वीरगंज भादव ५ गते ।भारतीय नागरिक प्रधानमन्त्री केपी शर्मा ओली नेतृत्वक सरकारविरुद्ध विरोध प्रदर्शन कएलक अछि । नेपालमे भारतीय वाहनक चालकके बिना कारण परेशान करबाक संगहि नित नयाँ नियम लागू कएल जा रहल कहैत रक्सौल सीमा जाम कऽ कऽ ओसभ प्रदर्शन कएलक अछि ।
भारतीय नागरिक रक्सौल–बीरगंज मैत्री पुल पर एम्बुलेन्स आ अन्य गाडीसभ ठाढ कऽ सीमा अवरुद्ध कएने छल । नेपालमे भारतीय वाहन प्रवेशके लऽ कऽ नेपाल सरकार हरेक दिन नियम बदलैत आबि रहलासँ समस्या बढल कहैत आक्रोशित भारतीय नागरिक विरोध प्रदर्शन कएने छल ।
बुधदिन भिन्सर हजारौंके संख्यामे पहुँचल स्थानीयवासी मैत्री पुल पर पहुँच कऽ प्रदर्शन कएने छल । प्रदर्शनके क्रममे ओसभ सरकारक संगहि नेपाली प्रहरी, भन्सारसहितकके विरुद्ध नाराबाजी कएने छल ।
भारतीय गाडी वीरगंज प्रवेश करबाक क्रममे नेपाली भन्सार पर अनुमति लेबए परैत अछि । एहिके लेल भारतीय नागरीककेँ लम्बा समयधरि लाइन लागए परैत अछि । साँझ पाँच बजेके बाद पहुँचला पर इजात नहि भेटैत अछि । प्रवेशके इजाजत भेट गेलाक बादो रास्तामे प्रहरी अनावश्यक परेशान करैत आबि रहल भारतीय नागरिकक कहब अछि ।
क्रस बोर्डर अपराध रोकबालेल दुनु देशक प्रशासन मिलजुलि कऽ काज करैत अछि । मुदा एखन वीरगंजक नयाँ एसपी सोमेन्द्रसिंह राठौर भारतीय सवारी साधनक अवागमनमे कडाइ कएने छथि ।
काठमाण्डु भादव ५ गते ।समाजवादी पार्टीसँगक एकीकरणके विषयमे राष्ट्रिय जनता पार्टी (राजपा) नेपालमे विवाद उत्पत्र भेल अछि । पार्टी एकता पहिने की महाधिवेशन पहिने एहि विषयमे पार्टीभितर विवाद देखलगेल अछि ।
राजपा नेपालक अध्यक्षमण्डलक सदस्यसभ राजेन्द्र महतो, महेन्द्रराय यादव आ शरतसिंह भण्डारी उपेन्द्र यादव अध्यक्ष रहल समाजवादी पार्टीसँ एकीकरण करबाक अडान पर छथि तऽ राजपा नेपालक अध्यक्षमण्डक संयोजक राजकिशोर यादव, अध्यक्षमण्डलक सदस्यद्वय महन्थ ठाकुर आ अनिल झा महाधिवेशन सम्पत्र कऽ कऽ एकीकरण प्रक्रियामे जएबाक अडान पर छथि ।
एहि विवादक कारण अध्यक्षमण्डलक सदस्य महतोक संयोकत्वमे रहल वार्ता समितिए भङ्ग करबाक निष्कर्षमे पार्टी पहुँचल अछि । वार्ता समितिक संयोजक महतो समाजवादी पार्टीसँ वार्ता करब मुदा ओकर जानकारी पार्टीकेँ नहि देलाक बाद पार्टी वार्ता समिति भङ्ग करबाक निष्कर्ष निकाललक अछि ।
स्रोतक अनुसार महतो समाजवादी पार्टीक अध्यक्ष यादवसहितक शीर्ष नेतासभसँ एकीकरणक विषयमे प्रायः हरेक दिन छलफलमे छथि । मुदा, पार्टी ओहि विषयमे जानकारी मँगलाक बाद ‘किछु नहि भेल अछि’ बतबैत आबि रहल छथि ।
राजपा नेपालक एकटा महासचिव कहलन्हि,‘राजेन्द्रजीके कारण पार्टी एकीकरणक प्रक्रिया विवादमे फँसल अछि । ओ समाजवादी पार्टीक नेतासभसँ दिनराति बातचित करैत छथि, ई बात मिडियामे सेहो कहैत छथि मुदा पार्टीके पुछला पर एकीकरणक कोनो प्रगति नहि भेल कहैत छथि, ।’ महतो पार्टी आ पार्टीक कार्यकर्ताकेँ गुमराहमे रखने ओ दावा कएलन्हि ।
राजपा नेपालक अध्यक्षमण्डलक संयोजक राजकिशोर यादव किछुदिन पहिने मधेशी पत्रकारसँगक अन्तरक्रियामे कहने रहथि,‘एकीकरणक विषयमे राजेन्द्रजीसँ पुछला पर किछु नहि भेल अछि, एकीकरणक नाम पर एक कप चाय सेहो नहि पिबने छी कहैत छथि ।’
मुदा महतो उपेन्द्र यादवसँ बेरबेर विभित्र स्थानमे छलफल कऽ चुकल छथि । महतो अपने सेहो सञ्चारकर्मीसँगक वार्ता आ छलफल सकारात्मक रुपेँ आगु बढि रहल मुदा ठोस प्रगति किछु नहि भेल प्रतिक्रिया देने रहथि । मुदा ओ पार्टी बैठकमे खासे छलफल नहि भेल जानकारी करओने रहथि ।
एम्हर समाजवादी पार्टी संसदीय दलक प्रमुख सचेतक उमाशंकर अरगरिया दुनु दलबीच सकारात्मक छलफल चलि रहल आ एकीकरण नजदिक नजदिक पहुँचल बतबैत छथि । यद्यपि सभकिछुके निर्णय नहि होबएधरि प्रगतिके कोनो अर्थ नहि रहि जाइत अछि हुनकर कहब अछि ।
राजपा नेपालक अध्यक्षमण्डलके संयोजक राजकिशोर यादव सोमदिन अध्यक्षमण्डलक बैठक बजओने रहथि । बैठकके लेल महाधिवेशन, सांगठनिक आ राजनीतिक विषयसहित तीनटा एजेण्डा तय भेल छल । मुदा राजेन्द्र महतो देरसँ अएबाक संगहि शरतसिंह भण्डारी अनुपस्थित भेलाक बाद बैठक स्थगित भेल छल ।
अध्यक्षमण्डलक सदस्य अनिल झा कहलन्हि,‘एकीकरणसहितक एजेण्डा पर छलफल करबालेल बैठक बजाओलगेल छल । मुदा वार्ता समितिक संयोजक नहि अओलन्हि । शरतजी बर्दिवाससँ आबि रहल छी रास्तामे छी, कहलन्हि मुदा नहि अओलन्हि । ओहि कारण बैठक स्थगित भऽ गेल ।’
बैठक ११ बजे बजाओलगेल छल । ११ बजे राजकिशोर यादव आ अनिल झा पार्टी कार्यालय पहुँचल छलथि । महन्थ ठाकुर सिंदरबारस्थित अर्र्थ समितिक बैठकमे छलथि । ओम्हर ओहि समयमे राजेन्द्र महतो आ शरतसिंह भण्डारीके अलग छलफल चलि रहल छल । मुदा भण्डारी काठमाण्डुमे नहि रहल कहैत पार्टीसँ झुठ बजने राजपा नेपालक एक शीर्ष नेता बतओलन्हि अछि । दुनु नेताबीचक छलफल समाप्त भेलाक बाद महतो तीन बजे पार्टी कार्यालय पहुँचल रहथि ।
बैठकसँ महाधिवेशनके लेल स्थान तय करबाक, महाधिवेशनके लेल व्यवस्थापन समिति, आर्थिक समिति, राष्ट्रिय अन्तर्राष्ट्रिय अतिथि समन्वय समिति, विधान, घोषणापत्र तथा दस्तावेज लेखन समिति, प्रचार प्रसार समिति गठन कऽ ओकर जिम्मेवारी विभाजन करबाक तैयारी छल । मुदा नेतासभ जानिसुमानि कऽ अनुपस्थित भऽ गेलथि ।
बैठकमे समाजवादी पार्टीसँ चलि रहल वार्ताक विषयमे बाहर आबि रहल चर्चाके विषयमे सेहो छलफल करबाक एजेण्डा छल । वार्ता सकारात्मक रुपेँ आगु नहि बढल अछि तऽ वार्ता समिति भङ्ग करबाक आ अध्यक्षमण्डलक सदस्यकेँ जिम्मेवारी देबाक सहितक एजेण्डा राखलगेल छल । एहिबाहेक लाल आयोगक विषयमे सञ्चारमाध्यममे आएल विषयमे पार्टीक धारणा, संविधान संशोधनसहितक विषयमे प्रधानमन्त्री केपी शर्मा ओलीसँ भेटघाट, संसदमे पाटीृक आगामी भूमिका, बाढिसहितक विषयमे छलफल करबाक तैयारी छल । मुदा अन्तमे बैठक स्थगित भेल । मंगलदिन फेर नेतासभक व्यस्तताक कारण बैठक नहि बसि सकल ।
पार्टी महाधिवेशनबाद राजपा नेपाल एकल अध्यक्ष प्रणालीमे जाएत निश्चित अछि । ई बात विधानमे उल्लेख अछि । आगामी महाधिवेशनसँ लगभग महन्थ ठाकुर अध्यक्ष बनताह निश्चित अछि । अन्य नेतासभक व्यवस्थापनक विषयमे किछु तय नहि भेल अछि । ओहि कारण महतो अपनाके व्यवस्थापन करबालेल समाजवादी पार्टीसँ एकीकरण करबालेल धरफरीमे छथि ।
एकीकरणके बाद चारिटा अध्यक्ष रखबाक आ ओहिमे ओ चारि नम्बरके अध्यक्ष रहताह लगभग तय कऽ चुकल छथि । एक नम्बरमे महन्थ ठाकुर, दोसर नम्बरमे डा.बाबुराम भट्टराई, तेसर नम्बरमे उपेन्द्र यादव आ चारिम नम्बरमे राजेन्द्र महतो रहबा विषयमे अनौपचारिक छलफल भेल समाजवादी पार्टी स्रोत जनओलक अछि । एकीकृत पार्टीमे महेन्द्र राय यादवकेँ संसदीय दलक नेता बनएबाक विषयमे सेहो छलफल भऽ रहल अछि तऽ शरतसिंह भण्डारीकेँ सेहो उपयुक्त स्थान देबाब विषयमे चर्चा चलि रहल स्रोत जनओलक अछि ।
चारि गोटेक अध्यक्षमण्डलके बाद वरिष्ठ नेता आ उपाध्यक्ष बना कऽ सभ नेताकेँ व्यवस्थित करबाक तैयारी रहल समाजवादी पार्टीक एक वरिष्ठ नेता बतओलन्हि ।
एकीकरणक प्रगतिके विषयमे राजपा अध्यक्षमण्डलक सदस्य अनिल झा कहलन्हि,‘एकीकरणक विषयमे हम सञ्चारमाध्यमसँ मात्र जानकारी पओने छी । पार्टी जिम्मेवारी देने व्यक्तिसँ कोनो जानकारी नहि आएल अछि ।’
जनकपुरधाम भादव ५ गते ।भारतीय विदेशमन्त्री एस जयशंकर काठमाण्डु पहुँचल छथि । हुनका विमानस्थलमे परराष्ट्र सचिव शंकरदास बैरागी स्वागत कएने छलथि । बुधदिनसँ काठमाण्डुमे शुरु भेल मन्त्रीस्तरीय नेपाल–भारत संयुक्त आयोगक बैठकमे सहभागी होबएलेल ओ नेपाल आएल छथि ।
जयशंकरके आगमनके देखैत काठमाण्डुमे उच्च सतर्कता अपनाओलगेल अछि । हुनक विरोधमे प्रदर्शनक सूचना भेटलाक कारण सुरक्षा सतर्कता बढाओलगेल प्रहरी जनओने अछि । हुनकर सुरक्षाके लेल विशेष पेट्रोलिंग, गस्ती तथा सादा पोशाकक पाँच सयसँ अधिक प्रहरी परिचालन कएलगेल अछि ।
बंगलादेशक तीन दिवसीय भ्रमण समाप्त कऽ जयशंकर ढाका होइत सोझे काठमाण्डु पहुँचल छथि । भारतमे नरेन्द्र मोदी दोसरबेर सत्तामे पहुँचलाक बाद भारतीय विदेशमन्त्रीके ई दोसर नेपाल भ्रमण अछि ।
आयोगक बैठकमे दु पक्षीय सम्बन्धके संगहि सभ विषयकेँ पाँच शीर्षकअन्तर्गत राखि कऽ छलफल करबाक कार्यसूची अछि ।
राजनीतिक सुरक्षा आ सीमा, आर्थिक सहयोग तथा पूर्वाधार, व्यापार तथा पारवहन, ऊर्जा तथा जलस्रोत आ संस्कृति तथा शिक्षाक विषयमे छलफल हएबाक कार्यसूची अछि ।
एहि मुख्य कार्यसूचीभितर रेलवे लाइन, जलमार्ग, पेट्रोलियम लाइन, हुलाकी सडक, चेकपोस्ट स्थापना, नयाँ जलविद्युत योजनासहितक एक दर्जनसँ अधिक विषयमे समझदारी आ कार्यान्वयन प्रक्रिया आगु बढबाक आ किछु हस्तान्तरण हएबाक सम्भावना अछि ।
बैठकमे नेपाल दु देशक प्रधानमन्त्रीके तहमे दुबेर छलफल भेल डुबान समस्या आ ओहि विषयमे संयुक्त प्राविधिक टोली स्थलगत अध्ययनपश्चात बुझओने प्रतिवेदन कार्यान्वयन पर जोड देत ।
प्राविधिक टोली प्रतिवेदनमे भारतक भारत नदीक प्राकृतिक बहाब अवरुद्ध कएलाक कारण डुबानक समस्या देखलगेल उल्लेख कएने परराष्ट्रमन्त्री ज्ञवाली सोमदिन सञ्चारकर्मीसभकेँ जानकारी करओने छलथि ।
नेपाल सार्ककेँ सक्रिय बनएबाक धारणा सेहो राखए जा रहल अछि । बैठकके बाद वृहस्पतदिन संयुक्त वक्तव्य जारी होएत ।
एहिबीच भारतीय विदेशमन्त्री जयशंकर आ प्रधानमन्त्री केपी शर्मा ओलीबीच भेटवार्ता भेल अछि । काठमाण्डु पहुँचलाक बाद ओ प्रधानमन्त्री ओलीसँ भेट कएने छलथि । दुनु देशबीचक सम्बन्धकेँ आओर मजबुत कोना बनाओल एहि विषयमे दुनु गोटेबीच गम्भीर बातचित भेल बताओलगेल अछि ।
भेटक क्रममे प्रधानमन्त्री ओली जयशंकरके स्वागत करैत संयुक्त बैठक फलदायी होएत विश्वास व्यक्त कएने छलथि ।
विदेशमन्त्री जयशंकर सेहो दुनु देशबीचक छलफल सकारात्मक हएबाक विश्वास व्यक्त कएलन्हि ।
जनकपुरधाम भादव ४ गते ।नेपाल कम्युनिस्ट पार्टी (नेकपा) क नेता प्रभु साह प्रदेश २ क अध्यक्ष पदसँ राजीनामा देलन्हि अछि । जिम्मेवारी विभाजनप्रति असन्तुष्टि जनबैत साह प्रदेश अध्यक्ष पदसँ राजीनामा देने बताओलगेल अछि ।
साह पार्टी अध्यक्ष पुष्पकमल दहाल प्रचण्डसँ भेट कऽ सोमदिन राजीनामा बुझओलन्हि अछि । पार्टी एकीकरणक क्रममे जिल्ला आ प्रदेश कमिटी चयनप्रति साह असन्तुष्ट छलथि । यद्यपि हुनकर राजीनामा स्वीकृत नहि भेल अछि ।
शहीद रामबृक्ष यादवक स्मृतिसभामे भाग लेबए जनकपुर पहुँचबासँ पहिने साह प्रचण्ड निवास खुमल्टार पहुँच कऽ राजीनामा बुझओने बताओलगेल अछि । यावक स्मृतिसभामे प्रचण्डसँगे साह सेहो जनकपुर आओलाक बादो राजीनामाक विषय गोप्य राखलगेल छल । मंगलदिन नेकपा अध्यक्ष प्रचण्ड जनकपुरसँ काठमाण्डु घुबाक संगहि साहक राजीनामा प्रकरण सार्वजनिक भेल अछि ।
स्थायी कमिटी सदस्यक दाबेदार मानलगेलाक बादो तत्कालीन एमाले आ माओवादी केन्द्रबीचक एकताक बाद बनल नेकपामे हुनकर नाम नहि परल छल । पछिलाबेर प्रदेश सदस्यसभ चयन करबाक क्रममे सेहो हुनकासँ सल्लाह नहि कएलगेल साहक शिकायत अछि ।
एहिके संगहि जिल्ला कमिटीक सपथग्रहण कार्यक्रम एवं जनप्रतिनिधिसभक प्रशिक्षण रोकलगेलप्रति सेहो ओ असन्तुष्टि जनओने रहथि ।
जनकपुरधाम भादव ४ गते । जनकपुर अञ्चल अस्पतालक लापारबाहीसँ बिमारीके मृत्यु भेल कहैत दोषीकेँ कारबाहीक माँग करैत विद्यार्थीसभ प्रदर्शन कएलक अछि । जनकपुर अञ्चल अस्पतालक लापरबाहीके कारण इलाज नहि पाबि कऽ २१ वर्षीय युवक कुन्दन झाक मृत्यु भेल कहैत विद्यार्थीसभ मंगलदिन जनकपुरमे प्रदर्शन कएलक अछि ।
जनकपुरक डेफोडिल्स पब्लिक स्कुलमे कम्प्युटर विषयक शिक्षक झाक रविदिन भिन्सर जनकपुर अञ्चल अस्पतालमे इलाजक क्रममे मृत्यु भेल छल ।
विद्यालयक विद्यार्थीसभ शिक्षक झाक मृत्युक घटनाक निष्पक्ष छानबिन कऽ दोषीउपर कारबाहीके माँग कएलक अछि । अस्पताल समयमे उपचार नहि कएलाक कारण हुनक मृत्यु भेल कहैत ओसभ दोषी चिकित्सककेँ सेहो कारबाही करबाक माँग कएने अछि । विभित्र प्लेकार्डसहित प्रदर्शनमे उतरल विद्यार्थीसभ नगर क्षेत्रक परिक्रमा कऽ जनकपुर अञ्चल अस्पताल पहुँचल छल ।
समान्य बोखार आ पेटमे दर्द भेलाक बाद जनकपुर अञ्चल अस्पतालमे शनिदिन राति भर्ना भेल महोत्तरीक पिपरा गामपालिका बनौलीक कुन्दनकेँ अस्पतालक लापरबाहीसँ रविदिन भिन्सर मृत्यु भेल छल । समयपर ल्याब रिपोर्ट नहि देलासँ आ चिकित्सक इलाज नहि कएलाक कारण कुन्दनके मृत्यु भेल परिवारक आरोप अछि ।
जनकपुरधाम भादव ४ गते ।नेपाल कम्युनिस्ट पार्टी (नेकपा) नेतृत्वक संघीय सरकारमे समाजवादी पार्टी नेपाल सहभागी भऽ कऽ दु तिहाइक संख्या पहुँचाबएमे सहयोग कएने अछि । समाजवादी पार्टीक अध्यक्ष उपेन्द्र यादव स्वयं संघीय सरकारक उपप्रधान एवं स्वास्थ्यमन्त्री छथि ।
यादवक समाजवादी पार्टी प्रदेश २ सरकारक नेतृत्वमे अछि । संघीय सरकारमे नेकपा आ समाजवादीबीच निक सहकार्य देखलगेलाक बादो प्रदेशमे ठीकविपरित अवस्था अछि । विभित्र कारणसँ प्रदेश आ संघीय सरकारबीच बेरबेर विवाद होइत आबि रहल अछि । कहियो प्रदेश प्रहरी भर्ना तऽ कहियो लोकसेवा गठन करबाक विषयमे दुनु सरकारबीच विवाद होइत आबि रहल अछि ।
नेकपाक अध्यक्ष पुष्पकमल दहाल प्रचण्ड प्रदेश २ आएल समय एहि प्रकारक विवाद आओर तिव्र भऽ जाइत अछि । एहि प्रकारक पछिला घटनाक्रम पुनः जनकपुरमे दोहराएल अछि ।
एहिसँ पहिने गत वर्ष दशैं, दिपावली आ छठिक अवसर पर नेकपा आयोजना कएने शुभकामना अदानप्रदान कार्यक्रममे जनकपुर पहुँचल समय प्रचण्ड संघीय सरकारकेँ ‘ओभरटेक’ नहि करबाक चेतावनी देलाक बाद प्रदेश सरकारसँ विवाद भेल छल । संघीय सरकारकेँ कानुन बनएबासँ पहिने प्रदेश सरकार प्रदेश प्रहरी ऐन लाबि रहल कहैत प्रचण्ड ‘ओभरटेक’ नहि करबालेल चेतावनी देने रहथि ।
सँगे रहल प्रदेश २ क मुख्यमन्त्री लालबाबु राउत संघीय सरकार अधिकारविहीन बना कऽ संघीयता समाप्त करए चाहि रहल कहैत प्रचण्डके प्रतिवाद कएने रहथि ।
मुदा एहिबेर नेकपा अध्यक्ष प्रचण्ड प्रदेश २ मे सभसँ अधिक भ्रष्टाचार भऽ रहल टिप्पणी कएलाक बाद प्रदेश सरकारसँग विवाद भेल अछि । शहीद रामवृक्ष यादवक स्मृतिसभामे सहभागी होबए सोमदिन धनुषाक बरमझिया पहुँचल प्रचण्ड प्रदेश २ मे सभसँ अधिक भ्रष्टाचार भऽ रहल टिप्पणी कएने रहथि ।
नेकपा अध्यक्ष प्रचण्ड एहि प्रकारक टिप्पणी कएलाक बाद प्रदेश सरकारक मन्त्रीसभ हुनकर प्रतिवाद करैत सरकारक बचावमे उतरल छथि । प्रदेश २ क आन्तरिक मामिला तथा कानुनमन्त्री ज्ञानेन्द्रकुमार यादव प्रदेश २ सँ अधिक भ्रष्टाचार काठमाण्डुमे रहल जबाब देलन्हि ।
मंगलदिन विपद् व्यवस्थापन समिति धनुषा जनकपुरमे आयोजना कएने अन्तरक्रिया कार्यक्रममे नेकपा अध्यक्ष प्रचण्डतर्फ इंगित करैत कानुनमन्त्री यादव कहलन्हि,‘प्रचण्डजी कहि रहलजँका प्रदेश २ मे भ्रष्टाचार नहि अछि । प्रदेश २ सँ अधिक भ्रष्टाचार काठमाण्डुमे अछि, देखलासँ हएतैक ।’
प्रचण्ड सेहो उपस्थित रहल कार्यक्रममे कानुनमन्त्री यादव सोन काण्डसँ निर्मलाक हत्याराकेँ पता नहि लगाबएबला दोसरके आरोप लगाएब गलत रहल बतओलन्हि । ‘दु तिहाइक शक्तिशाली सरकार निर्मलाक हत्याराके पत्ता नहि लगा सकल अछि, सोनकाण्डक दोषी के अछि नहि कहि सकल अछि, ओहि परसँ दोसरके आरोप लगाएब, सरासर गलत अछि,’ मन्त्री यादव कहलन्हि ।
ओ संघीय सरकारक हस्तक्षेपके कारण सुशासनक व्यवस्था कमजोर होइगतेल आरोप लगबैत संघीय सरकारक कारण प्रहरी प्रशासन प्रदेश सरकारकेँ नहि टेर रहल उल्लेख कएलन्हि । भ्रष्टाचार अन्त करबालेल सभकेँ अपन अपन स्तरसँ प्रयास करब जरुरी रहल हुनकर कहब छलन्हि ।
कानुनमन्त्री यादवके बाद सम्बोधन कएने नेकपा अध्यक्ष प्रचण्ड ओ प्रदेश २ मे मात्र भ्रष्टाचार भऽ रहल ई बात नहि बतओने दावा कएलन्हि । जनताक अवस्था आ देशक विषयमे बाजि रहल समय देशभितर प्रायः हरेक स्थानमे समस्यासभ देखलगेल आ प्रदेश २ मे सेहो जनता खुश अछि की नहि ऐतेक मात्र बुझए चाहने प्रचण्डक कहब छलन्हि । दैवी प्रकोपसम्बन्धी अन्तरक्रियामे अप्राशंगिक होबए नहि चाहि रहल कहैत प्रचण्ड जनताक पक्षमे काम करबालेल सभसँ आग्रह कएलन्हि ।
कार्यक्रममे उपस्थित नेकपाक वरिष्ठ नेता माधवकुमार नेपाल विपद् व्यवस्थापनसम्बन्धी कार्यक्रममे आरोप प्रत्यारोपमे उतरि कऽ गलत टिकाटिप्पणी नहि करबालेल आग्रह कएलन्हि । विपद्के स्थायी समाधान करबालेल प्रभावकारी रुपेँ सरकारके नीतिगत रुपेँ आगु बढबा पर हुनकर जोड छलन्हि ।
काठमाण्डु अखार ६ गते ।प्रमुख प्रतिपक्षी कांग्रेसक नेताकार्यकर्ता डेनमार्कक कोपनहेनहेगनमे जम्मा भेल छथि । विभित्र देशमे रहल जनसम्पर्क समितिक पदाधिकारीकेँ प्रशिक्षण देबए, पार्टी विधानक विषयमे छलफल आ केपी ओली नेतृत्वक सरकार कएने अलोकप्रिय निर्णयक विरोधमे जनमत जुटाबएलेल नेताकार्यकर्ता जम्मा भेल छथि ।
कांग्रेसके ३३ देशमे जनसम्पर्क समिति अछि । कोपनहेगनमे सभ देशक जनसम्पर्क समितिक सभापति, महामन्त्री आ महासमिति प्रतिनिधिसहित करिब दु सय सहभागी छथि । शुक्रदिन शुरु होबएबला जमघटमे प्रशिक्षण देबएलेल कांग्रेस उपसभापति विमलेन्द्र निधिसहित एक दर्जन नेतासभ कोपनहेगन पहुँचल छथि ।
जमघटके आयोजना केन्द्रीय नीति अनुसन्धान तथा प्रशिक्षण प्रतिष्ठान कएने अछि । जमघटकेँ कांग््रेसक जनसम्पर्क समितिसभ सहयोग कएने अछि । कार्यक्रमकेँ विभित्र चरणमे विभाजन कएलगेल अछि ।
जमघटमे संघीय संरचनाअनुसार तैयार कएलगेल पार्टी विधानक विषयमे छलफल होएत कांग्रेसक सूचना अधिकारी केशव रिजाल जानकारी देलन्हि । हुनकअनुसार विधानमे नयाँ प्रावधान सेहो अओलाक कारण ओहि विषयमे सेहो छलफल होएत । पार्टीक सभ संरचनाक विषयमे जानकारी सेहो देल जाएत ।
नेपाली कांग्रेसक जनसम्पर्क समितिक नेतासभकेँ कांग्रेसक नीतिके विषयमे प्रशिक्षण देल जाएत । प्रशिक्षण प्रतिष्ठानक संयोजक निधिसहितक नेतासभ प्रशिक्षण देताह । नेपाली कांग्रेसक भावी रणनीति आ कांग्रेस शुरु कएने जागरण अभियानक विषयमे प्रशिक्षण देल जाएत बुझबामे आएल अछि ।
नेकपा अध्यक्ष केपी ओली नेतृत्वमे सरकार गठन भेला करिब डेढ वर्ष होबए लागल अछि । एहि अवधिमे सरकार उपलब्धिमूलक काम नहि कऽ सकल कहैत आलोना होइत आएल अछि । प्रमुख प्रतिपक्षी दल नेपाली कांग्रेसउपर सेहो मजबुत भूमिका निर्वाह नहि कऽ सकल आरोप अछि ।
विगत किछु दिन पहिने नेपाली कांग्रेस छाया सरकार गठन कऽ संघीय संसदमे सक्रियता देखओने अछि तऽ हिमाल, पहाड, तराई, मधेश–नेपाली कांग्रेस राष्ट्रिय जागरण अभियानमार्फत सरकारक गतविधिक विषयमे आम जनताके जागरुक बना रहल अछि । सरकारक अलोकप्रिय कामक विषयमे विरोध शुरु कएने कांग्रेस जनसम्पर्क समितिमार्फत सेहो विभित्र देशमे सरकारक विरोध करबाक रणनीति बनओने अछि ।
कोपनहेगनमे जम्मा भेल कांग्रेसक नेतासभ सरकारक गतिविधिके विरोध करबाक विषयमे प्रशिक्षण देताह । ओली नेतृत्वक सरकार देशके लेल हानिकारक होबए लगलाक कारण एहि विषयमे जमघटमे छलफल होएत बताओलगेल अछि ।
