालु तथा स्थानीय सर्वसाधारणक उपस्थितिमे धनुषयज्ञ कार्यक्रम सम्पन्न भेल छल ।
विवाहपञ्चमीके प्रमुख आकर्षण केन्द्र जानकी मन्दिरक आयोजनामे हरेक वर्ष धनुषयज्ञक आयोजना कएल जाइत अछि । सीताक विवाहसँ पूर्व प्राचिन मिथिलाक राजा जनक शिव धनुष तोडएबला व्यक्तिसँ विवाह करबाक शर्त रखने रहथि । ओहि मान्यता अनुसार विवाहमहोत्सवमे धनुषयज्ञ कार्यक्रम राखल जाइत अछि ।
धनुषयज्ञ कार्यक्रममे राजा जनकक भूमिका जानकी मन्दिरक महन्थ रामरोशन दास निर्वाह कएने छलथि । तहिना मर्यादा पुरुषोत्तम रामक पिता दशरथके भूमिकामे महाराष्ट्र मुम्बईस्थित मंगलपिठाधीश याज्ञिक सम्राट आचार्य श्री माधवजी आचार्य छलथि ।
तहिना अयोध्याक वृजमोहन दासजी महाराज वशिष्ठ, वृंदावनक फुलडौल दासजी महाराज विश्वामित्र आ उडिसाक स्वामी रामकृष्ण दासजी महाराज वामदेव ऋषिके भूमिकामे छलथि । धनुष यज्ञ कार्यक्रमम देखबालेल जानकी मन्दरिक महन्थ रामतपेश्वर दास, छोटे महन्थ रामरोशन दास, सहित पैघ संख्यामे सर्वसाधारणक उपस्थिति छलन्हि ।
एहिबीच काल्हि विवाह महोत्सवक प्रमुख कार्यक्रमेसँ एक तिलोकत्सव कार्यक्रमके आयोजना कएल जा रहल अछि । विवाहक निश्चितता तय करबाक परम्परा अनुसार तिलकोत्सव कार्यक्रम मनाओल जाइत अछि । एहि अवसर पर जानकी मन्दिरसँ एकसयसँ अधिक संख्यामे राम मन्दिरमे भार पठएबाक परम्परा अछि । राम मन्दिरक प्राङ्णमे आयोजना होबएबला एहि कार्यक्रममे जानकी मन्दिर तथा राम मन्दिरक महन्थ सहित प्रशासनिक, सुरक्षा निकायक प्रमुखके संगहि भारतक अयोध्यासँ आएल साधु सन्त तथा तिर्थालुसभक उल्लेख्य संख्यामे सहभागिता रहल करैत अछि ।
विवाह महोत्वस कार्यक्रमक पहिल दिन जनकपुरधाम नगर दर्शन आ दोसर दिन फुलबारी लिला सम्पन्न भऽ चुकल अछि । तहिना चारिम दिन तिलकोत्सव, पाँचमदिन मटकोर आ छठम दिन विवाहोत्सवक प्रमुख वैवाहिक कार्यक्रम आयोजन होइत आएल अछि । एम्हर विवाह महोत्सवक सम्पूर्ण तैयारी पुरा भऽ चुकल जानकी मन्दिरक छोटे महन्थ रामरोशन दास जानकारी देलन्हि ।

दु दिन विद्यालय बन्द
रामजानकी विवाहोत्सवके मध्यनजर करैत जनकपुर नगर क्षेत्रक शैक्षिक संस्थासभ दु दिन बन्द करबालेल जनकपुरधाम उपमहानगरपालिका आग्रह कएलक अछि । उपमहानगरपालिकाद्धारा रविदिन जारी विज्ञप्तीमे विवाह पञ्चमीके देखैत अगहन २५ आ २६ गते विद्यालयसभमे पठन पाठन नहि करबालेल निर्देशन देलगेल अछि । नगर क्षेत्रक सम्पूर्ण सामुदायिक आ संस्थागत विद्यालयके लेल जारी कएलगेल निर्देशनमे अगहन २५ आ २६ गते पठन पाठन सञ्चालन नहि कऽ आगन्तुक तथा सेवाकर्मीसभक आवश्यक्ता अनुसार भवन तथा परिसर उपलब्ध करएबाक आ दुनु दिन दीपावली करबालेल कहलगेल अछि ।

Read More »

सपथ ग्रहण तथा प्रमाणपत्र वितरण कार्यक्रम सम्पन्न

जनकपुरधाम २३ गते । रौनियार सेवा समिति जनकपुरधामक नयाँ कार्यसमितिक सपथ ग्रहण तथा प्रमाणपत्र वितरण कार्यक्रम सम्पन्न भेल अछि । अगहन १५ गते सम्पन्न समितिक आठम साधारणसभा अरुणकुमार गुप्ताक नेतृत्वमे १५ सदस्यीय नयाँ कार्यसमिति गठन कएने छल । नयाँ कार्यसमितिक पदाधिकारी आ सदस्यसभक एक समारोहके बीच सपथ ग्रहण, प्रमाणपत्र वितरण तथा पद हस्तान्तरण कएलगेल अछि ।
निर्वतमान कार्यसमितिक अध्यक्ष लालबाबु गुप्ताक अध्यक्षतामे सम्पन्न कार्यक्रममे नवनिर्वाचित अध्यक्ष अरुणकुमार गुप्ता, वरिष्ठ उपाध्यक्ष रामप्रताप साह, उपाध्यक्ष राधेश्याम साह, महासचिव प्रमोदकुमार गुप्ता, सचिव वैद्यनाथ साह आ कोषाध्यक्ष उमाशंकर साहसहितक पदाधिकारीसभक सपथ ग्रहण आ प्रमाणपत्र वितरणके संगहि पद हस्तान्तरण कएलगेल छल ।
तहिना सदस्य रामकुमार गुप्ता, बजरंग प्रसाद गुप्ता, किशोर प्रसाद गुप्ता, रामदयाल गुप्ता, सोतीलाल साह, अशोक कुमार गुप्ता, रामेश्वर प्रसाद साह, दिलिप प्रसाद साह आ अनिल कुमार साह निर्वाचित भेल छथि ।

Read More »

घर घरमे बिजली पहुँचएबाक ऊर्जामन्त्रीके प्रतिबद्धता

जनकपुरधाम २३ गते ।ऊर्जा, जलस्रोत तथा सिंचाइ मन्त्री वर्षमान पुन देश एकात्मक शासन प्रणालीसँ संघीय शासन प्रणालीके सुरुवातमे संक्रमणकालीन अवस्थाकेँ चिरए लेल सरकार प्रतिबद्ध रहल बतओलन्हि अछि । मन्त्री पुन संघीय, प्रदेश आ स्थानीय सरकारके समन्वयनमे किछु असन्तुष्टि देखलगेला बादो ओहिकेँ वस्तुगत रुपेँ देखए पडत बतओलन्हि । नेपाल कम्युनिष्ट पार्टी प्रदेश २ संसदीय दलके कार्यालय आयोजना कएने अन्तरक्रिया कार्यक्रममे मन्त्री पुन देशमे राजनीतिक समावेशी लोकतन्त्रके राज्यव्यवस्था आ राजनीतिक व्यवस्थामे तीनु तह एक दोसरसँग सुमधुर सम्बन्ध बना कऽ आगा बढल तऽ विकास द्रूत गतिमे हएबाक विश्वास व्यक्त कएलन्हि ।
ओ प्रदेश २ मे आब दु वर्षमे हरेक नेपालीके घर–घरमे विद्युतीकरणमार्फत इजोत बनएबाक प्रतिबद्धता जनओलन्हि । प्रदेश २ मे पैघ सिंचाइ आयोजनासभक जानकारी करबैत मन्त्री पुन पैघ आयोजना संघीय, मध्यम प्रदेश सरकार आ छोट स्थानीय सरकार करएजँका कार्य विभाजन कएने सेहो बतओलन्हि । ओ सरकारके जिम्मेवारी बढला बाद, दायित्व सेहो बढलासँ एखन सम्पूर्ण जिम्मेवारी सरकारके मात्र दऽ कऽ नहि हएबाक बतओलन्हि ।
ओ कहलन्हि , ‘एखन प्रदेश सरकार आ स्थानीय सरकार अधिकार नहि देलक कहि नहि होएत । हमसभ प्रत्यायोजन करबालेल तैयार छी । मुदा सीमिति स्रोत आ साधनके अभावमे कोनो योजनाकेँ प्रदेश आ स्थानीय सरकार पूरा नहि कऽ सकल । ओहिके प्रत्यक्ष मारमे जनता परलासँ एकहिबेर हस्तान्तरणमे समस्या भेल अछि ।’
ओ मन्त्रालयके दिससँ ‘नेपालके पानी, जनताके लगानी’ आ ‘समृद्ध तराई मधेस’ कार्यक्रकेँ प्रदेश सरकारसँग समन्वयन कऽ स्वायततासँगहि अनेकता एकता छिटब हिमाल, पहाड आ तराइकेँ एकदोसरसँग जोडबामे सहयोग भेटत बतओलन्हि ।
ओ कहलन्हि, ‘हिमाल आ पहाडके पानि तराइमे तराइके उत्पादित खाद्यान्न (धान, गहुँम, अन) पहाडमे पहुँचा कऽ सम्बन्ध जोड्एके एकटा सूत्राधार होएत ।’ मन्त्री पुन तराई मधेसक जिल्लासभके १२ महिनाक सिंचाइके लेल सुनकोशी–कमला डाइभर्सनसँ १ लाख ७८ हजार हेक्टर, सुनकोशी–मरहन्ना डाइभर्सनसँ एकलाख २२ हजार हेक्टर सिंचाइ होबएके साथ काज आगा बढओने जानकारी देलन्हि ।
ओ तराई मधेसक मरुभूमीकरण रोकबके अर्थ चुरे संरक्षणके पहिल सिढी रहलासँ एहिमे संघीय सरकार गम्भीर रहल बतओलन्हि । प्रदेश २ क चिनी उद्योगसँ २१ मेगावाट विद्युत किनएके सम्झौता भऽ चुकल आ अन्यसभ उत्पादन कएने विद्युत किनए सेहो नेपाल सरकार तैयार रहल बतओलन्हि ।
नेकपाक प्रदेश सांसद रामचन्द्र मण्डलके स्वागत मन्तव्य तथा प्रदेश २ संसदीय दलक सत्यनारायण मण्डलके अध्यक्षतामे भेल कार्यक्रममे नेकपाक सांसद प्रभु साह, प्रदेश सांसद भरत साह ८ ओ जिल्लाक स्थानीय तहक प्रतिनिधिके सहभागिता रहल छल ।

Read More »
1 29 30 31 32 33 52