राष्ट्रिय मानव अधिकार आयोगको प्रतिवेदन, संसद्मा पेस गर्न ‘लबिङ’ गरिँदै

काठमाडौँ, माघ ३ गते ।  संवैधानिक व्यवस्था अनुसार राष्ट्रिय मानव अधिकार आयोगको प्रतिवेदन व्यवस्थापिका–संसद्मा पेस हुनुपर्ने पक्षमा ‘लबिङ’ सुरु भएको छ ।  आयोगले आर्थिक वर्ष २०७२÷७३ को वार्षिक प्रतिवेदन शुक्रबार राष्ट्रपति विद्यादेवी भण्डारीलाई बुझाएपछि सो ‘लबिङ’ सुरु भएको हो ।  
सोही सन्दर्भमा व्यवस्थापिका–संसद् अन्तर्गतकोे सामाजिक न्याय तथा मानव अधिकार समितिले सम्बन्धित निकायहरूसँग छलफल गर्ने क्रममा आइतबार राष्ट्रिय मानव अधिकार आयोगका अध्यक्ष र सदस्यहरूसँग छलफल गरेको छ ।  

एनसेलसँग लाभकर असुल्न निर्देशन

काठमाडौँ, माघ ३ गते ।  संसद्को सार्वजनिक लेखा समितिले दूरसञ्चार सेवा प्रदायक एनसेल खरिदबिक्रीको लाभकर तीन महिनाभित्र असुलउपर गर्न अर्थ मन्त्रालयलाई निर्देशन दिएको छ ।  खरिदबिक्री सम्पन्न भएको लामो समयसम्म पनि लाभकरबारे सरकारले कुनै ठोस निर्णय लिन नसकेको भन्दै समितिले तत्काल असुलउपर प्रक्रिया सुरु गर्न निर्देशन दिएको हो ।  आइतबार अर्थ सचिव शान्तराज सुवेदी र आन्तरिक राजस्व विभागका महानिर्देशक चूडामणि शर्मासँगको छलफलपछि समितिले यस्तो निर्देशन दिएको हो ।  समितिले लाभकर असुलसम्बन्धी प्रगति विवरण मासिक रूपमा समितिमा पेस गर्न पनि निर्देशन दिएको छ । समितिको निर्णयमा भनिएको छ, ‘एनसेल खरिदबिक्रीमा नेपाल सरकारले पाउनुपर्ने लाभकर आयकर ऐन २०५८ अनुसार निर्धारण गरी तीन महिनाभित्र असुलउपर गरी यस समितिलाई जानकारी दिन निर्देशन गर्ने । ”

रेडियो नारायणीमा आगलागी, प्रसारण बन्द

रत्ननगर (चितवन), माघ ३ गते  । चितवनको भरतपुरस्थित सामुदायिक रेडियो ‘रेडियो नारायणी’मा आगलागी भएको छ । गएराति करिव ८ बजेको समयमा विद्युत् सर्ट भई आगलागी भएको रेडियोका सञ्चालक गोविन्द देवकोटाले जानकारी दिनुभयो । भरतपुरको बुद्धचोकबाट सञ्चालनमा रहेको रेडियोको युपिएस ब्याट्रीसेट, कन्भर्टर, ट्रान्समिटर लगायतमा क्षति पुगेको उहाँले बताउनुभयो । क्षतिको मूल्याङ्कन गर्न बाँकी रहेको रेडियोले जनाएको छ । प्रारम्भिक जानकारीअनुसार सोलारको चार्ज कन्ट्रोलरबाट विद्युत् सर्ट भएको बताइएको छ ।

ज्ञवाली अदालतको शरणमा

susil-gyawali

काठमाडौँ, माघ ३ गते । राष्ट्रिय पुनःनिर्माण प्राधिकरणको प्रमुख कार्यकारी अधिकृतबाट हटाइनुभएका सुशील ज्ञवालीले आफ्नो पदावधि बाँकी रहँदै सरकारले गैरकानुनी रूपमा हटाएको दाबी गर्दै आइतबार रिट निवेदनसहित सर्वाेच्च अदालत पुग्नुभएको छ । उहाँको रिट निवेदन दर्ता प्रक्रियामा रहेको सर्वाेच्च अदालतले जनाएको छ । नेपाल सरकार मन्त्रिपरिषद्ले गत बुधबार ज्ञवालीलाई हटाएर डा. गोविन्दराज पोखरेललाई प्राधिकरणको प्रमुख कार्यकारी अधिकृतमा नियुक्त गरेको थियो । ज्ञवालीले पुनःनिर्माण कार्य अघि बढाउन नसकेको र त्यसका लागि सोधिएको स्पष्टीकरणको चित्तबुझ्दो जवाफ नआएको निष्कर्षका साथ सरकारले हटाउने निर्णय गरेको थियो ।

दाहाललाई मातृशोक

काठमाडौँ, माघ २ गते । संविधानविद् काशीराज दाहाल र प्राध्यापक रामप्रसाद दाहाललाई मातृशोक परेको छ । उहाँकी आमा सकुन्तला दाहालको गएराति ८३ वर्षको उमेरमा निधन भएको हो ।मिर्गौला र श्वासप्रश्वास रोगको उपचार गराइरहनुभएकी दाहालको आफ्नै निवास रातोपुलमा स्वस्थानी कथा सुनिरहेकै अवस्थामा निधन भएको थियो ।उहाँका तीन छोरा र दुई छोरी हुनुहुन्छ । उहाँको अहिले बिहान पशुपति आर्यघाटमा दाहसंस्कार गरिने छ ।